Ձեր վստահելի աղբյուրը

Կառավարությունն այսօրվա նիստում հաստատեց «Դեղատոմսերի ձևերը, դեղատոմսեր գրելու, դեղեր բաց թողնելու (ներառյալ էլեկտրոնային եղանակով) կարգը, ինչպես նաև դեղերի և դեղանյութերի հաշվառման կարգը սահմանելու և Հայաստանի Հանրապետության կառավարության 2001 թվականի օգոստոսի 14-ի N 759 որոշումն ուժը կորցրած ճանաչելու մասին» որոշման մասնակի կասեցման նախագիծը: Խոսքը վերաբերում է  մարտի 1-ին ուժի մեջ մտած որոշմանը, որով բոլոր այն դեղերը, որոնք արտադրողի կողմից մակնշված էին որպես դեղատոմսով դուրս գրման ենթակա, պարտադիր պետք է դուրս գրվեին դեղատոմսով։

«Ուսումնասիրելով ստեղծված իրավիճակը՝ առաջարկում ենք աստիճանական անցման ժամանակացույց, որի հիմքում դրել ենք դեղերի ռիսկայնության աստիճանը։ Առավել ռիսկային հոգեմետ և հակաբիոտիկ դեղերի համար դեղատոմսերը ներդրվել են մարտի 1-ից, հուլիսի 1-ից պարտադիր պահանջը կտարածվի բոլոր ներարկվող դեղերի վրա, և արդեն հոկտեմբերի 1-ից՝ դեղատոմսով դեղերի ամբողջ ցանկի վրա»,- ասաց ՀՀ առողջապահության նախարարի տեղակալ Սամվել Մարգարյանը:

Վարչապետ Կարեն Կարապետյանը հորդորեց առավել ուշադիր լինել դեղատոմսերի խնդրին: «Խնդրում եմ ուշադիր լինել, ինֆորմացիա կա, որ այդ դեղատոմսերն արդեն դեղատան դիմաց գրում տալիս են, և  դրա համար լրացուցիչ վճար կա։ Շատ ուշադիր եղեք, որպեսզի դա բուտաֆորիա չդառնա»,- դիմելով փոխնախարարին՝   ասաց Կարեն Կարապետյանը: