Ձեր վստահելի աղբյուրը

Երևանում այսօր տեղի ունեցավ «Կանայք և տեղական ինքնակառավարումը» խորագրով համաժողովը, որը  նվիրված էր կանանց տնտեսական հզորացման և քաղաքական մասնակցության հարցերին, ինչպես նաև տեղական ժողովրդավարական գործընթացներում կանանց և տղամարդկանց հավասար մրցակցության իրավական մեխանիզմներին:

ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը համաժողովի բացմանը նշեց, որ համաժողովի խորագիրը  միշտ էլ արդիական է: «Մենք  մշտապես կարևորել ենք կանանց մասնակցությունը ՏԻՄ գործընթացներին, դրա վկայությունը գենդերային ուղղվածության այն ծրագրերն են, որոնք այս տարիներին կյանքի են կոչվել: Միշտ ոգևորվել ենք թեկուզ փոքր արդյունքներով, բայց միաժամանակ արձանագրել ենք, որ այդ արդյունքները դեռևս  շատ հեռու են մեզ համար գոհացուցիչ կամ բավարար լինելու մակարդակից»,- ասաց փոխնախարարը:

Հայաստանում ՄԱԿ-ի մշտական համկարգող և ՄԱԶԾ մշտական ներկայացուցիչ Շոմբի Շարփն էլ նշեց, որ գենդերային հավասարությունը, ժողովրդավարությունը, տեղական կառավարումը բխում են ՄԱԿ-ի մանդատներից: Նրա խոսքով՝ վերջին 7 տարիների ընթացքում ՄԱԶԾ-ն բավականին մեծ ակտիվություն է ցուցաբերել կանանց խնդիրներին, և հնարավորություն է տվել կանանց մասնակցել տեղական ինքնակառավարման գործընթացներին: «Իշխանությունների, միջազգային կազմակերպությունների ջանքերի շնորհիվ Հայաստանը կարողացել է հասնել որոշ հաջողությունների՝ մասնավորապես 2012-2016 թթ-ի ընթացքում»,- ասաց նա:

Հայաստանի համայնքների միության նախագահ Էմին Երիցյանի խոսքով՝ կանայք ունեն անհրաժեշտ ներուժ և կարող են տեղական ինքնակառավարման մարմիններում տղամարդկանց հավասար կառավարել և որոշումներ կայացնել:

Այսօր, ըստ նրա, խնդիրն այն է, որ ՏԻՄ-երում  կանայք հավասար մասնակցություն ունենան:
«Կանայք բավականին մեծ թիվ են կազմում մեր հասարակության մեջ՝ 50 տոկոս, սակայն որոշումներ կայացնելու հարցում ցածր ներկայացվածություն ունեն: Օրինակ,  ՏԻՄ-երում կանայք բավականին քիչ թիվ են կազմում: Այսօր ունենք ընդամենը 7 կին համայնքի ղեկավար և շատ քիչ թվով ավագանու անդամներ: Սա անարդար է, քանի որ թե կանայք, թե տղամարդիկ տեղական ինքնակառավարման մարմիններում հավասար մասնակցություն պետք է ունենան»,- ասաց Հայաստանի համայնքների միության նախագահը:

Էմին Երիցյանը նշեց նաև, որ համայնքների խոշորացման արդյունքում վիճակագրական թվերն ավելի են վատացել. եթե նախկինում կային մեծ թվով կին համայնքի ղեկավարներ, ավագանու անդամներ, հիմա արդեն նրանց թիվը նվազել է: 

Հայաստանի համայնքների միության նախագահը կառավարությանը կոչ է անում ձեռնարկել անհրաժեշտ, ներառյալ օրենսդրական միջոցներ բարձրացնելու համար կանանց մասնակցությունը և ներկայացվածությունը տեղական մակարդակում որոշումների կայացմանը, մասնավորապես՝ սահմանել ավագանիների ընտրության համամասնական ընտրակարգ՝ նախատեսելով սեռերի բաշխվածությունը կարգավորող քվոտա, ինչպես նաև ամրագրելով օրենսդրական երաշխիք՝ ավագանու կին անդամի հրաժարականի դեպքում նրա փոխարինումը հաջորդ կին թեկնածուով ապահովելու համար: