Ձեր վստահելի աղբյուրը

«Արաբկիր» բժշկական կենտրոնում մարտի 14-ին պայմանագիր ստորագրվեց Ճապոնիայի դեսպանատան և «Հավատ» ՀԿ-ի միջև: Պայմանագրով նախատեսվում է Հայաստանում լսողության սկրինինգային ծրագիրն ընդլայնելու նպատակով ախտորոշիչ սարքերի ձեռքբերում: Այդ սարքերի շնորհիվ հնարավոր կլինի հետազոտել նորածիններին, հայտնաբերել լսողության խանգարումները, հասնել խնդրի լուծման:

Հայաստանում Ճապոնիայի արտակարգ և լիազոր դեսպան  Էյջի Տագուչին նշեց, որ իրենք մեծ կարևորություն են հատկացնում այն ծրագրերին, որոնք ուղղված են Հայաստանի սոցիալ-տնտեսական իրավիճակի բարելավմանը և զարգացմանը: Այս տարի Ճապոնիայի կառավարությունն արդեն հաստատել է վեց նոր ծրագիր: Դեսպանի խոսքով՝ Ճապոնիայի կառավարության առաջնահերթություններից է կրթության, ինչպես նաև առողջապահական ոլորտը:

ՀՀ ԱԺ նախագահ Արա Բաբլոյանը նշեց, որ առողջապահության մասին խոսելիս պետք է հստակ պատկերացնել՝ հիմնական նպատակը պետք է լինի բնակչության առողջության պահպանումը, հիվանդությունների կանխարգելումը, հաշմանդամության և մահացության կրճատումը: Ըստ ԱԺ նախագահի՝ իրականացվող այս ծրագիրը ճիշտ առողջապահության հիմքում է դրված: «Մենք լավ հիշում ենք այն բոլոր դժվարությունները և այն բոլոր տառապանքները, որ ունեին թե երեխաները, թե նրանց ծնողները, և թե հասարակությունն ու պետությունը, երբ լսողության բնածին խանգարումները հայտնաբերվում էին ուշ տարիքում, և նույնիսկ մեծ ներդրումները՝ պետբյուջեից հատկացվող, կամ ծնողների կողմից վճարվող, չէին կարողանում կոմպենսացնել այն կորուստը, որը կարելի էր չունենալ, եթե խնդիրը հայտնաբերվեր նորածնային և վաղ մանկական հասակում»,- ասաց նա: Բաբլոյանի խոսքով՝ համեմատելու դեպքում ակնհայտ կլինի տարբերությունը, որ կա այն երեխաների խոսքում, ում մոտ խնդիրը հայտնաբերվել է վաղ հասակում, և նրանց խոսքում, ում հինգ-վեց տարեկանում արհեստականորեն սովորեցրել են խոսել:

«Այսօր մենք հնարավորություն ունենք համատեղ ջանքերով բոլոր ծննդատները այս սարքավորումներով ապահովել: Բոլոր ծնված երեխաները կանցնեն այդ հետազոտությունը, և եթե նրանցից որևէ մեկը նման խնդիր ունի, իսկ մենք գիտենք, որ, ցավոք, կա երեխաների որոշակի տոկոս, որ ունեն լսողության բնածին խանգարումներ, նրանք ժամ առաջ հնարավորություն կունենան ստանալու այն բոլոր միջամտությունները, որոնք թույլ կտան լիարժեքորեն ինտեգրվել հասարակության մեջ և հետագայում ընդհանուր մանկապարտեզ, դպրոց, բարձրագույն ուսումնական հաստատություններ գնալ»,- ասաց նա:

ԱԺ նախագահը կրկնեց այն, ինչ ասել էր Ճապոնիայի դեսպանի հետ հանդիպմանը. «Այն, ինչ պիտակավորված է Made in Japan, մենք խնդիր չունենք»: ԱԺ նախագահը իբրև վիրաբույժ ընդգծեց՝ վիրաբույժի գործի արդյունքը երևում է շատ արագ. այսօր վիրահատում են, վաղը ցավը չկա, երկու օր հետո պացիենտը գնում է տուն, բոլորը երջանիկ են, բայց շեշտեց՝ իրենք բարձր են գնահատում այն գործընկերների ներդրումը, որի արդյունքը երևում է 10-20 տարի հետո, և դա անտրտունջ, հետևողական աշխատանքի արդյունք է:

«Հավատ» ՀԿ փոխնախագահ Թամարա Մանուկյանը նշեց, որ այս օժանդակությամբ իրենք հասնում են վաղուց սկսած աշխատանքների ցանկալի արդյունքին: Նրա խոսքով՝ թեպետ 21 ծննդատներում կարողանում են ստուգել նորածիններին, բայց դեռևս 23 ծննդատներ կան, որոնք դեռ ապահովված չեն այդ սարքերով, և այդ ծննդատների երեխաները դուրս են մնում հետազոտություներից: Մանուկյանը նշեց՝ վաղ հայտնաբերումը և վաղ միջամտությունը բերում է նրան, որ երեխաները լիարժեք խոսում են, սովորում, զարգանում: