Ձեր վստահելի աղբյուրը

«Որևէ մեկը չէր սպասում, որ այսպիսի բան տեղի կունենա, անհավանականն իրականացվել է, և ժողովուրդն ուրախ է այսօր, նայե՞լ եք ժողովրդի աչքերի մեջ, տեսե՞լ եք ինչքան երջանիկ են»,- այսօր խորհրդարանում իր ելույթի ժամանակ ասաց «Ելք» խմբակցության պատգամավոր Արտակ Զեյնալյանը։

«Նիկոլ Փաշինյանն ասում է, որ ժողովուրդը պետք է ձևավորի իր քաղաքական կամքն արտահայտող օրենսդիր մարմին, դրա համար այս օրենսդիր մարմինը պետք է ցրվի, և Նիկոլ Փաշինյանի առաքելությունը ժամանակավոր կառավարությունը  ղեկավարել, նախապատրաստել երկիրը, օրենքները՝ արտահերթ խորհրդարանական ընտրությունների համար։ Սա է նրա առաքելությունն այս ընտրությամբ»,- ասաց պատգամավորը։

Զեյնալյանը շեշտեց, որ մարդկանց ցասումն արդարացի է. «Եթե այսօր ընտրեն վարչապետ Նիկոլ Փաշինյանին, մենք այս էներգիան պահպանելու ենք, սա նյութական արժեք է, որևէ մեկը չի կարող մեր դեմ դուրս գալ, սա մարտական ոգի է, սա ստեղծագործ, արարող ուժ է։ Հորդորում եմ՝ քվեարկենք և լուծենք այս խնդիրը»։