Մերձավոր Արևելքում լարվածության հետևանքով Հայաստանը կարող է մարտահրավերների առաջ կանգնել
Մերձավորարևելյան տարածաշրջանում լարվածությունը ազդեցություն կթողնի նաև մեր տարածաշրջանի և մասնավորապես՝ Հայաստանի վրա: Մայիսի 11-ին լրագրողների հետ հանդիպմանը «Նորավանք» հիմնադրամի Քաղաքական հետազոտությունների կենտրոնի ղեկավար, ավագ փորձագետ Կարեն Վերանյանը նշեց, որ պատկերը շատ ավելի խորքային է, քան թվում է. թե Իրանը, թե Իսրայելը կարևոր նշանակություն ունեն մեր տարածաշրջանում: Նրա խոսքով՝ թեպետ Հայաստանն ուղղակի մասնակցություն չունի այդ գործընթացներում, այդուհանդերձ, դրանք անուղղակի թե ուղղակի իրենց ազդեցությունը թողնելու են տարածաշրջանի և Հայաստանի վրա՝ թե տնտեսության, թե անվտանգային հարցերի հետ կապված:
«Մենք մարտահրավերների առաջ կարող ենք կանգնել. Մերձավոր Արևելքը առաջին հերթին մեզ հետաքրքիր է անվտանգության, պաշտպանության տեսակետից, իսկ վերջին տարիներին կատարվողը լավատեսություն չի ներշնչում անվտանգության առումով: Հայության անվտանգության ապահովումը պետք է տեսնել մտավոր և մարդկային կապիտալի ներգրավման, մոբիլիցազման տեսքով»,- ասաց նա:
Վերանյանի խոսքով՝ կարևոր է հետևել այն գործընթացներին, որ տեղի են ունենում հայ-ադրբեջանական սահմանին, պետք չէ հերքել, որ զինտեխնիկայի ու զինուժի կուտակումներ են սահմանին, պետք է աչալուրջ լինել: Ըստ փորձագետի՝ հակառակորդն, ըստ էության, սահմանից հետ չի քաշվել: Նա կարևորեց Հայաստանի նորընտիր վարչապետը բարձրացրած՝ Արցախի հակամարտության գործընթացում բանակցային սեղանին արցախյան կողմի մասնակցության հարցը:
Վերանյանի գնահատմամբ՝ դա կբերի լիարժեք բանակցությունների, ինչը ողջունելի է, այն կարող է էապես փոխել բանակցային դինամիկան, այլ հարց է՝ որքանով կհաջողվի օրակարգ բերել մի հարց, որ վերջին տարիներին դուրս է մնացել: Փորձագետը նշեց, որ եռապատիկ-քառապատիկ պետք է կարողանալ ուժեղացնել մեր պաշտպանական ներուժը և մարդկային կապիտալը:
Ըստ փորձագետի՝ նույն խնդրի ռազմական-ուժային տարբերակն էլ կա, բայց դա ոչ ցանկալի սցենար է: Վերանյանը նշեց՝ ԼՂ խնդրի կարգավորման այն ձևաչափը, որ մինչ այժմ գործում էր, բավարարում էր համանախագահ երկրներին, իսկ Ադրբեջանին՝ առավել ևս, սակայն միանշանակ չէր բավարարում հայկական կողմին, ուստի հայամետ արդյունքներ ակնկալելու համար պետք է ուղղակի բանակցությունների սեղանին տեսնել արցախյան կողմին:
«Ադրբեջանը այն պետությունն է, որը շարունակելու է իր ագրեսիվ քաղաքականությունը թե արտաքին դիվանագիտության ոլորտում, թե ռազմական ագրեսիայի տեսանկյունից, չեմ կարծում, թե այս պահին խոշորամասշտաբ գործողություններ լինեն, սակայն հիշելով հայտարարությունը, որ Ադրբեջանը պատրաստ է աշխատել նոր իշխանության հետ, դա որոշակի հենք է տալիս՝ մտածելու, որ գործընթացը շարունակվի այն տրամաբանության շրջանակներում, որ եղել է մինչ օրս»,- ասաց նա:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը
