Ձեր վստահելի աղբյուրը

Ավանդույթի համաձայն, տարիներ հետո նույն օրը, նույն վայրում հավաքվել են այն ընկերներից շատերը, ովքեր, տալով հավատարմության երդում, տարիներ առաջ գինու շշի մեջ լցրել են իրենց անուններն ու ամփոփել սուրբ հողում:

«Արցախպրեսս»-ի փոխանցմամբ, այս միջոցառումը գնդապետ Գրիգորի Սահակյանի հրամանատարությամբ գործող զորամասում արդեն դարձել է բարի ավանդույթ և ունի իր հետաքրքիր պատմությունը:



«1993 թվականին, նախքան մարտական գործողությունների մեկնելը, ընկերներով որոշեցինք մեկս մյուսին հավատարմության երդում տալ, որ պատերազմի դաշտում մեր ընկերոջը անօգնական չենք թողնի ու ամեն գնով կպաշտպանենք մեր սուրբ հողը: Ապրիլի 13-ին պարապմունքներից հետո յոթ ընկերներով մեկ շիշ գինի վերցրեցինք ու զորամասի տարածքից դուրս խմեցինք, իսկ դատարկ շշի մեջ լցրեցինք թղթի վրա գրված մեր անունները և հանձնեցինք հողին, այն պայմանով, որ քսան տարի հետո նույն օրը մենք պետք է հավաքվենք, հանենք  շիշը և մեկս մյուսին շնորհավորենք ու հիշենք մեր անցած տարիները,- պատմել է գնդապետ Գ. Սահակյանը:

Նրա խոսքով, իրենց բախտ է վիճակվել 2013 թվականին բոլոր ընկերներով հավաքվել ու հանել շիշը:

«Այդ ժամանակ որոշեցինք, որ զորամասի զինծառայողներից, ըստ ցանկության, հավատարմության երդում տան, այն պայմանով, որ հինգ տարի հետո իրենք նույնպես կհավաքվեն ու կհանեն իրենց հավատարմության երդման խորհրդանիշ շիշը»,- պատմել է նա: 

Հինգ տարի անց, հավատարիմ մնալով իրենց խոստմանը, զորամասի նախկին զինծառայողները հավաքվել են  հիշելու և վերապրելու զինվորական կյանքի հետաքրքիր ու հիշարժան պահերը, և մեկ անգամ ևս հավատարմության, միասնության ու նվիրվածության երդում տալու, որ հինգ տարի հետո կրկին կհավաքվեն և կհանեն խորհրդանշական գինին:

«2013 թվականին, երբ մենք պետք է ավարտեինք ծառայությունը, գնդապետ Սահակյանը մեզ հրավիրեց ու ասաց, որ  այսպիսի ավանդույթ կա զորամասում:Հրամանատարը նշեց, որ ովքեր կապված են այս հողին, կարող են գալ և նույնպես հավատարմության երդում տալ: Զինակից իմ ընկերների հետ սիրով ընդունեցինք առաջարկը և ապրիլի 13-ին  մասնակցեցինք այստեղ կայացած հանդիսավոր միջոցառմանը:

Այդ օրը հանեցին քսան տարվա վաղեմության գինու շիշը, որտեղ գրված էր մեր հրամանատարի ու նրա ընկերների անունները և թաղեցինք նոր շիշ` իմ ու իմ ընկերների անուններով: Մենք հավատարմության երդում տվեցինք ու պայմանավորվեցինք, որ հինգ տարի հետո պետք է հավաքվենք այստեղ ու հանենք մեր անուններով ամփոփված գինու շիշը: Այսօր մեր խոստումն ի կատար ածվեց»,- հիշում է Հակոբ Իսրայելյանը:

Շարունակելով իրենց հրամանատարների ու ավագ ընկերների  հայրենանվեր առաքելությունն ու բարի ավանդույթները` զորամասի զինծառայողներից ութ ընկերներ որոշել են միանալ նախաձեռնությանն ու տալ հավատարմության ու միասնության երդում

: «Տեղեկանալով այս միջոցառման մասին` մենք ընկերներով որոշեցինք այսօր մասնակցել ու երդվել, որ միշտ միասին ենք լինելու և միասնական ու համախմբած պատրաստ ենք մշտապես պաշտպանել մեր  հայրենիքն ու հայ ժողովրդին: Այսօր մենք նույնպես խոստացանք, որ հինգ տարի հետո գալու ենք այստեղ և մեր հրամանատարների ու ընկերների ներկայությամբ հանենք մեր խորհրդանշական գինու շիշը»,-ասել է շարքային Սլավիկ Օխոյանը:

Իսկ զորամասի հոգևոր սպասավոր Վահե սարկավագ Մկրտչյանը միջոցառմանը ներկայացել է օրհնանքի խոսքով ու քաջառողջություն և հաջողություններ է մաղթել հայրենյաց պաշտպան բոլոր զինվորներին ու նրանց հրամանատարներին:

Զորամասում  ձևավորված և սերնդեսերունդ փոխանցվող  այս ավանդույթը խոսում է հայ զինվորի ոգու ու կամքի, նրա նվիրվածության ու վաղվա օրվա հանդեպ հավատքի մասին: Ինչպես Արցախյան պատերազմում, այնպես էլ այսօր հայ երիտասարդը ամուր է կառչած այս հողին և պատրաստ է կերտել նոր հաղթանակներ:

Լուսանկարները՝ «Արցախպրեսս»-ից: