Ձեր վստահելի աղբյուրը

ՀՀ ԳԱԱ Վիկտոր Համբարձումյանի անվան Բյուրականի աստղադիտարանի տնօրեն Արեգ Միքայելյանը Հայաստանի նոր կառավարությանն է դիմում նույն կոչով, որով հանդես է եկել նախորդ կառավարությունների ժամանակ, այն է՝ երկրի զարգացման գրավականը միանշանակ գիտության զարգացումն է: Մայիսի 21-ին լրագրողների հետ հանդիպմանը Միքայելյանը նշեց, որ դա ցույց է տալիս նաև աշխարհի փորձը:

«Այս կառավարությունը երևի ավելի առաջնահերթ խնդիրներ ունի՝ լուծելու, թեպետ դեռ հարց է՝ գիտության նկատմամբ վերաբերմունքը առաջնահերթ խնդիրների՞ց պիտի լինի, թե՞ պետք է սպասենք, ամեն դեպքում՝ սոցիալական բազմաթիվ հարցեր կան, որոնք առաջնակարգ են կարծես, դրանք լուծելուց հետո անմիջապես պետք է հասկանանք, որ գիտության զարգացումը կարևոր է»,- ասաց նա:

Միքայելյանի խոսքով՝ նոր կառավարությունից իր սպասելիքն է, որ գիտության նկատմամբ վերաբերմունքը կփոխվի, բյուջեից հատկացումները թեկուզ մի փոքր կավելանան: Նա ընդգծեց՝ գիտնականին մեծ, խոշոր չափերի ֆինանսավորում պետք չէ, բավական է փոքր խթան, խրախուսանք, և գիտնականը կարող է մեծ արտադրանք տալ:

Բանախոսը նշեց՝ գիտությունը լավ բիզնես է, եթե չկա թալան, խաբեություն, քանի որ այստեղ սահմանափակում չկա, կարելի է որոշակի գումար ներդնել, տասնապատիկ, անգամ հազարապատիկ ավել ստանալ: Միակ առանձնահատկությունն այն է, որ գործընթացը երկար է տևում:

«Գիտությունն առևտրի նման չէ՝ վճարեցիր ու ստացար արդյունքը, հուսով եմ՝ նաև գիտակցության փոփոխություն պիտի լինի»,- ասաց նա՝ տեղեկացնելով, որ իրենք նաև գիտական լրագրությունն են զարգացնում, ֆեյսբուքյան խումբ է ստեղծվել, և հավաքել են հետաքրքրվող լրագրողներին:

Հարցին՝ արդյոք փոփոխություններ են պետք նաև գիտական ինստիտուտներում, նա պատասխանեց, որ կուսակցականացված կամ քաղաքականացված լինելու դեպքեր չկան, դպրոցներում և բուհերում նման երևույթներ կային, բայց գիտական ինստիտուտներից որևէ մեկն իրեն հայտնի չէ: Միքայելյանն ասաց, որ ինքը երբեք որևէ կուսակցության անդամ չի եղել, ավելին՝ խորհրդային շրջանում ութ հոգով դեն են նետել կոմերիտմիության տոմսը, երբ դեռ չգիտեին էլ, որ միությունը պետք է քանդվի:

«Եթե կան վատ կազմակերպված հիմնարկներ, և կլինեն կարծում եմ, այնպես որ արժե դրանցով զբաղվել, գիտական կյանքը փոխվում է, տարիների ընթացքում պետք է դա վերանայել: Բազմաթիվ մասնագիտություններ կան, որ մեռնելու են ապագայում, ստիպողաբար հո չե՞նք պահելու: Օրինակ՝ հաշվապահի մասնագիտությունը, կարծում եմ, ապագայում չի լինելու, մեկ-երկու հոգու կպահեն, մնացած աշխատանքը համակարգիչը կանի, որովհետև մարդուն չեն էլ վստահի»,- ասաց նա:

Միքայելյանի խոսքով՝ մեր երկրում մասնագիտությունների բաշխումը երբեք մտածված չի եղել, ոչ ոք չի մտածում՝ քանի հատ այսինչ մասնագետից է մեզ պետք: Նա նշեց` հայտնի փաստ է, որ մեր երկրում մարդիկ իրենց տեղերում չեն, հույս հայտնեց, որ նոր ղեկավարությունը մարդկանց կկարողանա ապահովել աշխատանքով՝ ըստ իրենց մասնագիտության:

«Պետք չէ կենսաբանին տաքսու վարորդի աշխատանք գտնել: Աշխարհի ամենակազմակերպված երկրներում՝ Գերմանիայում, Ճապոնիայում, վերցրեք, մասնագետներին տեղերով խառնեք, միանգամից կփլուզվի տնտեսությունը»,- ասաց նա: