Ձեր վստահելի աղբյուրը

«Մարդու իրավունքների պաշտպանի լիազորությունների ընդլայնման անհրաժեշտություն կա»,- ԱԺ-ում «Մարդու իրավունքների պաշտպանի մասին» Հայաստանի Հանրապետության սահմանադրական օրենքում փոփոխություններ և լրացումներ կատարելու մասին օրենքի նախագծի քննարկման ժամանակ ասաց հիմնական զեկուցող արդարադատության նախարարի առաջին տեղակալ Արթուր Հովհաննիսյանը։

Նա նշեց, որ նոր օրենսդրական կարգավորումներով Մարդու իրավունքների պաշտպանի համար սահմանում են մշտադիտարկում մարմին լինելու լիազորություն՝ կապված հաշմանդամություն ունեցող անձանց հետ

«Նոր նախագծով ՄԻ պաշտպանը պետք է մշտադիտարկում իրականացնի, պարբերաբար այցելի այն վայրեր, որտեղ պահվում են հաշմանդամություն ունեցող անձինք, առաջարկներ ներկայացնի համապատասխան մարմիններին նրանց իրավունքների պաշտպանության մասով: Մեկ այլ դրույթով հնարավորություն է տրվում, որ զինծառայողների և ազատազրկված անձանց մերձավոր ազգականները դիմեն օմբուդսմենին՝ նրանց իրավունքների պաշտպանության հարցով, իսկ այսօր նման իրավունք իրենք չունեն: Իրենք նման գործառույթ կարող են իրականացնել, եթե այդ մարդկանց կողմից լիազորված են»,- ասաց նա:

Արդարադատության փոխնախարարը օրինակ ներկայացրեց, որ եթե զինծառայողը ցանկանում է, որ իր ազգականը դիմի ՄԻՊ-ին, պետք է լիազորագիր տա, ինչը երբեմն անհնար է: Փոխնախարարի կարծիքով՝ օրենսդրական նախաձեռնությամբ պարզեցվում է գործող ընթացակարգը. «Օրինակ, եթե զինծառայողը մարտական դիրքերում է և այնտեղից հեռախոսով իր հարազատներին տեղեկացնում է իր իրավունքների ոտնահարումների մասին, hիմա հարազատը կարող է գնալ ՄԻՊ գրասենյակ և հայտնել այդ մասին»։

«Ծառուկյան» խմբակցության պատգամավոր Սերգեյ Բագրատյանը զեկուցողից հետաքրքրվեց, թե եթե զինվորը չունի բարեկամներ կամ արտերկրից է եկել, և պաշտպանին ուղիղ դիմելու խնդիր ունեն, ի՞նչ մեխանիզմ կա, որպեսզի նրանք կարողանան ուղիղ դիմել։

«Այն, որ անձը ինքնուրույն կարող է դիմել, նախատեսված է։ Այստեղ հարցը նրա մասին է, որ այդ անձը ինքնուրույն, ինչ-ինչ հանգամանքներով չկարողանա դիմել, այս դեպքում է, որ մենք հնարավորություն ենք տալիս, որ նա հարազատների միջոցով դիմի»,- պատասխանեց փոխնախարարը։

Պատգամավորն արձագանքեց. «Մենք պետք է ատեղծենք պայման, որ զինծառայողը կարողանա ինքնուրույն ՄԻՊ դիմել»։

Այնուհետև իր ելույթում ՀՀԿ խմբակցության պատգամավոր Ռուստամ Մախմուդյանը նշեց, որ պաշտպանի աշխատակազմն ունի թեժ գիծ՝ 1-16 անվճար հեռախոսահամար, և այն զինվորը, որի իրավունքները ենթադրաբար խախտվել են, կարող է զանգահարել այդ համարով:

Սերգեյ Բագրատյանն էլ արձագանքեց. «1-16 թեժ գծի մասին ես առաջին անգամ եմ լսում, և ենթադրում եմ, որ դրա մասին չգիտեր նաև որևէ զինվոր։ Բոլոր զորամասերի մուտքի դռների վրա շատ մեծ տառերով գրվի այդ հեռախոսահամարը և այնպես պետք է անել, որ այն անխափան աշխատի, ոչ թե 15 անգամ փորձեն զանգել ու անհասանելի լինի»։