Ատոմակայանի աշխատակիցների աշխատավարձերի բարձրացման հարցը կքննարկեն նորանշանակ նախարարի հետ
«Ատոմակայանի աշխատակիցների աշխատավարձը Հայաստանի պայմաններում կարելի է բարձր համարել, բայց համեմատելով այլ երկրների ատոմակայանների հետ, իհարկե, շատ ցածր է»,- այս մասին այսօր լրագրողների հետ ճեպազրույցում ասաց Հայկական ատոմային էլեկտրակայանի գլխավոր տնօրեն Մովսես Վարդանյանը՝ պատասխանելով հարցին, թե ատոմակայանի աշխատակիցները պարբերաբար աշխատավարձերը բարձրացնելու հարց են հնչեցնում, արդյոք նոր կառավարության հետ նման հարց քննարկվե՞լ է:
Մովսես Վարդանյանը հաստատեց, որ աշխատակիցները պարբերաբար բարձրացնում են աշխատավարձերի հարցը, երկու ամիս առաջ նույնպես նման խնդիր եղել է:
Ըստ նրա՝ այսօր ատոմակայանում շրջայցի եկած էներգետիկ ենթակառուցվածքների և բնական պաշարների նախարար Արթուր Գրիգորյանի հետ կքննարկեն աշխատավարձերի հարցը:
Մովսես Վարդանյանն ասաց, որ ներկայումս ատոմակայանում կա 1812 աշխատող, միջին աշխատավարձը 300 հազար դրամ է։
Տնօրենը նաև խոսեց ՀԱԷԿ-ի շահագործման ժամկետի երկարաձգման աշխատանքներից՝ նշելով, որ վերանորոգումը կիրականացվի Ռուսաստանի տրամադրած 300 մլն դոլարի վարկով:
«300 մլն դոլարից 270-ը վարկ է, իսկ 30 մլն-ը՝ օժանդակություն: Իհարկե, ատոմակայանն էլ իր միջոցների հաշվին որոշակի ծախսեր անում է»,- ասաց Մովսես Վարդանյանը:
Հարակից հրապարակումներ`
- Իրանական գազը սահմանին ավելի թանկ է, քան ռուսական գազը. Արթուր Գրիգորյան
- ՀԱԷԿ-ի վերանորոգումն ազդեցություն չի ունենա էլեկտրաէներգիայի սակագնի վրա. նախարար
- «Այս պահին չկա անհրաժեշտություն նոր ատոմակայան կառուցելու համար»