Ունենք բարիերներ Հայաստանի և Սփյուռքի մեջ, դրանք պետք է վերացնենք. Արմեն Սարգսյան
«Ես անձամբ հիմնադրամին անձնապես ներդրում չեմ արել, բայց մեր ընտանիքը ունի բազմաթիվ բարեգործական ծրագրեր, որոնք անում ենք մենք և եկեղեցու հետ, և ուղղակի»,- այս մասին այսօր «Հայաստան» համահայկական հիմնադրամի հոգաբարձուների խորհրդի և տեղական մարմինների 27-րդ համատեղ նիստի ընթացքում լրագրողների հետ ճեպազրույցում ասաց ՀՀ նախագահ Արմեն Սարգսյանը՝ պատախանելով հարցին՝ թե արդյոք ինքը հիմնադրամին ներդրում արե՞լ է , թե՞ ոչ:
Որպես օրինակ նախագահը ներկայացրեց Էջմիածնի մկրտարանը, որը կառուցել է իր ընտանիքը: «Երկար տարիներ Լոնդոնում գոյություն ուներ բարեգործական կազմակերպություն, որի նպատակն էր օգնել երիտասարդներին՝ դրսում կրթություն ստանալ։ Մեր ընտանիքն է նախաձեռնել նաև «Երևան իմ սեր» ծրագիրը»։
Ինչ վերաբերում է «Հայաստան» համահայկական հիմնադրամին, Արմեն Սարգսյանն ասաց. «Կա հիմնադրամ, որը համազգային կառույց է, և կան առանձին անհատներ, բազմաթիվ առանձին աշխատող հիմնադրամներ, և եկել է ժամանակը, որպեսզի համահայկական հիմնադրամը և մյուս հիմնադրամները սկսեն համագործակցել և համադրել արվող ծրագրերը»:
Անդրադառնալով սփյուռքը որպես փողի աղբյուր դիտարկելու խնդրին, նախագահն ասաց, որ ինքը ևս ունի այդ մտահոգությունը։
«Համազգային շարժում այսօր կա և հիմա հարց է ծագում, թե սփյուռքը իսկապես նրա համար է, որ դրսից գումար ուղարկի և որևէ իրավունքներ չունենա՞, կամ մասնակցություն չունենա՞, ես կարծում եմ, որ դա բացարձակապես սխալ է: Մեր ցանկացած հայրենակից, նախևառաջ նրանք, ովքեր այսօր սփյուռքում են, բայց կրում են ՀՀ անձնագիրը, այսինքն ՀՀ քաղաքացի են, պետք է իրենց ներդրումը բերեն և իհարկե ունենան պարտականություններ, իրավունքներ: Գուցե մեկ օր հասնենք նրան, որ Սփյուռքում ապրող ՀՀ քաղաքացիները ունենան իրավունք ընտրությանը մասնակցելու: Եթե խոսում ենք ընտրական համակարգի մասին, ընտրական օրենքը փոխելու մասին, արդյոք միայն նրանք պետք է ընտրեն, ովքեր ՀՀ-ում են ապրում, թե նրանք բոլորը, ովքեր ՀՀ քաղաքացու անձնագիր ունեն»,- մանրամասնեց Արմեն Սարգսյանը:
Մեկ այլ հարցի, թե սփյուռքում նկատում է վերջին տարիներին հիասթափություն, որը պայմանավորված էր նաև իշխանության գործունեության հետ, նախագահը պատասխանեց, որ նկատում է հիասթափություն, ջղայնություն, բայց նաև տեսնում է հսկայական սեր։
«Այսօր հենց մեր նպատակներից մեկը պետք է լինի, որքան հնարավոր է ճիշտ, ազնիվ, բաց ձևով ներգրավել Սփյուռքին՝ չասել ձեր խնդիրը փողը տալու մեջ է և փողը տվեցիք, էլ մի խանվեք մեր գործերին։ Պետք է առիթ տալ նրանց մասնակցելու։ Օրինակ, եթե այսօր ազգային հերոս Շառլ Անզավուրը ցանկանար դառնալ ՀՀ նախագահ, պետք է վեց տարի Հայաստանում ապրեր, նույնը կամ որևէ սփյուռքահայ երիտասարդ չի կարող գալ և դառնալ ԱԺ նախագահ, քանի որ պետք է չորս տարի ապրեր Հայաստանում։ Մենք ունենք բարիերներ Հայաստանի և Սփյուռքի մեջ, դրանք շատ են՝ հոգեբանական, իրական, իրավական, այդ բարիերները պետք է վերացնենք և քանի դեռ չենք վերացրել նորից մնալու ենք սփյուռքահայ, որի խնդիրը այն է, որ օգնի, տա և իրավունքներ չունենա և Հայաստանցին, որը պետք է ստանա և պահանջի՝ տվեք, տվեք, տվեք»,-ասաց նախագահը։
Արմեն Սարգսյանը կոչ արեց մտածել որպես մեկ ազգ և չբաժանել հայաստանցի, սփյուռքահայի, արցախցի:
Լրահոս
Տեսանյութեր
Բագրատ Սրբազան. Ուրախ եմ, որ իմ կոչով դուրս են եկել փողոց ոստիկանները
