Ձեր վստահելի աղբյուրը

«Քաղաքական հարաբերությունները ժամանակավոր են, մարդկային հարաբերությունները՝ մնայուն»,- այսօր ԱԺ ամբիոնից այս խոսքերը հնչեցրեց Հանրապետական խմբակցության ղեկավար Վահրամ Բաղդասարյանը՝ գործընկերներին խորհուրդ տալով միմյանց հարգանքով վերաբերվել։

Վահրամ Բաղդասարյանն ընդգծեց, որ իրենք կողմնակից են Ընտրական օրենսգրքի վերանայմանը։

«Վարչապետ Փաշինյանի առաջարակին, որ պետք է ստեղծվի կառավարության հանձնախումբ, մենք կողմնակից ենք դրան։ Սակայն բոլորիս հայտնի է, որ օրենքների մշակման դարբնոցն ԱԺ-ն է, և մեր կարծիքով՝ ԱԺ-ում ներկայացված չորս քաղաքական ուժ-երը պետք է գան համաձայնության և մշակեն ֆորմատ ու համաձայնության դաշտում սկսեն քննարկումներն ԸՕ բարեփոխումների նպատակով։ Սրանից հետո որոշում պետք է կայացվի, որ նույն ֆորմատով ձևավորված կառավարության հանձնախումբը նույնպես պետք է միանա և արդնե մշակեն ճանապարհային քարտեզ՝ արդեն հետագա քննարկումների համար»,- ասաց ՀՀԿ-ական պատգամավորը։

Ամդրադառնալով կառավարության ծրագրին՝ Բաղդասարյանն ասաց, որ այն ըստ էության պայմանագիր է կառավարության, ԱԺ և ժողովրդի միջև, հետևաբար այն պետք է պարունակի ոչ միայն նպատակներ, այլ դրանց հասնելու ճանապարհները, եղանակները, քայլերի հաջորդականությունը։

«Ներկայացված ծրագիրը ոչ միայն չի պարունակում որևէ ցուցանիշ, այլև միանգամայն ակնհայտ ներկայացնում է, որ կառավարությունը չի տիրապետում երկրի սոցիալ-տնտեսական ոլորտում իրերի իրական վիճակին։ Ցուցանիշների բացակայությունը, հետևաբար ակնկալվող արդյունքի բացակայությունը հիմք է եզրակացնելու, որ կառավարությունը խուսափում է պատասխանատվություն ստանձնելուց»,- նշեց պատգամավորը։

Նրա խոսքով՝ կառավարության ծրագիրը կազմված է անորոշ հայտարարություններից ու պոպուլիստական ձևակերպումներից։