Ձեր վստահելի աղբյուրը

Տեղեկատվությունն այսօր աշխարհը հեղեղում է արագ տեմպերով։ Հունիսի 9-ին Aurora Dialogues երևանյան երրորդ համաժողովի ժամանակ այս մասին նշեց Refugees Deeply մեդիանախագծի հիմնադիր խմբագիր Պրեեթի Նալլուն՝ նշելով, որ հաճախ, փորձելով խրթին շարադրանքները դյուրամարս դարձնել, ստեղծում են սև-սպիտակ շարադրանք, որը չի օգնում շատերին՝ վերականգնվել։

Նրա խոսքով՝ ժամանակակից լրագրությունը թեպետ առավել լայն է, ընդգրկուն, սակայն խորը չէ։ Նա անդրադարձավ փախստականների խնդրին, նշեց, որ սահմանը հատելիս մարդիկ փորձում են մշակույթով իրենց նման տեղ գնալ: Այստեղ ցավալի է այն, որ շատ հատվածներ, խմբեր կան, որ օգուտ են քաղում այդ իրավիճակից՝ վրաններ, փախստականների սնունդ և այլն տրամադրելով։

Նալլուն նշեց՝ պետք է կուռ կապ լինի մտահոգ շրջանակների միջև, և նրանց թվում են նաև լրատվամիջոցները, որպեսզի դառնան այն խումբը, ովքեր տիրություն կանեն այս պրոցեսին: 

Մեքսիկայի նախկին նախագահ Էռնեստո Սեդիլյոյի կարծիքով՝ քաղաքական գործիչները հենց խնդրի մաս են կազմում, ուստի նաև լուծման մաս պետք է կազմեն: «Գեբելսը ասել է՝ սուտը այնքան ես կրկնում, մինչև դառնում է ճշմարտություն: Այն, ինչ մենք լսել ենք, այն է, որ առևտուրը վատ է, միգրացիան վատ է, չինացիները սպառնալիք են. միշտ մեղքը բարդում ես ուրիշի վրա՝ ցանկացած վատ բանի համար, որ տեղի է ունենում աշխարհում: Երկու տեսակ մարդ կա, մարդիկ, որ լսում-լսում են ու հավատում, ու կան նաև մարդիկ, որ ունեն որոշակի արժեքներ, մոտեցումներ, բայց մնում են իրենց խորդանոցում, չեն ուզում քաղաքականապես իրենց չընդունված կարծիքները դուրս հանել»,- ասաց նա՝ հավելելով, որ հիմա նրանք, ովքեր հավատացել են, դուրս են գալիս ու դառնում սատարող։

Սեդիլյոն նշեց, որ պետք է քննարկել, թե ինչ նկատի ունեն ԶԼՄ ասելով՝ մեր օրերում, քանի որ նախկինում հեռուստատեսություն ու թերթ էին նկատի ունենալով, իսկ հիմա աշխարհը շատ ավելի բարդ ու խրթին է: Նա պատմեց իր առավոտյան ընթերցանության մասին, ասաց, որ հոդված է կարդացել այսօր, որը սկզբում իրեն հետաքրքրել է, որովհետև էվոլյուցիոն տեսության կրիտիկական զանգվածի գաղափարն էր։ Սեդիլյոն ասաց, որ սկզբում խանդավառությամբ էր ընթերցում. հոդվածում նշված էր, որ փոքրամասնության խումբը, հասնելով կրիտիկական զանգվածին, կարող է շրջադարձի բերել հաստատված վարքագծերը, ոգևորված շարունակել կարդալ, ու հանկարծ հիշել է 2011 թիվը, երբ մարդիկ ֆեյսբուքով ու թվիթերով խանդավառված էին, իսկ ինքը շատ թերահավատ էր՝ թերևս տարիքի բերումով։

«Ինչևէ, դու կարող ես ողջ հասարակությունը շարժել դեպի նոր կարգ. պոպուլիստները, նացիոնալիստները, այլատյացները հենց դրանով են զբաղված, նրանք օգտվում են հենց այսօրինակ վերլուծության արդյունքներից ու հասնում են այն կետին, որ կարող են վճռական տրամադրված կրիտիկական զանգված հավաքել: Սա ինձ համար ցնցող էր՝ հասկանալ, որ 18 ամիս ԱՄՆ-ում անհավատալի բաներ տեղի ունենալուց հետո դեռ տեսնում ենք օժանդակության որոշակի մակարդակ Թրամփին, որը մոտենում է այս կրիտիկական զանգվածին, բայց թերևս դա աղետ կլինի այս երկրի, նաև՝ մարդկության համար»,- ասաց նա:

Սեդիլյոյի խոսքով՝ պետք է դադարել միամիտ լինել, հասկանալ՝ այն ուժերը, որ մարդկությանը ցանկանում են մղել հետդարձի, ռազմավարություն ունեն, իսկ իրենք չունեն։ Նա ասաց, որ պետք է ձևակերպել հստակ խնդիրներ և վճռականորեն այդ խնդիրներին ուղղել առկա նվիրումը։ «Եկեք հալած յուղի տեղ չընդունենք մեր ընդհանուր արժեքները, մարդիկ պետք է հասկանան, ընդունեն փաստերը, ոչ թե կեղծ լուրերը, պետք է կոնկրետ խնդիրներ ձևակերպենք, որոնք կբերեն փոփոխության, և գործենք»,- նշեց բանախոսը: