Առաջին իսկ օրվանից եղել եմ և լինելու եմ յուրաքանչյուր արմավիրցու կողքին. Գագիկ Միրիջանյան
Արմավիրի մարզպետ Գագիկ Միրիջանյանն ամենաշատ բնակչություն ունեցող մարզ գնացել է աշխատելու վճռականությամբ:
Panorama.am-ի թղթակցի հետո զրույցում մարզպետն ասաց, որ իր գիտելիքներն ու փորձն ի նպաստ է դնելու մարզի զարգացմանը. «Առաջին իսկ օրվանից տրամադրված եմ շատ լավ, ամեն ինչ պետք է անեմ, որ մարզում դրական փոփոխություններ լինեն: Իսկ դրա համար պետք է քրտնաջան աշխատել, լինել մարզի ցանկացած բնակչի կողքին, որպեսզի ունենանք այն արդյունքը, որն ակնկալում ենք»:
Մարզպետի խոսքով՝ Բաղրամյանի տարածաշրջանի համայնքներում արդեն ավարտել է ճանաչողական այցերը, հուլիսի 2-ից կայցելի Վաղարշապատի տարածաշրջանի համայնքներ՝ ծանոթանալու առկա խնդիրներին, բնակչության մտահոգություններին:
«Բոլոր համայնքներն այցելելուց հետո կսկսենք որոնել համայնքներում առկա խնդիրների լուծման հնարավոր ուղիները»,- նշեց Գագիկ Միրիջանյանը:
Մասնագիտությամբ բժիշկ, կառավարման ոլորտում աշխատանքային բավականին մեծ փորձ ունեցող մարզպետն արդեն առանձնացրել է գլոբալ խնդիրները, որոնց ուղղությամբ պետք է լուրջ աշխատանքներ տարվեն: Համայնքներում առկա խնդիրներից առաջինը վերաբերում է խմելու և ոռոգման ջրին, ոռոգման համակարգերի արդիականացմանը,ճանապարհաշինությանը, գազիֆիկացմանն ու հակակարկտային կայանների տեղադրման:
Մարզպետի համար զարմանալի է այն, որ գյուղատնտեսական ուղղվածության Արմավիրի մարզում ջրի խնդիրը տարիներ շարունակ չի լուծվել. «Ինձ համար բավականին զարմանալի է, որ այդ խնդիրները մինչ օրս լուծված չեն: Պետք է ահռելի ծավալի աշխատանք կատարել: Ժամկետներ չեմ կարող նշել, բայց օր առաջ պետք է ջրի հարցը լուծել»:
Ինչ վերաբերում է գազիֆիկացմանը, Գագիկ Միրիջանյանը նշեց, որ մարզում կան համայնքներ, որոնք դեռևս գազ չունեն, մինչդեռ Լոռու, Տավուշի մարզերի հեռավոր գյուղերը, որտեղ փայտի խնդիր չկա, գազիֆիկացված են, իսկ Արմավիրի մարզը, որը մոտ է մայրաքաղաքին և անտառներ չունի, ունի չգազիֆիկացված համայնքներ:
Հաջորդը կարևոր խնդիրը համարում է հակակարկտային կայանների տեղադրումը, ինչպես նաև սխալ վայրում տեղակայված կայանների հարցի լուծումը: «Ենթադրում ենք , որ դրանք առանց հաշվարկելու տեղադրվել են, հիմա այդ հարցը վերլուծում ենք ԱԻՆ-ի հետ և մասամբ իրենք էլ են համաձայն այդ կարծիքի հետ: Հիմա ռազմավարություն ենք մշակում»,- ասաց մարզպետը:
Գագիկ Միրիջանյանն անդրադարձավ բերքի մթերման ու իրացման խնդիրներին՝ նշելով, որ թեև այս պահին իրացման խնդիրներ չկան, այդուհանդերձ այս ուղղությամբ հետևողական աշխատանք պետք է տարվի:
«Ծիրանի իրացումը գրեթե ավարտվել է, գինը տատանվել է 180-300 դրամի սահմաններում: Շատ կարևոր է, որ ծիրանի մթերման հետ կապված խնդիրներ այս պահին չունենք: Մարզում գործող 9 վերամշակող ընկերությունների ղեկավարների հետ հանդիպել եմ, քննարկել ենք մթերման հարցերը: Դրանք մշտապես լինելու են մեր ուշադրության կենտրոնում: Ինչպես արդեն նշեցի՝ առաջին իսկ օրվանից եղել եմ և լինելու եմ յուրաքանչյուր արմավիրցու կողքին, կարծում եմ, որ համատեղ կկարողանանք զարգացնել մարզը, լուծել բնակիչների սոցիալական խնդիրները»,- ասաց Գագիկ Միրիջանյանը: