Ձեր վստահելի աղբյուրը

Հայազգի աշխարհահռչակ ֆիզիկոս, ֆիզմաթ գիտությունների դոկտոր, պրոֆեսոր, ՌԳԱ ակադեմիկոս Յուրի Հովհաննիսյանը Հայաստանում է։ Այսօր նա «ՀայՓոստ» ՓԲԸ-ի Նոր տեխնոլոգիաների զարգացման և ուսուցման կենտրոնում մասնակցեց իրեն նվիրված Հատուկ ծրարի մարման արարողությանը։

Հատուկ ծրարն իրենից ներկայացնում է յուրահատուկ ֆիլատելիստական արտադրանք՝ թեմատիկ ծրար, որը մարվում է Հատուկ դրոշմակնիքով։ Այն պատրաստվել է 500 հատ տպաքանակով, դիզայնի հեղինակն է «Հայփոստ»-ի դիզայներ Վահագն Մկրտչյանը։

Ծրարի վրա պատկերված է Մենդելեևի պարբերական աղյուսակը համալրող նոր՝ 118-րդ քիմիական տարրը, որը 2006 թվականին հայտնաբերվել է Յուրի Հովհաննիսյանի կողմից և 2016 թվականին անվանվել oganesson (Оg)։

Հատուկ ծրարի վրա փակցված է 2017  թվականի դեկտեմբերի 28-ին «ՀայՓոստ» ՓԲԸ-ի կողմից շրջանառության մեջ «Յուրի Հովհաննիսյան» թեմային նվիրված նամականիշը։

Նշենք, որ օրերս ՀՀ նախագահ Արմեն Սարգսյանը Յուրի Հովհաննիսյանին ՀՀ քաղաքացիություն է շնորհել։ Մարման արարողությունից հետո Panorama.am-ը գիտնականից հետաքրքրվեց, թե հնարավոր է քաղաքացիություն ստանալուց հետո որոշի մշտական բնակվել Հայաստանում, ինչն ի պատասխան ասաց. «Ես միշտ գնում գալիս եմ, հիմա այդքան էլ մեծ նշանակություն չունի, թե որտեղ է մարդը ապրում, կարևորն այն է, որ նա մաքսիմումը տա, ինձ թումա մեր՝ հայերիցս շատերը, որոնք որ Հայաստանից դուրս են, կարող են ավելի շատ օգուտ տալ, քան այստեղ նստելով։ Այստեղ նստող շատ կա, աշխատող չկա»։