Ձեր վստահելի աղբյուրը

Առաջին՝ G1 մակարդակի մագնիսական փոթորիկը վաղը կծածկի Երկիրը: Այն կսկսվի Երևանի ժամանակով ժամը 7:00-ին և կշարունակվի մինչև կեսօր:

Ռիա նովոստիի հաղորդմամբ, գիտնականները նշել են, որ նման փոթորիկները կարող են ազդել տիեզերանավերի կառավարման համակարգերի վրա:

Նախորդ մագնիսական փոթորիկները գրանցվել են հունիսի 28-ին, 2-ին, մայիսի 6-ին և 7-ին, իսկ այս տարվա ամենահզորը՝ ապրիլին:

«Արմենիա» ԲԿ-ի պաշտոնական կայքում  ներկայացված հարցազրույցում,  պատասխանելով հարցին, թե նման փոթորիկները ինչպիսի՞ առողջական հետևանք կարող են թողնել մարդու կյանքում, փսիխոսոմատիկ բաժանմունքի վարիչ հոգեբույժ Գայանե Մարգարյանն ասել է. «Կան մարդիկ, ովքեր շատ զգայուն են այս ամենի նկատմամբ և  ունեն մետեոկախվածություն: Բնակչության 50-60 տոկոսն ունի մետեոկախվածություն: Այդ օրերին նման մարդկանց մոտ առաջանում է ինքնազգացողության խիստ անկում՝ գլխացավ, գլխապտույտ, հոդացավ, տրամադրության անկում, զարկերակային ճնշման փոփոխություն, սրտխփոց, քնի խանգարում՝ քնկոտություն կամ քնել չկարողանալու վարքագիծ է դրսեւորվում: Այս գանգատներն ունեն իրենց բացատրությունը: Օրգանիզմում խիստ նվազում է մելատոնինի արտադրությունը, որը պատասխանատու է իմունիտետի և բիոռիթմերի համար: Այդ օրերին օրգանիզմի արյան հոսքը դանդաղում է, արդյունքում գլխուղեղի թթվածնի մատակարարումը նվազում է, որի հետեւանքով առաջանում է առողջական խնդիր, հոգեբանական անկում եւ անկայուն էմոցիոնալ դաշտ»։ 

Հարցին, թե Հայաստանի աշխարհագրական դիրքն ու եղանակային պայմանները գեոմագնիսկան փոթորիկների նկատմամբ ի՞նչ առավելություն ունեն, նա ասել է.  «Կա կարծիք, որ հյուսիսային կողմի՝ առավել ցուրտ շրջանի երկրներում, մագնիսական փոթորիկների ռիսկն առավել մեծ է: Գոնե այս հարցում շահեկան դիրքում ենք»: