Երկիրը գտնվում է ջրբաժան հանգրվանում. Րաֆֆի Հովհաննիսյան
«Երկիրը գտնվում է ջրբաժան հանգրվանում, և այսօր ավելի քան երբևէ ակնհայտ է, որ ամեն հաղթանակ ունի ժառանգություն։ Մեր հաղթանակը եղել է երկարատև գործընթաց՝ քաղաքացիական շարժումներ, քաղաքական պայքար, «Էլեկտրիկ Երևան», «Սասնա ծռեր», տրանսպորտային, բնապահպանական շարժումներ և այլն»,- այսօր տեղի ունեցած մամուլի ասուլիսի ժամանակ ասաց «Ժառանգություն» կուսակցության նախագահ Րաֆֆի Հովհաննիսյանը։
«Այսօր մի քանի ժամից մեր կուսակցության վարչությունը կհրավիրի լիագումար նիստ, որի ընթացքում մենք կորոշենք Երևանի ավագանու ցուցակի հորիզոնականները։ Մինչև այսօր հույս ունեինք, որ միասնական ցուցակի մեր առաջարկն իրականություն կդառնար, սակայն ավաղ սխալ մոտեցում եղավ։ Գոնե այս ընտրություններում հեղափոխության միասնական ցուցակը պետք է վերածվի միջկուսակցության մրցակցության տարբեր ցուցակների։ Մենք ակնկալում ենք ազատ և արդար ընտրություններ, որտեղ կբացառվեն բոլոր արատավոր երևույթները, որոնք տեղի են ունեցել վերջին 20-23 տարիների ընթացքում»,- ասաց բանախոսը։
Րաֆֆի Հովհաննիսյանի խոսքով, «Ժառանգություն» կուսակցությունն անելու է ամեն բան, որպեսզի տակավին անկատար ազգային հեղափոխությունն ամբողջանա։