Ձեր վստահելի աղբյուրը

«Հուլիս ամսին գրանցվել է 11 տոկոս տնտեսական աճ, ճյուղերի մեծ մասն աճ է գրանցել, սակայն զգալի խնդիրներ կան շինարարության ոլորտում։ Գյուղատնտեսության ոլորտը մի փոքր առաջ է անցել լավ եղանակի պատճառով։ Շատ մեծ՝ մոտավորապես 22 տոկոս աճ է գրանցվել ծառայությունների ոլորտում, վերականգնվում են առևտուրն ու արդյունաբերությունը»,- այսօր տեղի ունեցած մամուլի ասուլիսի ժամանակ ասաց  Կովկասի ինստիտուտի գիտաշխատող Հրանտ Միքայելյանը:

«Ինչ վերաբերում է կառավարության քաղաքականությանը, ապա ակնհայտ է, որ նույնիսկ եթե խոշոր բիզնեսները տուգանվում են, դրանք չեն փակվում, ճնշումներն այնպիսին չեն, որ ընկերությունները փակվեն։ Սա շատ կարևոր է տնտեսության համար»,- ասաց նա։

Panorama.am-ի թղթակցի ճշգրտող հարցին՝ կառավարությունն այդքան բարի՞ է, որ խոշոր բիզնեսներին լավություն է անում՝ «բավարարելով» միայն տուգանքներով, Հրանտ Մելիքյանը պատասխանեց. «Կային մոտեցումներ, որ ոչ միայն դոմինանտ ընկերություններին տրված հնարավորությունները պետք է չեղարկվեին, այլ նաև բիզնեսները։ Այդպիսի կարծիք կար, և այն, որ կառավարությունը նման քայլի չդիմեց, ես դա գնահատում եմ դրական։ Լավ է, որ այդ ընկերությունները շարունակեցին աշխատել։ Իրականում, այո, կառավարությունը լավություն արեց նրանց, որ չփակեց»։

«Այն տրամադրությունները, որ կան հասարակության մեջ, ավելի շատ պահանջում էին, որ բիզնեսների նկատմամբ մեծ ճնշումներ լինեն։ Իսկ կառավարության մոտեցումն այն է, որ նույնիսկ եթե բիզնեսը տուգանվում է, տուգանվի չափավոր, որպեսզի չփակվի։ Կառավարությունը, փաստորեն, չգնաց կտրուկ գործողությունների,  որոնք պահանջում էին շատերտը»,- նշեց բանախոսը։ 

Հարցին՝ ինչ է նշանակում վարչապետի մատնանշած ինկլյուզիվ տնտեսության աճը, Հրանտ Միքայելյանը նշեց, որ ինկլուզիվ աճի միտքը շատ լավն է, սակայն իրականացնելը դժվար։ Մասնավորապես, շատ հաճախ այնպես է լինում, որ միջոցները կուտակվում են մի քանիսի ձեռքում։

«Եկամուտները պետք է վերաբաշխվեն այնպես, որ դա մի կողմից չխանգարի շուկայական տնտեսությանը, մյուս կողմից՝ որպեսզի ապահովեն բնակչության շատ թե քիչ նորմալ եկամուտները։ Եթե ուզում ենք ինկլյուզիվ աճը տեսնել, պետք է աշխատավարձերն ավելի արագ աճեն, քան տնտեսությունը։ Սա, իհարկե, դժվար է պատկերացնել։ Ինկլուզիվ աճի համար պետք է նաև, որ զբաղվածությունն աճի, գործազրկությունը՝ կրճատվի»,- նշեց բանախոսը։

Անդրադառնալով պարտադիր կենսաթոշակային համակարգին՝ Հրանտ Միքայելյանն ընդգծեց՝ այս համակարգը զարգացող պետությունների համար այնքան էլ բարենպաստ չէ։

Ինչ վերաբերում է հեղափոխությունից հետո օտարերկրյա ներդրումների ծավալների ավելացմանը, բանախոսը նկատեց, որ թեև կոնկրետ տվյալներ չունի, սակայն ակնհայտ է, որ վիճակն էականորեն կլավանա նոր կազմով խորհրդարան ունենալուց հետո։