Ձեր վստահելի աղբյուրը

ՀՀ  կառավարությունը նախաձեռնել է Հարկային օրենսգրքի փոփոխությունների գործընթաց: Դեռ  օրեր առաջ վարչապետ Նիկոլ Փաշինյանը հայտարարել է, որ Հարկային օրենսգրքում փոփոխություններ են նախատեսվում, ինչի արդյունքում նվազելու է եկամտային հարկը:

Պետական եկամուտների կոմիտեի նախագահ Դավիթ Անանյանն էլ լրագրողների հետ զրույցում ասել էր, որ եկամտային հարկի նվազեցման տարբեր սցենարներ են քննարկվում:

Նշենք, որ եկամտահարկի նոր դրույքաչափերը ուժի մեջ են մտել 2018 թվականի հունվարի 1-ից: Դրանից  առաջ ամսական մինչև 120 հազար դրամ աշխատավարձի դեպքում եկամտային հարկը կազմում էր 24.4 տոկոս, 120 հազարից մինչև 2 միլիոնի դեպքում՝ 26 տոկոս: Տարեսկզբից  ուժի մեջ մտած եկամտահարկի նոր դրույքաչափերի համաձայն՝ 120 հազարի շեմը բարձրացվել է 150 հազարի, արդյունքում մինչև 150 հազար ստացողները վճարում են 23 տոկոս եկամտային հարկ, 150 հազարից մինչև 2 միլիոն ստացողների եկամտահարկը 26 տոկոսից դարձել է  28 տոկոսի, իսկ ամսական 2 միլիոն դրամից բարձր աշխատավարձ ստացողների դեպքում եկամտահարկը մնաց նույնը՝ 36 տոկոս:

Նշենք, որ դրանից  հետո էլ նախկին կառավարությունը նախատեսում էր վերանայել  եկամտահարկի դրույքաչափերը վերանայել:

Panorama. am-ը տնտեսագետ Ատոմ Մարգարյանից հետաքրքրվեց, թե ինչի՞ հաշվին է նվազելու եկամտային հարկը, և ինչպե՞ս այն կանդրադառնա բյուջեի մուտքերի վրա:

Տնտեսագետի խոսքով՝ ներկայումս գործատուների մի մասը  ստվերում  է աշխատում և չի գրանցում աշխատողներին , քանի որ հենց եկամտահարկի բարձր լինելն է պատճառ դառնում  ստվերային աշխատողներ  ունենալու համար:

Ատոմ Մարգարյանը նշեց, որ այս փոփոխությունների էությունը կայանում է  աշխատուժի ստվերային շրջանառությունը կրճատելու համար նպաստավոր պայմաններ ստեղծելու մեջ:   «Եկամտային հարկի դրույքաչափերի նվազման դեպքում ստվերային աշխատողների թիվը կկրճատվի : Հատկապես, խոսքը վերաբերում է միջին եկամտային խմբերին: Բնականաբար, դա կարող է ավելացնել հարկային բազան, այսինքն՝ չհաշվառված աշխատողների աշխատավարձերը լեգալացնելով, կարող են ավելացնել բյուջեի մուտքերը»,- ասաց տնտեսագետը:

Այնուամենայնիվ, եթե բյուջեն որոշակի կորուստներ ունենա, ապա, ըստ Ատոմ Մարգարյանի,  խոսակցություններ կան, որ  այլ հարկատեսակների հաշվին հնարավոր է մուտքերն ապահովել, մասնավորապես, ԱԱՀ-ի, շրջանառության հարկով:

Տնտեսագետը համոզված է, որ  եկամտային հարկի իջեցմանը զուգահեռ  փոքր և միջին բիզնեսը դուրս կգա ստվերից: «Եթե աշխատանքային պայմանագիր չեն կնքում  և ստվերում է աշխատավարձը վճարվում, այդտեղ առաջին հերթին տուժում է  հենց աշխատողը,  քանի որ նա չի  կարողանում օգտվել օրենքով սահմանված իրավունքներից»,- ասաց Ատոմ Մարգարյանը: