Փաշինյանը չպետք է թույլ տա, որ իրեն ներքաշեն հետագա ծանր հետևանքներ ունեցող խաղերի մեջ. Իսագուլյան
«Եթե ուզում ես զուգահեռներ տանել «Գարնան 17 ակնթարթ» ֆիլմի և մեր օրերի միջև, պարզ երևում է՝ ինչ է տեղի ունենում: Այն մեկնաբանությունները, որ տալիս են երկրի առաջին դեմքերը, հարց է հարուցում՝ մի՞թե նրանք ինտելեկտուալ շփումներ չեն ունեցել, տարրական գիտելիքներ չունեն, որ հասկանան՝ իրենց ասածները ոչ ազգայինի, ոչ օրենքի, ոչ Սահմանադրության հետ որևէ կապ չունի»,- այսօր տեղի ունեցած մամուլի ասուլիսի ժամանակ ասաց Հայաստանի Հանրապետությունում Արցախի Հանրապետության մշտական ներկայացուցչության խորհրդական-խորհրդատու Գառնիկ Իսագուլյանը:
Անդրադառնալով երեկ համացանցում տարածված հայտնի գաղտնալսման հանգամանքին՝ բանախոսը նկատեց՝ ամենևին էական չէ՝ ում կողմից, ինչպես է կատարվել գաղտնալսումը: Նրա խոսքով, երկրի անվտանգության համար պատասխանատու թիվ մեկ մարդիկ հայտնվել են խայտառակ պատմության մեջ:
«Ամեն ինչ լսվում է: Եթե որևէ մեկը ծովափում լողալ չգիտի, դա դեռ չի նշանակում, որ մյուսները ևս լողալ չգիտեն: Ձայնագրությունը հրապարակվելուն անմիջապես պետք է հետևեին ԱԱԾ-ի և ՀՔԾ-ի տնօրենների հրաժարականները, վարչապետը դեռ թող մնա: Գաղտնալսողին որևէ պատժի չպետք է ենթարկել, ավելին նրան պետք է պարգևատրել, որովհետև եթե ինչ-որ մեկը կարողացել է ձայնագրել, ավելի պրոֆեսիոնալ է, քան նրանք, ովքեր ձայնագրվել են: Այդ խոսակցության բովանդակությունը հստակ ցույց է տալիս մեկ բան՝ ոչ միայն սիրո, հանդուրժողականության հեղափոխություն չի եղել, այլև եկել է մի ռեժիմ, որտեղ ամեն ինչ թելադրվում է մեկ կետից և թելադրվում է լկտի ու առանց չափորոշիչների: Այդ խոսակցության հիման վրա ՀՔԾ պետի դեմ կարելի է հինգ, ԱԱԾ-ի պետի դեմ՝ երեք քրեական գործ հարուցել: Վարչապետն էլ ասում է՝ ինչ է եղել, դե տղերք են, մի երկու հատ էլ քֆուր են տվել:
Գործում ներգրավված է նաև տասը զոհերի պաշտպանը: Նա դարձել է ՀՔԾ-ի պետի խաղալիքը և ոչ թե մտահոգված է տասը զոհերի սպանողներին բացահայտելով, այլ նրանով, որ այդ գործն ընդհանրապես չբացահայտվի:
Ես միանշանակ կարող եմ ասել, որ Քոչարյանի, Խաչատուրովի նկատմամբ մարտի մեկի գործը ծայրից ծայր քաղաքական պատվեր է, խայտառակ քաղաքական պատվեր: Որ սա քաղաքական խայտառակ պատվեր է, կասկած չկա: Նիկոլ Փաշինյանը չպետք է թույլ տա, որ իրեն ներքաշեն հետագա ծանր հետևանքներ ունեցող խաղերի մեջ: Ամեն ինչ չգիտակցված ձևով տարվում է քաղաքացիական պատերազմի: Հաջորդը ընտրել են Գագիկ Ծառուկյանին, հիմա սիլի-բիլի են անում: Արդեն սցենարը կա, ամեն ինչ գրված է»,- ասաց Գառնիկ Իսագուլյանը:
Բանախոսը միաժամանակ շեշտեց՝ հեղափոխությունը ոչ Նիկոլ Փաշինյանը, ոչ էլ ժողովուրդը չեն արել, 95 տոկոսն արել է 1in.am-ը, 4 տոկոսն՝ Ազատությունը, 1 տոկոսը՝ ժողովուրդն ու Նիկոլը՝ միասին: «Այս ծրագիրը տարիներ շարունակ մշակվել է ոչ Հայաստանում: Եթե Սորոսը մի տեղ փող է դնում, պետք է մեծ շահ ունենա»,- ասաց Հանրապետությունում Արցախի Հանրապետության մշտական ներկայացուցչության խորհրդական-խորհրդատուն:
Գառնիկ Իսագուլյանի խոսքով, հիմա Սերժ Սարգսյանին և Ռոբերտ Քոչարյանին մեղադրում են ինչ-ինչ հարցերի մեջ, բայց նրանք պատասխանատվությունից խուսափողը չեն, նրանք ինչ-որ տեղ չեն գնա:
«Երբ որոշները գունավոր շորտեր էին հագնում, նրանք իրենց ընտանիքներով գնդակոծության տակ էին: Նրանց շնորհիվ էր, որ մարդիկ Ստեփանակերտից չէին հեռանում: Ոչ Ռոբերտ Քոչարյանը, ոչ Սերժ Սարգսյանը երբեք հողեր չէին հանձնի, Մարտի մեկի գործում էլ որևէ մեղսակցություն չունեն: Դժվար է ասել՝ արտակարգ ռեժիմը չլիներ, քանի մարդ կզոհվեր և ով էր մարդկանց առաջնորդելու մեռնելու»,- ամփոփեց բանախոսը:
Հարակից հրապարակումներ`
- Ես ՀՀ ԱԱԾ տնօրենին անձամբ չեմ ճանաչում, նրան չեմ զանգահարել. դատավոր Վաչե Մարգարյան
- ՎիվաՍել-ՄՏՍ-ը պաշտոնապես տեղեկացնում է, որ չի իրականացրել և չի իրականացնում գաղտնալսում
- ՔԿ. Քննություն է տարվում` պարզելու ԱԱԾ տնօրենի և ՀՔԾ պետի հեռախոսազրույցը ձայնագրելու և տարածելու դեպքի հանգամանքները
- Սամվել Մարտիրոսյան. Շատ մեծ հավանականություն կա, որ նույնիսկ Փաշինյանի հեռախոսն են գաղտնալսում
- ԱԱԾ պետ. Մանրակրկիտ քննությունը կպարզի, թե ով է կատարել գաղտնալսումը
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը