Ձեր վստահելի աղբյուրը

«Ցանկացած հարց, որն այսօր ուզում ես բարձրացնել քաղաքի խնդիրների լուծման համար, կամա թե ակամա դեմ ես առնում կայացած, կարծրացած ինչ-որ որոշումների, տարբեր քաղաքական ուժերի»,- այս մասին այսօր Մամուլի ազգային ակումբում ասաց «Երևանի հանրություն» դաշինքի քաղաքապետի թեկնածու Անահիտ Թարխանյանը։

Թարխանյանն առանձնակի անդրադարձավ Երևանի իրավունքների պահպանության խնդիրներին. «Երկար տարիներ երևանցիների իրավունքները խախտվել են հենց կոռուպցիոն սխեմաների պատճառով։ Երևանցու իրավունքը խախտված է թե աղբահանության, թե հանրային տրանսպորտի, թե անգամ քաղաքի որոշ տարածքներում մայթերի վերացման ու անմիջապես բնակարանների մոտ սրճարաններ կառուցելու հետ կապված։ Այս հարցերով, երբ որ քաղաքացին դիմում է քաղաքապետարան՝ նրան անմիջապես ուղղորդում են դատարան, իսկ հասարակ քաղաքացին այդ գործընթացի համար պետք է ֆինանսական ծախսեր անի, իրավաբան վարձի, թղթեր պատրաստի»։

Թեկնածուն առաջարկում է, որ Երևան քաղաքին կից ձևավորվի խորհուրդ, որն անվճար ծառայություններ կմատուցի երևանցիների՝ իրավունքների խախտման դեպքում։ Նրա խոսքով, խորհրդից բացի, քաղաքապետարանը ևս իր վրա պատասխանատվություն պետք է վերցնի, ամեն մի դեպքի համար աձանձին որոշում գտնի։

Խոսելով Երևանի պատմամշակութային դեմքի պահպանումից, մասնագիտությամբ ճարտարապետ թեկնածուն ասաց. «Իհարկե, 19-րդ դարի Երևանը իսպառ քանդված է։ Հին քաղաքից ինչ-որ փշրանքներ մնացել են կենտրոնում, որոնց պետք է ուշի ուշով հետևել և վերականգնել։ Կոնդի տարածքում և Արամի փողոցի շրջակայքում տարածքներ կան, որոնք կարելի է վերականգնել»։

«Երևանի հանրություն» դաշինքի ցուցակի անդամ Արամ Գրգորյանն էլ անդրադարձավ քաղաքի խնդիրների լուծման հարցում ֆինանսական միջոցների ներգավման իրենց մոտեցումներին:
«Մենք առաջարկում ենք ստեղծել «Շրջանառվող հիմնադրամների մեխանիզմ»: Երևան քաղաքոմ կա սեփականության իրավունքի աղճատված վիճակ, կան ֆինանսական միջոցներ, որոնք պետք է օգտագործել: Մենք առաջ ենք քաշում մի մեխանիզմ, որը ներդրումներ կբերի: Ճիշտ կառավարումը կբերի ներքին ներդրումների, և հետագայոււմ արտաքին էլ կլինի», – ասաց Գրիգորյանը։

Նրա խոսքով՝ Երևանի աշխատակազմում գոյություն ունի իրավաբանական վարչության հսկայական աշխատակազմ, որը որևէ անգամ չի զբաղվել երևանցու իրավունքների պաշտպանությամբ. «Նրանք զբաղվել են կորպորատիվ հարցերով։ Մենք այստեղ էլ առաջարկություն ունենք՝ ստեղծել հանրային լսումների ինստիտուտ, և ցանկացած որոշում, որը որ վերաբերում է երևանցիների մեծամասնության շահերին, պետք է անպայման քննություն անցնի այստեղով»։

Վերջում անդրադառնալով դաշինքի շանսերին՝ Անահիտ Թարխանյանն ասաց, որ բարձր է գնահատում իրենց շանսերը. «Մենք ոչ քաղաքական ուժ ենք, տարբեր հասարարական կազմակերպությունների դաշինք ենք և մեր մասնագիտական փորձով համոզված ենք, որ կկարողանանք տրամադրել ամենալավ լուծումները: Մենք չունենք որևէ քաղաքական կամ ֆինանսական սպոնսերներ, ոչ ոք կանգնած չէ մեր հետևում, նույնիսկ մեր քարոզարշավը հիմնված է մեր ֆինանսական միջոցների վրա»։