Ձեր վստահելի աղբյուրը

«Դասական ստարտափ ենք, գաղափարն ունեի, բանկից փորձեցի վարկ վերցնել։ Անհրաժեշտ 3 միլիոնից միայն 2-ը տվեցին, մյուս միլիոնը ստիպված էի ընկերոջիցս պարքտով վերցնել»,- այս մասին պատմել է հայկական «Զանգի» հավելվածի ընկերության հիմնադիր տնօրեն  Վահրամ Մարտիրոսյանը, ում ընկերություն այսօր այցելել էր ՀՀ տրանսպորտի, կապի և տեղեկատվական տեխնոլոգիաների նախարարի առաջին տեղակալ Հակոբ Արշակյանը։

Նախարարությունից հայտնում են, որ «Viber»-ի ու «Skype»-ի մրցակից ընկերությունը Հայաստանում հիմնվել է դեռևս 10 տարի առաջ։  Սկզբում զբաղվել են զուտ ծրագրավորմամբ` «outsourcing»-ով, հաջողել, 2013-ին արդեն սկսել են աշխատել իրենց արտադրանքի` հայկական առաջին մեսինջերի վրա, և «Be interactive»-ը վերանվանվել է «Զանգի»-ի։ Հայաստանյան գրասենյակն այսօր ունի 40 աշխատակից։

2016-ին որոշել են մանրածախ շուկայից անցնել բիզնես հաճախորդներին «Զանգի»-ի տեխնոլոգիան վաճառելուն։ Վահրամ Մարտիրոսյանն ասում է, որ այստեղ ևս հաջողություն են ունեցել և հավատացած են, որ նույն տեմպերով շարունակելով 2020-ին կհասնեն 1մլրդ կապիտալիզացիայի։

Հակոբ Արշակյանի խոսքով` ամենամեծ վստահության չափանիշներից այն կլինի, որ կառավարական օղակներում, անհրաժեշտության դեպքում, հենց «Զանգի»-ն օգտագործեն որպես հաղորդակցության միջոց, ինչի ուղղությամբ խոստացավ անպայման քննարկումներ ունենալ։

Մյուս գործառույթը, որ ունի պետությունը նմանօրինակ բիզնեսին աջակցելու առումով, ըստ նախարարի տեղակալի, արտասահմանյան հանդիպումների ժամանակ նրանց մասին պատմելն ու ներկայացնելն է։ Նա վստահություն է հայտնել, որ կառավարությունը ամեն ինչ անելու է, որ ոլորտի ձեռներեց մարդկանց համար ավելի բարենպաստ միջավայր ստեղծվի գաղափարները կյանքի կոչելու, ապա նաև այդ գաղափարները հաջող բիզնեսի և նոր աշխատատեղերի վերածելու համար։