Ձեր վստահելի աղբյուրը

Ինեկոբանկը, հանդիսանալով տարածաշրջանի առաջատար թվային բանկերից մեկը, ներկայանում է  արագ, հարմար և ապահով վճարումներ կատարելու InecoPay համակարգով:

Լրագրողների հետ հանդիպմանը Ինեկոբանկի կողմից ներկայացվեց InecoPay անկանխիկ վճարումների նորարարական և գերժամանակակից լուծումը։

«InecoPay համակարգն ամբողջությամբ փոխում է ավանդական վճարումներ կատարելու ավանդույթը։ Համակարգն հնարավորություն է ընձեռում անկոնտակտ վճարումներ կատարել սմարթֆոնով ընդամենը սքանավորելով վճարման կետում ներկայացվող QR կոդը։ Այն ամբողջովին փոխում է ավանդական պատկերացումներն անկանխիկ վճարումների վերաբերյալ, ձևավորում է վճարումներ կատարելու նոր մշակույթ և յուրահատուկ կենսաոճ, քանի որ անգամ կանխիկ գումարի բացակայության դեպքում հնարավոր է դառնում կազմակերպել ցանկացած տեսակի վճարում վաճառքի և սպասարկման տարբեր ոլորտներում` հանրային սննդի, ծառայությունների մատուցման, կենցաղային տեխնիկայի, հագուստի, առողջապահության, և այլն»,- մանրամասնեց «Ինեկոբանկ» ՓԲԸ-ի Զարգացման և մարքեթինգի գծով տնօրեն Արեն Նալթակյանը։

Նա նշեց, որ InecoPay արագ վճարումների հնարավորությունն այժմ հասանելի է ոչ միայն Ինեկոբանկի հաճախորդներին, այլ նաև բոլոր նրանց, ովքեր ունեն  ArCa, Visa, Master համակարգերի վճարային  քարտեր (մանրամասն՝ այստեղ)։ Ընդամենն անհրաժեշտ է InecoMobile հավելվածին կցել վճարային քարտն ու կատարել InecoPay վճարում սմարթֆոնի միջոցով։

Արեն Նալթակյանը շեշտեց՝ այսօր վստահորեն կարող են արձանագրել, որ Հայաստանում առաջին անգամ ունեն ամբողջական թվային Բանկ, քանի որ Inecopay վճարային լուծման շնորհիվ  ամբողջականացվում է թվային ուղիներով հաճախորդներին Բանկի կողմից մատուցվող ծառայությունների ցանկը՝սկսած  վճարումների սպասարկումից մինչև խնայողությունների ներգրավում և ֆինասավորում իրական ժամանակային ռեժիմում. «Inecopay-ը հնարավորություն է տալիս կատարել վճարումներ՝ օգտագործելով միայն ձեր սմարթֆոնը: Այսինքն՝ դուք կարիք չեք ունենա մշտապես ձեռքի տակ ունենալ կանխիկ կամ տարբեր բանկային քարտեր, ավելին, նույնիսկ եթե գնում կատարելու ժամանակ ձեր հաշիվներին առկա միջոցները բավարար չեն լինի, կարող եք ակնթարթորեն ստանալ վարկ և վճարել InecoPay-ի միջոցով»։

«Ինեկոբանկ» ՓԲԸ-ի Զարգացման և մարքեթինգի գծով տնօրենը ավելացրեց, որ Բանկը չի սահմանափակվելու մինչ օրս ներկայացրած լուծումներով, շարունակելու է զարգացնել հաճախորդներին նորարարական լուծումների մատուցումը և մոտակա ապագայում հայաստանյան շուկային են ներկայացնելու նոր լուծումներ։

«Ինեկոբանկ»-ի Կորպորատիվ բիզնեսի տնօրեն Արտյոմ Չիչյանն  առանձնացրեց վճարում ընդունողների համար Inecopay-ի առավելությունները։

«Inecopay համակարգն արդյունավետ և հարմարավետ բիզնես լուծումներ է առաջարկում նաև վճարում ընդունողներին: Inecopay-ն առանձնանում է համակարգին միանալու պարզությամբ․ կազմակերպությունից չի պահանջվում ունենալ հաշիվ Ինեկոբանկում, ցանկության դեպքում պարզապես պետք է հայտ ներկայացնել, ընդ որում՝ առանց բանկ ներկայանալու՝ online տարբերակով:
Inecopay-ի հաջորդ առավելությունն արագությունն է. վճարման գործընթացը տևում է մի քանի վայրկյան»,- ներկայացրեց նա։

Արտյոմ Չիչյանը նաև ընդգծեց, որ վճարում ընդունողները հավելյալ հնարավորություն են ստանում ըստ անհրաժեշտության ավելացնել վճարի ընդունման անսահմանփակ կետեր՝ առանց բանկին դիմելու, պարզապես տպում են QR-ը և ներկայացնում հաճախորդին: Ինչպես նաև Inecopay-ով վճարում կատարողը կարող է ըստ նախընտրության օգտվել իր խնայողություններից և հաշվի մնացորդներից տեղում օպերատիվ կազմակերպելով գործարքը:

Նա հայտնեց, որ համակարգի գործարկումից մոտ մեկ ամիս է անցել և արդեն հնարավոր է վճարում իրականացնել ավելի քան հազար սպասարկման և վճարման կետերում։ «Այս գործընթացը կրում է շարունակական բնույթ․ մեր նպատակն է հաճախորդներին ապահովել ամբողջական ծածկույթ հանրապետությունում»։

«Ինեկոբանկ» ՓԲԸ-ի Տեղեկատվական տեխնոլոգիաների ծառայության ղեկավար Նարեկ Բեժանյանն էլ անդրադարձավ համակարգի ապահովությանն ու պարզությանը։

«Ինեկոբանկը ներդրել է մի համակարգ, որի շնորհիվ այսօր վարկ ստանալու գործընթացը դարձել է կոմունալ վճարում կատարելու նման պարզ: Ինեկոբանկը, զարգացնելով բանկային հեռահար գործիքները, դրանք միավորում է մեկ ապահով և անվտանգ միջավայրում։ ժամանակակից սմարթֆոնները, որոնց միջոցով գործում է Inecopay-ը թույլ են տալիս կիրառել անվտանգության բազմաթիվ գործիքներ՝ Touch ID-ից՝ մատնահետք, Face ID և այլն: Իսկ հեռախոսը կորցնելու դեպքում օգտատերն անձամբ կարող է համակարգչով արգելափակել իր հաշիվը»,- հավելեց Բանկի ՏՏ ծառայության ղեկավարը։

Ինեկոբանկն այսօր Հայաստանում առաջին թվային բանկն է, որն ապահովում է ամբողջական թվային լուծումներ ֆիզիկական անձ հաճախորդների համար։ Միաժամանակ Բանկը շարունակում է ներդնել և զարգացնել հարմար և ապահով բանկային թվային գործիքներ և համակարգեր՝ ապահովելով առավել հաճախորդամետ ծառայություններ: Այսօր Ինեկոբանկը միավորում է ֆինանսական բոլոր գործիքները մեկ ապահով միջավայրում՝ հնարավորություն տալով կատարել փոխանցումներ, ներդնել ավանդներ, ստանալ վարկեր և կատարել վճարումներ գնումների, ծառայությունների ձեռք բերման համար անմիջապես սմարթֆոնի միջոցով։