Ձեր վստահելի աղբյուրը

Հայաստանի բանկային համակարգում առաջիկայում տոկոսադրույքի մակարդակի էական փոփոխություն չի ակնկալվում: Այս մասին լրագրողների հետ հանդիպման ժամանակ ասաց «Ամերիաբանկ»-ի Մանրածախ գործառնությունների գծով տնօրեն Արման Բարսեղյանը։

«Առաջիկա 6 ամիսներին, տոկոսադրույքների մակարդակի էական փոփոխություն չենք ակնկալում: Ավելի երկար ժամկետի համար դժվար է կանխատեսումներ անել՝ կապված բազմաթիվ գործոնների փոփոխության հնարավորության հետ»,- ընդգծեց բանկի պաշտոնյան։

Նրա խոսքով՝  չորս հիմնական գործոններ են ազդում տոկոսադրույքների միտումների վրա: Դրանցից մեկը տնտեսական ակտիվությունն է։ «Այս տարվա հունվար-օգոստոսին տնտեսության ակտիվության ցուցանիշը նախորդ տարվա նույն ժամանակահատվածի համեմատ աճել է 7,7%-ով։ Դա նշանակում է, որ որքան բարձրանան տնտեսական աճի տեմպերը, այդքան ֆինանսական ռեսուրսների նկատմամբ լրացուցիչ պահանջարկ է ստեղծվելու»,- ասաց Արման Բարսեղյանը։

Նա նշեց, որ վերջին 12 ամիսներին հիմնական միջազգային շուկաները տոկոսադրույքների որոշակի աճի միտում են գրանցել: Հայաստանի թողարկած եվրոբոնդերի տոկոսադրույքներն, ըստ նրա, ևս մոտ 0,5-0,75 տոկոսային կետով բարձրացման միտում են արձանագրել: «Կարծում ենք, որ այս միտումը որոշակի ժամանակային լագով հնարավոր է ազդեցություն ունենա հայաստանյան շուկայի վրա»,- նշեց նա։

Տոկոսադրույքների վրա ազդող երրորդ գործոնը Կենտրոնական բանկի վարած դրամավարկային քաղաքականությունն է, որը կարող է զսպող կամ ընդլայնող ազդեցություն ունենալ։ Արման Բարսեղյանը հիշեցրեց, որ վերաֆինանսավորման տոկոսադրույքը 2017-ից ի վեր մնացել է անփոփոխ՝ 6% մակարդակում: Այդուհանդերձ, նա չբացառեց ԿԲ քաղաքականության մեջ փոփոխությունների հնարավորությունը, որոնք կարող են ազդել տոկոսադրույքների վրա:

Նա նաև նշեց, որ բանկային համակարգում կապիտալի նվազագույն շեմի բարձրացումից հետո տեղի ունեցավ կոնսոլիդացիոն գործընթաց. «Սակայն, ներկայումս նոր զարգացումներ չկան: Այսինքն՝ մրցակցության առումով մենք շուկայում ունենք նույն կառուցվածքը, բայց  կարևոր փոփոխություն է այն, որ բանկերի մեծ մասը կապիտալն ավելացնելու արդյունքում ունեին կապիտալի և լիկվիդայնության ավելցուկ, որն արդեն բացակայում է»։

Հարցին, թե ինչպես կանդրադառնա քաղաքական, հետևաբար՝  տնտեսական նոր իրողությունը տոկոսադրույքների ընդհանուր մակարդակի վրա, Արման Բարսեղյանը նախ հիշեցրեց, որ  միջազգային հեղինակավոր «Մուդիս» վարկանիշային կազմակերպությունը Հայաստանի  վարկանիշը գնահատել է «կայուն» B1, ինչը նշանակում է, որ  Հայաստանի տնտեսական զարգացումները գնահատում է դրական:

«Ինչքան երկրի ռիսկայնությունը նվազի, բնականաբար, մեր երկրի ռեյտինգը կբարձրանա և դրա արդյունքում բանկերը կկարողանան միջազգային շուկաներից ֆինանսական ռեսուրսներ ներգրավել։ Հետևաբար, քաղաքական և տնտեսական կայունությունը նպաստելու  է երկրի ռիսկայնության  և տոկսոսադրույքների նվազեցմանը։ Ամեն դեպքում, մեր սպասումները, որոնք ընդհանուր իրավիճակը վերլուծելով ունենք՝ այն է, որ կարճաժամկետ հատվածում  տոկոսադրույքների բարձրացման ուղղությամբ չենք կարծում, որ հնարավոր զարգացումներ կլինեն ,- ասաց նա։

Ինչ վերաբերում է քաղաքական զարգացումներին, Արման Բարսեղյանը նշեց, որ Հայաստանում  տեղի ունեցող քաղաքական զարգացումների հետևանքով բանկային համակարգը որևէ էական ցնցումների չի ենթարկվել։ Ավելին, ըստ նրա, թե կապիտալիզացիայի, թե ընդհանուր գործունեության մասով բոլոր իրավիճակները հաղթահարվել են առանց էական ցնցումների:
Ամերիաբանկի ներկայացուցչի խոսքով՝ նույնիսկ վերջին ամիսներին իրենք չեն նկատել անգամ ավանդների արտահոսք, որը կարող էր տեղի ունենալ՝ հաճախորդների մոտ հնարավոր անհանգստությունների հետևանքով: Եզակի դեպքեր, ըստ նրա, հնարավոր է լինեն, բայց դրանք ընդհանուր պատկերը չեն փոխել:

«Դա ցույց է տալիս, որ երկրի տնտեսությունը, ֆինանսաբանկային համակարգը ինստիտուցիոնալ առումով այնքան կայացած է, որ նույնիսկ քաղաքական իրադարձությունները վճռական ազդեցություն չեն ունենում: Բավարար վստահություն ունենք, որ առաջիկա խորհրդարանական ընտրությունները ևս որևէ էական նեգատիվ ազդեցություն չեն ունենա բանկային համակարգի կայունության վրա»,- նշեց Արման Բարսեղյանը։