Ձեր վստահելի աղբյուրը

«Այս օրերին ՀՀ քաղաքական կյանքում դե յուրե մեկնարկել է ԱԺ արտահերթ ընտրությունների գործընթացը, իսկ ահա դե ֆակտո ոչ մի բան չի կատարվում»,- այսօր տեղի ունեցած մամուլի ասուլիսի ժամանակ ասաց քաղտեխնոլոգ Արմեն Բադալյանը։

«Իշխանության հարցը գործադիրում լուծվեց մայիսի ութին, երբ Նիկոլ Փաշինյանը դարձավ վարչապետ։ Հաշվի առնելով, որ Երևանը նույնպես կարևոր նշանակություն ունի պետական կառավարման համակարգում, այնտեղ ևս իշխանության հարցը լուծվեց սեպտեմբերի 23-ին։ Մնացել է, որ հեղափոխությունն ավարտվի նաև ԱԺ-ում, ինչն էլ տեղի կունենա դեկտեմբերին։ Ինչո՞ւ դեկտեմբերին։ Երբ մայիսին իշխանափոխություն  տեղի ունեցավ, շատերը նշում էին, որ արտահերթ ընտրությունները լինեն գոնե մեկ տարի հետո։ Դա հենց այնպես ընտրված ժամանակահատված չէր։ Մեկ տարի պետք էր, որպեսզի նոր ստեղծված, ինչպես նաև հին կուակցությունները կարողանային ռեբրենդինգ իրականացնեն։ Սա պետք է տեղի ունենար ամռանը, սակայն ամռանը ոչ մի նամն բան տեղի չունեցավ»,- նշեց բանախոսը։

Արմեն Բադալյանը նկատեց, որ նախընտրական քարոզարշվի նշույլներ է ցույց տալիս միայն ԲՀԿ-ն, մյուսները նույնիսկ կենդանության նշաններ ցույց չեն տալիս։

«Մյուսների հարցում շարժ չենք տեսնում։ Մենք այս պահին նույնիսկ չգիտենք՝ ՀՀԿ-ն, ՀԱԿ-ը մասնակցելո՞ւ են ընտրություններին թե ոչ, չգիտենք՝ «Լույս» դաշինքը մասնակցելու է միայնա՞կ, թե նրան այլ ուժեր կարող են միանալ։ Մինչդեռ ոչ մի քաղաքական ուժի ոչ ոք չի խանգարում հանրահավաքներ անել, գալ, մամուլի ակումբներում ներկայացնել իրենց անելիքներ։ Սա թաքնված քարոզարշավի ձև է, որը, սակայն, ոչ ոք չի օգտագործում։ Դրա համար էլ ասացի, որ դե յուրե գնում ենք ընտրությունների, դե ֆակտո՝ կիսաչգոյության վիճակում ենք»,- ասաց բանախոսը։

Անդրադառնալով Վենետիկի հանձնաժողովի գործոնին՝ Արմեն Բադալյանը շեշտեց՝ ստեղծվել է մի իրավիճակ, երբ հանձնաժողովի կարծիքները չենք կարող հաշվի առնվել։ Պատճառն այն է, որ նշված մարմինը, սովորաբար, երկար է աշխատում։

«Բնականաբար, երբ նոր ԱԺ կընտրվի, կսկսվի մշակել նոր, նորմալ Ընտրական օրենսգիրք։ Բայց պետք է հիշել՝ ընտրությունները լեգիտիմ ճանաչում են ոչ թե Վենետիկի հանձնաժողովը կամ մեկ այլ մարմին, այլ հենց ժողովուրդը»,- ասաց նա։

Հարցին՝ հնարավոր համարո՞ւմ է, որ արտահերթ ընտրություններից հետո Հայաստանում մենիշխանություն հաստատվի, քաղտեխնոլոգը շեշտեց՝ քաղաքական ուժերը չպետք է պառկեն «դիվանին», իսկ հետո բողոքեն, որ չեն ընտրվել։ Արդեն այժմվանից, Բադալյանի խոսքով, նրանք պետք է նախընտրական ակտիվ գործողություններ ծավալեն, գիտակցեն, որ հաղթելու համար պետք է պայքարել։

Քաղտեխնոլոգը նկատեց՝ Նիկոլ Փաշինյանին, այո, հաջողվեց քանդել հինը, սակայն նրան և նրա թիմակիցներին չի հաջողվում ապագայի զարգացման ստրատեգիա մշակել՝ պատկերացնելու, թե ի վերջո 10-15 տարի հետո Հայաստանին ինչ ճակատագիր է սպասում։ Նրա խոսքով, առավելապես ականատես ենք լինում իրավիճակային լուծումների։

«Դուք տեսե՞լ եք նրա արտաքին քաղաքականության հայեցակարգը։ Դուք տեսե՞լ եք տնտեսական հայեցակարգը։ Փաշինյանը ՀԱՊԿ-ի և ԵԱՏՄ-ի ջատագով է դարձել, նա գրեթե ամեն ամիս Մոսկվա է այցելում, կարծես աշխարհում այլ քաղաքներ չկան՝ Փարիզ, Բեռլին, Լոնդոն, Պեկին, Դելի կամ Տոկիո»,- նշեց քաղտեխնոլոգը։

Ասուլիսի ավարտին Արմեն Բադալյանն անդրադարձավ նաև Հայաստանում ԱՄՆ նախկին դեսպան Ռիչարդ Միլսի՝ «գրավյալ տարածքներ» հետ վերադարձնելու հայտարարությանը՝ նշելով, որ նա, իհարկե, հեռացող  դեսպան է, սակայն ԱՄՆ պետդեպարտամենտը հեռացող կառույց չէ։

«Այո, սա գուցե հեռացող դեսպանի մեսիջ էր, բայց արդյոք պետդեպն է հեռանում»- ասաց նա։

Նրա համոզմամբ, հեռացող դեսպանների շուրթերով նմանօրինակ հայտարարությունները, կարծես, տրամադրություններ ստուգելու նպատակ ունեն»,- ամփոփեց քաղտեխնոլոգը։