Գյումրիում սկսել են նորաոճ հրապարակի կառուցման աշխատանքները
Գյումրիում կառավարության հետ համատեղ իրականացվում է «Մուշ» 2/2 թաղամասի հրապարակի կառուցումը, որի 70%-ի ներդրումն իրականացնում է համայնքը, իսկ 30%-ը՝ կառավարությունը:
Շիրակի մարզպետարանի ֆեյսբուքյան էջից տեղեկանում ենք, որ սուբվենցիոն այս ծրագրով նախատեսվում է նորաոճ հրապարակի կառուցում ընդհանուր 28000 քմ մակերեսով, որից հասարակական կառուցապատման տարածք՝ 10850 քմ, կանաչապատ տարածք՝ 1450 քմ, ջրավազան՝ 80 քմ:
«Ընդհանուր առմամբ ըստ նախագծի կսալիկապատվի ՝ 5029քմ տարածք, 6900քմ էլ կխճապատվի: Աշխատանքներն ընթացքի մեջ են: Ծրագրի արժեքը 105մլն 484 հազար դրամ: Աշխատանքներն իրականացվում են «Վահրադյան Շին» ՍՊԸ կողմից»,-հայտնում են մարզպետարանից։
Թե երբ պատրաստ կլինի հրապարակը, մարզպետարանը չի հստակեցնում։
Հիշեցնենք, որ կառավարության վերջին նիստում հավանության արժանացավ մի քանի մարզերի սուբվենցիա տրամադրելու վերաբերյալ հարցը։
Գործադիրը 167 միլիոն 954 հազար դրամ սուբվենցիա տրամադրեց 7 մարզերի՝ Գեղարքունիքի, Վայոց ձորի, Շիրակ, Արագածոտնի, Արարատի, Արմավիրի և Լոռու: Գումարը տրամադրվելու է 173 ծրագրի իրականացման համար:
▫️Գեղարքունիք - 4 միլիոն 999 հազար դրամ
▫️Վայոց ձոր - 14 միլիոն 64 հազար դրամ
▫️Շիրակ - 54 միլիոն 982 հազար դրամ
▫️Արագածոտն - 15 միլիոն 306 հազար դրամ
▫️Արարատ - 10 միլիոն 797 հազար դրամ
▫️Արմավիր - 5 միլիոն 932 հազար դրամ
▫️Լոռի - 61 միլիոն 872 հազար դրամ
Ըստ պաշտոնական տեղեկատվության, ծրագրերը հիմնականում ուղղված են համայնքներում կապիտալ ներդրումներին` մասնավորապես. համայնքներում փողոցների, այգիների, պուրակների, խաղահրապարակների բարեկարգմանը, համայնքային շենքերի, մշակութային տների, մանկապարտեզների, հանդիսությունների սրահների կառուցմանն ու նորոգմանը, խմելու, կոյուղու, ոռոգման ջրագծերի կառուցմանն ու նորոգմանը և գիշերային լուսավորության անցկացմանը: