Ձեր վստահելի աղբյուրը

Գործադիրի այսօրվա նիստում Արդարադատության նախարարի պաշտոնակատար Արտակ Զեյնալյանը ներկայացրեց մի շարք օրենքներում փոփոխություններ կատարելու մասին նախագծեր։ Մասնավորապես՝ «Հանրային ծառայության մասին», «Դիվանագիտական ծառայության մասին», «Հայաստանի Հանրապետության քաղաքացիության մասին», «Հայաստանի Հանրապետության պետական պարգևների և պատվավոր կոչումների մասին», «Ներման մասին», «Պաշտոնատար անձանց գործունեության ապահովման, սպասարկման և սոցիալական երաշխիքների մասին» և «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» ՀՀ օրենքներում փոփոխություն կատարելու մասին» նախագծերը:

Ըստ հիմանվորման՝ նախագծերի ընդունման արդյունքում հնարավորություն կստեղծվի Հանրապետության նախագահի աշխատակազմի գործունեությունն առավել արդյունավետ և որակյալ կազմակերպելու և Հանրապետության նախագահի լիազորություններն ավելի բովանդակային իրականացնելու համար:

Արտակ Զեյնալյանը նշեց, որ  2015 թ-ի փոփոխություններով Սահմանադրության 5-րդ գլուխը սահմանում է ՀՀ նախագահի լիազորությունները, այդ թվում՝ քաղաքացիության շնորհման և դադարեցման, ներում շնորհելու, պետական պարգևներով պարգևատրելու բարձրագույն դասական աստիճաններ շնորհելու ոլորտներում՝ նախատեսելով, որ նախագահը այդ լիազորություններն իրականացնում է օրենքով սահմանված դեպքերում և կարգով։

«Նախագահի լիազորությանը վերաբերող սահմանադրական դրույթները չեն բացառում այդ լիազորություններն իրականացնելիս նախագահի կողմից օրենքով սահմանված կարգով սեփական նախաձեռնությամբ հանդես գալու հնարավորությունը։ Այսինքն՝ եթե օրենքը նախատեսի, ապա այդ հնարավորությունը չի բացառվում: Մինչդեռ, «Ներման մասին», «Հանրային ծառայության մասին»,«ՀՀ քաղաքացիության մասին», «Պետական պարգևների և պատվավոր կոչումների շնորհման մասին» օրենքներում սահմանված կարգավորումների համաձայն, նախագահն այդ լիազորությունները իրականացնում է միջնորդավորված վարչապետի կամ այլ մարմինների առաջարկների հիման վրա, և նշված հարցերի լուծման շրջանակներում սեփական նախաձեռնություն դրսևորելու հնարավորություն չունի»,- ասաց Արտակ Զեյնալյանը:

Այսպիսով, Կառավարությունն առաջարկում է, որ Հանրապետության նախագահի աշխատակազմում բարձրագույն դասային աստիճանները Հանրապետության նախագահը շնորհի իր աշխատակազմի ղեկավարի միջնորդությամբ, «Դիվանագիտական ծառայության մասին» օրենքով տալ հնարավորություն ՀՀ նախագահի և ԱԺ աշխատակազմեր գործուղել դիվանագիտական ծառայություն իրականացնող անձանց, որոնք արտաքին կապերի բնագավառում ունեն հմտություններ: Բացի այդ, սահմանվել է ՀՀ քաղաքացիություն շնորհելու և Հայաստանի Հանրապետության քաղաքացիությունը դադարեցնելու վերաբերյալ հարցերի լուծման կապակցությամբ քաղաքացիություն ստանալու կամ քաղաքացիությունը դադարեցնելու վերաբերյալ դիմումները նաև Հանրապետության նախագահին ներկայացնելու հնարավորությունը, նախատեսվել է նաև, որ Հանրապետության նախագահը պետական պարգևներ և պատվավոր կոչումներ կարող է շնորհել սեփական նախաձեռնությամբ, սահմանվել է նաև, որ ներման խնդրագրերը կարող են անմիջականորեն ներկայացվել նաև Հանրապետության նախագահին:

Առաջին փոխվարչապետ Արարատ Միրզոյանը նշեց, որ բազմիցս խոսել են՝  պետք է ընդլայնել ՀՀ նախագահի լիազորությունները: «Ես գիտեմ, որ կա տեսակետ, մասնավորապես, ներման դեպքում կարող է առաջանալ սահմանադրականության խնդիր և ըստ էության, ըստ այդ տեսակետի, առաջարկվող փոփոխություններն ավելին են, քան թույլ է տալիս գործող Սահմանադրությունը: Հիմնավո՞ր է այս տեսակետը, թե՞ ոչ»,- ասաց փոխվարչապետը:
Արտակ Զեյնալյանի խոսքով՝ Սահմանադրությունը սահմանել է նվազագույն շեմը և օրենքով դրանք կարող են ընդլայնվել և ձգտել իրացնել, ապահովել ներում խնդրելու, շնորհելու բնական իրավունքը: «Ուստի հակասություններ Սահմանադրության հետ չեն կարող առաջանալ»,- ընդգծեց նա:

Նա նաև կառավարությանը խնդրեց մեկ օր ժամանակ տալ նախարարությանը, որպեսզի մեկ դրույթ էլ կարողանան ավելացնել «Ներման մասին» օրենքում այն մասին, որ նախագահը ներում շնորհի ոչ միայն դատապարտված անձի, այլև երրորդ անձանց դիմումների հիման վրա:
Արտակ Զեյնալյանը նշեց նաև, որ սա բացառիկ լիազորություն պետք է լինի բացառիկ դեպքերի համար:

Նախագահի աշխատակազմի ղեկավար էմիլ Տարասյանը նշեց, որ արդարադատության նախարարն ասում է, որ նախագահի լիազորություններն այս նախագծի փաթեթով ընդլայնվում են, սակայն կային սահմանափակումներ նախագահի լիազորություններն իրացնելիս, դրանք ուղղակի առաջարկ է արվում վերացնել։

Էմիլ Տարասյանը նշեց նաև, որ իրենք առաջարկություններ են ներկայացրել, որոնց մի մասը չի  ընդունվել:

Արտակարգ իրավիճակների նախարարի պաշտոնակատար Ֆելիքս Ցոլակյանն էլ հետաքրքրվեց՝ ինչպես է կարգավորվելու արարողակարգը, օրինակ, վարչապետն ինչպես է հյուրեր ընդունելու՝ հաշվի առնելով, որ կառավարության շենքը տարածք չունի և հարմարացված չէ հյուրերի արարողակարգը ապահովելու համար:

Արտակ Զեյնալյանն ասաց, որ պաշտոնական ընդունելությունները, մասնավորապես, ռազմական շքերթները կարող են կազմակերպվել օդանավակայանում և նախագիծը այդ լուծումները չի տալիս, կարող են դրանք նաև կարգավորվել ենթաօրենսդրական ակտերով:

Արարատ Միրզոյանը ընդգծեց, որ կառավարությունը փաստորեն առաջարկում է փոփոխություններ, որոնք նախագահի աշխատակազմի «սրտով չեն»:

Փոխվարչապետ Տիգրան Ավինյանն էլ ասաց, որ նախագիծը բավարար չափով քննարկված չէ և նախարարական կոմիտեի նիստում պետք է քննարկել:

Այպիսով, որոոշում կայացվեց ՀՀ նախագահի նստավայրը Բաղրամյան 26 տեղափոխելուն  վերաբերող մասով հավանություն տալ, իսկ մնացած նախագծերն առկախել, ևս մեկ անգամ քննարկելու համար: