Փաշինյանը ՀՅԴ կանանց չհամոզեց
Խորհրդանարում 2019 թվականի պետական բյուջեի քննարկման ժամանակ ՀՅԴ պատգամավոր Ռուզաննա Առաքելյանը անդրադառնալով վարչապետի պաշտոնակատար Նիկոլ Փաշինյանի ելույթին՝ նրան հարց ուղղեց. «Ինչպե՞ս ենք խրախուսում աշխատանքը, եթե գյուղերում երիտասարդներ չկան, նրանց վերադարձի խրախուսում չկա, եթե հայրենադարձության հայեցակարգ չկա»։
Փաշինյանը պատասխանեց. «Այդ գաղափարը կար, որ մենք որոշակի արտոնություններ սահմանեինք այն մարդկանց համար, ովքեր վերադառնում են Հայաստան, բայց այստեղ հարց է ծագում, իսկ այն մարդը, ով ճամպրուկները կապել էր և ուզում էր գնալ, իրենց ինչ ենք ասում, ասում ենք՝ գնա մի տարի դրսում ապրի, հետո արի այդ արտոնություններից օգտվի։ Մեր խնդիրը պետք է լինի երկրի գրավչության բարձրացումը։ Մենք գիտենք, որ միայն սոցիալական խնդիրը չէ, որ մարդիկ արտագաղթում են, այստեղ կա արդարության, օրինականության խնդիր, հնարավորությունների ու արժանապատվության խնդիր։ Մենք այսօր երաշխավորում ենք, որ որևէ մեկը մեկ ուրիշին ապօրինի կերպով չի կարող ասել աչքիդ վերևը ունք կա»։
Վարչապետի պաշտոնակատարի խոսքով՝ ներգաղթի կոնցեպտը հետևյալն է՝ Հայաստանը պետք է դառնա լավագույն տեղն ապրելու համար։
«Անշարժ գույքի շուկայում տեղի ունեցողը վկայում է այն մասին, որ հայրենադարձությունը խթանվում է ամեն օր։ Մեր երկրում անշարժ գույքի գներն աճում են, և դա նաև այն պատճառով, որ արտերկրում ապրող մեր հայրենակիցները այսօր գալիս են և ՀՀ-ում անշարժ գույք են ձեռքբերում»,- նշեց նա։
Նույն խմբակցության պատգամավոր Արմենուհի Կյուրեղյանն էլ արձագանքեց. «Անկեղծ ասած մարզերում, գոնե մեր մարզում (Լոռի) ես նման բան ընդհանրապես չեմ տեսել, և բոլոր իմ հարցումներն էլ ցույց են տալիս, որ վերադարձողներ կամ վերադառնալ ցանկացողներ առայժմ չկա»։
Փաշինյանը՝ հակադարձեց, որ Լիբանանում եղած ժամանակ իրեն տասնյակ հայրենակիցներ ասել են, որ պատրաստվում են վերադառնալ, և վերադարձողներ էլ կան։
Կյուրեղյանը հետաքրքրվեց նաև հանքարդյունաբերությունից։
«Հայաստանում պետք է փոխվի հանքարդյունաբերության բովանդակությունը, երբ ոչ թե մեր երկրից կարտահանվի խտանյութը, այլ կվերամշակվի ու կարտահանվի արդեն վերամշակված ապրանքը. պոտենցիալ ներդրողներն արդեն ուսումնասիրում են Հայաստանում պղնձաձուլական գործարաններ ստեղծելու հավանականությունը: Մենք հանքարդյունաբերության բովանդակությունը փոխելու ուղղությամբ պետք է աշխատենք: Հիմա կան ներդրումային մի քանի նախագծեր, որոնց իմաստը հետևյալն է՝ պոտենցիալ ներդրողները ուսումնասիրում են Հայաստանում պղնձաձուլական գործարաններ ստեղծելու հավանականությունը: Սա նշանակում է, որ մենք ոչ թե ուղղակի խտանյութը կարտահանենք, այլ Հայաստանի ներսում կվերամշակենք, դրա արդյունքում կստանանք մետաղ, մետաղից էլ այլ արտադրանք: Սա լրիվ ուրիշ բովանդակություն կհաղորդի մեր հանքարդյունաբերության ոլորտին: Իհարկե, այստեղ մենք այս շրջանակի մեջ ունենք այլ կարևոր խնդիր՝ սահմանել ժամանակակից ամենաբարձր բնապահպանական չափանիշները, որ մենք ունքը սարքելու փոխարեն աչքն էլ չհանենք»,- ներկայացրեց Փաշինյանը:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը