Թեհրանում քննարկել են դատավարական կարգավիճակ ունեցողներին սարքավորումներով հարցաքննելու հնարավորությունը
Թեհրանում Հայաստանի գլխավոր դատախազ Արթուր Դավթյանի և Իրանի
գլխավոր դատախազ Մոհամադ Ջաֆար Մոնթազերիի հանդիպման ընթացքում ստորագրել են երկու երկրների գլխավոր դատախազությունների միջև 2019-2020 թվականների համագործակցության ծրագիր։ Դրանով նախատեսվում է մի քանի համատեղ միջոցառումներ անցկացնել Երևանում և Թեհրանում։
Դրանք վերաբերում են հանձնման և քրեական գործերով իրավական օգնության ցուցաբերման բնագավառում համագործակցության գործնական հարցերին, թմրամիջոցների մաքսանենգության և թմրամիջոցների ապօրինի շրջանառության, ինչպես նաև ապօրինի սահմանահատումների և ապօրինի միգրացիայի դեպքերով հարուցված քրեական գործերի քննությունների, հանցագործությունների արդյունքում ստացված ակտիվների հայտնաբերման, առգրավման, բռնագրավման և արտերկրից վերադարձման ուղղություններով գործակցությանը և աշխատանքային փորձի փոխանակմանը:
Գլխավոր դատախազությունից մանրամասնում են, որ հանդիպմանը քննարկվել է Հայաստանում կամ Իրանում քննվող քրեական գործերով դատավարական կարգավիճակ ունեցող՝ մյուս երկրի քաղաքացի հանդիսացող անձանց իրենց երկրում գտնվելու դեպքում տեսաձայնային և տեխնիկական սարքավորումների միջոցով հարցաքննելու տեխնիկական հնարավորությունների ստեղծման հեռանկարը, ինչը կնպաստի իրավասու մարմինների կողմից քրեական գործերով օբյեկտիվ և բազմակողմանի քննություն ապահովելուն, ինչպես նաև երկու պետությունների քաղաքացիներին հնարավորություն կտա դատավարական կարգավիճակ ունենալու դեպքում առանց տեղափոխման հետ կապված ավելորդ անհարմարությունների արդյունավետ իրացնել իրենց իրավունքներն ու պարտականությունները:
Բացի այդ, գլխավոր դատախազները քննարկել են նաև քրեական գործերով իրավական
օգնություն ցույց տալու մասին միջնորդությունների կատարման ժամկետները
հնարավորինս օպտիմալացնելու հարցը: Նշվել է, որ չնայած Սանկտ Պետերբուրգում
կայացած ՀՀ և ԻԻՀ գլխավոր դատախազների հանդիպումից հետո այս բնագավառում
արձանագրվել է դրական տեղաշարժ, սակայն առկա է վերջինս ավելի արագացնելու
անհրաժեշտություն:
Հայաստանի գլխավոր դատախազը պարոն Մոնթազերիին հրավիրել է Հայաստան:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
