Ձեր վստահելի աղբյուրը

Արտահերթ խորհրդարանական ընտրությունների նախընտրական քարոզարշավի շրջանակում Ճամբարակում այսօր վարչապետի պաշտոնակատար Նիկոլ Փաշինյանն ասաց, երեկ երեկոյան ժամանակ է ունեցել, մամուլն է թերթել, «շահարկումներ» վերնագրերով նյութերի է հանդիպել։

«Շատ պարզ մի բան եմ ասել, Հայաստանի առաջին ղեկավարն եմ, ում որդին ծառայել է Լեռնային Ղարաբաղում։ Այս շարքում բնականաբար նկատի եմ ունեցել Լևոն Տեր-Պոտրոսյան, Ռոբերտ Քոչարյան, Սերժ Սարգսյան և ես, Սերժ Սարգսյանը տղա չունի։ Հիմա ասում են, ո՞նց կարելի է նման բան ասել։

Ես գիտեմ, որ Լևոն Տեր-Պետրոսյանի որդին ծառայություն է անցել, եթե չեմ սխալվում Շամշադինում։ Վերնագրեր տեսա՝ Ռոբերտ Քոչարյանի որդիները ծառայել են։

Հա, ի դեպ  ես չհասկացա՝ Ղարաբաղի իշխանության ներկայացուցիչներն էլ էին արձագանքել իմ էդ ասածին։ Ես ընդհանրապես վերջին օրերին, անկեղծ ասած, լավ չեմ հասկանում Լեռնային Ղարաբաղի Հանրապետության իշխանությունների ներկայացուցիչների ակտիվությունը։

Բացարձակապես չեմ հասկանում, էդ ինչի՞ են ակտիվացել, ինչի՞ են տարբեր մեկնաբանություններ անում և ինչի՞ են ընդհանրապես խառնվել ու իրենց ներկայությունը ցույց տալիս Հայաստանի խորհրդարանական ընտրությունների քարոզարշավի ընթացքում։ Ես ասեմ, որ շատ հարցեր ունեմ դրա կապակցությամբ, դրանք անպայման կքննարկեմ ԼՂՀ նախագահ Բակո Սահակյանի հետ։

Իսկ մինչ այդ ես պարոն Սահակյանին հորդորում եմ, որ կարգի հրավիրի իր կառավարության ներկայացուցիչներին և իրանց ուղարկի իրանց աշխատանքով զբաղվելու։ Չհասկացա, առիթ-անառիթ... Նախագահի մամուլի խոսնակն օր ու մեջ իմ ասածի վերաբերյալ մեկնաբանություն է տալիս, այ քեզ բաաան։ Բա պատկերացնո՞ւմ եք, իմ մամուլի խոսնակը Ղարաբաղի հայտնի ու անհայտ դեպքերի մասին մեկնաբանություններ տա։ Հասկանո՞ւմ եք, թե դրա հետևանքն ու արդյունքը ինչ կլինի։ Սթափվե´ք, հարգելիներս։ Զբաղվեք  ձեր աշխատանքով։ Իհարկե, այն, ինչ տեղի է ունեցել ձեզ հետ կքննարկեմ, բայց ընտրություններից հետո։ Անպայման, կքննարկեմ, իսկ մինչ այդ ասում եմ, զբաղվեք ձեր գործով»,- հայտարարեց Փաշինյանը։

Անդրադառնալով ՀՀ երկրորդ նախագահ Ռոբերտ Քոչարյանի որդիների ծառայությանը, Փաշինյանը հայտարարեց, որ պաշտոնապես դիմել է ու տեղեկանք ստացել։ Ըստ այդմ. «Հիմա պաշտոնապես ասում եմ, այո՝ Ռոբերտ Քոչարյանի որդիները «ծառայել են» Երևանում: Ոչ մի գիշեր չեն անցկացրել որևէ զորամասում, ծառայել է պաշտպանության նախարարության վարչական մասում, մյուս որդին էլ ծառայել է, ձևակերպված է եղել որպես վարորդ,  պետական ավտոն դրել են տակը, որտեղ ուզեցել ա գնացել է, պետության ավտոյի, բենզինի հաշվին և այլն: Էդ ինչի՞ եք ըտենց  ոգևորվել, ես որ մի բան ասում եմ, գիտեմ՝ ինչ եմ ասում։ Եթե որևէ մեկը իմ էս ասածը կասկածի տակ դնի, փաստերով ու փաստաթղթերով կապացուցեմ, հիմա չեմ ուզում ձեզ ծանրաբեռնեմ, էդ փաստաթուղթը հեռախոսիս մեջ ա»:

Հիշեցնենք, որ նոյեմբերի 27-ին Ալավերդիում Փաշինյանը մասնավորապես հայտարարել էր.
«Ես Հայաստանի միակ ղեկավարն եմ, որի որդին ոչ միայն ծառայում է բանակում, այլ ծառայում է Արցախում: Էդ ո՞ր խելոքն է մտածել, որ ես իմ որդուն ուղարկել եմ Ղարաբաղ ծառայելու, որ Ղարաբաղը հանձնե՞մ: Նույնիսկ Ղարաբաղի ղեկավարների երեխաները Ղարաբաղում չեն ծառայել և ընդհանրապես բանակում չեն ծառայել: Իրենք Ղարաբաղը պահողն էին, մենք էլ Ղարաբաղը հանձնո՞ղն ենք»։

Հայտարարությունից հետո լրատվամիջոցները ԼՂՀ նախագահի մամուլի խոսնակ Դավիթ Բաբայանից փորձել էին ճշտել, թե արցախցի որ պաշտոնյաների որդիները չեն ծառայել։ Բաբայանը, օրինակ, Analitik.am-ին ասել էր. «Կարծում եմ, որ պարոն Փաշինյանը պետք է պարզաբանի, թե կոնկրետ որ ղեկավարի մասին է խոսքը: Օրինակ Արցախի գործող նախագահի՝ Բակո Սահակյանի որդին ծառայել է բանակում, նախկին նախագահ Արկադի Ղուկասյանի որդին ծառայել է, ծառայել են նաև ՊԲ հրամանատարի 2 որդիները և այլն: Սրանք արձանագրված փաստեր են, և ընդհանրապես, պաշտոնյաների որդիները ծառայում են: Չգիտեմ՝ կոնկրետ որ ղեկավարի մասին է խոսքը, դրա մասին պարզաբանումները պետք է ստանալ պարոն Փաշինյանից»։