Ընտրությունների ազատությունն արդեն իսկ հարցականի տակ է. Արմեն Աշոտյան
«Ընտրապայքարը ՀՀԿ-ն անց է կացնում ամբողջությամբ համաձայն այն նախնական ռազմավարական ծրագրի, որ ունեինք մինչև ընտրարշավը։ Մեզ հաջողվեց դառնալ ընտրապայքարի գլխավոր երկու ուժերից մեկն այն սև-սպիտակ իրականության մեջ, որը պարտադրվել է Հայաստանին»,- այսօր տեղի ունեցած մամուլի ասուլիսի ժամանակ ասաց ՀՀԿ փոխնախագահ Արմեն Աշոտյանը։
«Անկախ բազմաթիվ խոչընդոտներից, որոնց բախվում է ՀՀԿ-ն ընտրապայքարի ընթացքում՝ անհավասար հանրավորություններ քաղաքական գովազդի համար, իշխանության կողմից վարչական ռեսուրսի անխնա կիրառում, ԿԸՀ-ի պասիվ վերաբերմունք ամեն օր մեր կողմից բարձրաձայնվող ընտրախախտումների մասին, այդուհանդերձ մեր ասելիքը հաջողվում է տեղ հասցնել։ Այս երկու շաբաթվա ընթացքում մեզ հաջողվել է բացել հազարավոր մարդկանց աչքեր, մեր ուղերձները հասցնել հազարավոր քաղաքացիներին։ Երկրում կա ատելության, վախի, անհանդուրժողականության և այլատյացության մթնոլորտ, որի հեղինակն անձամբ Նիկոլ Փաշինյաննն է»,- ասաց նա։
Արմեն Աշոտյանը շեշտեց, որ իրենց մտահոգությունները տեղ հասցնելու համար կիրառում են բոլոր հնարավոր հարթակները, և եթե ընտրարշավը լիներ քիչ երկարատև, ՀՀԿ-ն կարող էր փաստել, որ մտահոգ քաղաքացիների շարժումը վեր է ածվում լուրջ երևույթի։
«Մենք այսօր էլ հավակնում ենք տասնյակ հազարավոր ձայների, մենք հավակնում ենք ԱԺ-ում լինել սկզբունքային և արմատական ընդդիմություն»,- ասաց նա։
ՀՀԿ փոխնախագահը շեշտեց, որ ընտրությունների ազատությունն արդեն իսկ հարցականի տակ է, որովհետև այն խայտառակ ճնշումները, որոնք կիրառվում են ՀՀԿ շտաբեր այցելած քաղաքացիների նկատմամբ, թույլ չեն տա խոսել ազատ ընտրությունների մասին։
«Այս ընտրությունները չեն լինի նաև արդար։ Գործող իշխանությունների գործելաոճը՝ փակել ընդդիմության բերանը, նույնպես հարցականի տակ է դնում ընտրությունների արդարությունը։ Նիկոլ Փաշինյանը, անտեսելով երկրի առջև ծառացած խնդիրները, թողել է վարչապետի պաշտոնը և արձակուրդ է վերցրել։ Սա նշանակում է, որ քաղաքական ղեկն այսուհետ ևս ցավոք լինելու է մի խմբի ձեռքում, որը գերադասում է սեփական շահը պետական շահից։ ՀՀ իշխանություններն ադեկվատ չեն Հայաստանին նետված մարտահրավերներին։ Այս իշխանությունները նաև ավերածություններ են գործել մարդկանց հոգիներում և սրտերում, խախտել բազմաթիվ չգրված օրենքներ»,- ասաց Արմեն Աշոտյանը։
Գաղտնալսման մասին
Արմեն Աշոտյանը նշեց, որ երեկվա գաղտնալսումը իշխանություններին զրկեց քանիցս շահարկվող այն դրույթից, որ Հայաստանում քաղաքական կոռուպցիա չկա, և դատարաններն անկախ են։
«Ինչպես տեսանք, ՀՀ ուժային կառույցների ղեկավարները դատավորներին փոխանցում են վարչապետի քաղաքական որոշումները, և դրանք վեր են ածվում դատական ակտերի։ Ես մի հետևություն ևս արեցի, հասկացա, որ ԱԱԾ ղեկավարն ավելի պետականամետ է, և ավելի լավ վարչապետ կլիներ, քան Նիկոլ Փաշինյանը»,- ասաց ՀՀԿ փոխնախագահը։
Նա ուշադրություն հարվիրեց այն հանգամանքի վրա, որ ՀՀԿ-ն երեկ չի չարախնդացել գաղտնալսման վրա, հակառակը, ինքն անձնապես մտահոգվել է, որ իր երկրի վարչապետին կարող են գաղտնալսել։
«Փաստորեն նրա վրա բազմաթիվ կոմպրոմատներ կան, Աստված գիտի՝ էլ ինչ խոսակցություններ կան»,- նշեց նա՝ կասկած հայտնելով, որ եթե մեկին հաջողվել է գաղտնալսել երկրի առաջին դեմքին, որտե՞ղ է երաշխիքը, որ հակառակորդը նման բան անել չի կարող։
Հայ-թուրքական հարաբերությունների մասին
Արմեն Աշոտյանն ասաց, որ հարաբերությունների հնարավոր կարգավորման պարադիգմը նույնն է. առանց նախապայմանների հնարավոր հարաբերություններ բոլոր հարթություններում։
«Սա այս պահին շատ-շատ տեսական է, Թուրքիայի այսօրվա ղեկավարը աչքի է ընկնում ռազմատենչ, ծավալապաշտական և ագրեսիվ քաղաքականությամբ, ինչն էլ բերում է Թուրքիայի բախումներին իր գրեթե բոլոր հարևանների հետ»,- ասաց բանախոսը։
Հայ-ռուսական հարաբերությունների մասին
Ինչ վերաբերում է հայ-ռուսական հարաբերություններին, Աշոտյանի խոսքով, արտաքին քաղաքականությունը Նիկոլ Փաշինյանի Աքիլլեսյան գարշապարերից մեկն է, երկրորդ Աքեիլլեսյան գարշապարը Արցախի հարցն է։
«Եթե իրենք կարծում են, որ հայ-ռուսական հարաբերությունների ճիշտ մակարդակ է, երբ ՌԴ արտգործնախարարության մամլո խոսնակը սխալ է հանում Նիկոլ Փաշինյանի հայտարարությունները, դրանք տարակուսելի հայտարարում, ապա այդ մակարդակը գուցե հարիր է գործող վարչակազմին, բայց ոչ երբեք՝ հայ-ռուսական ռազմավարական հարաբերություններին։
Մեր օրոք է հայ-ռուսական հարաբերությունների վերելք արձանագրվել, մեր օրոք է Հայաստանը մտել ԵԱՏՄ, ղեկավար պաշտոններ ստացել ԵԱՏՄ-ում և ՀԱՊԿ-ում, մեր օրոք է հայ-ռուսական ռազմաարդյունաբերական համագործակցությունը բերել նրան, որ Հայաստանն այսօր ունի ամենաժամանակակից ռուսական արսենալը։ Իսկ Նիկոլ Փաշինյանը ստեղծում է մի միջավայր, ուր արտաքին ներդրումների հոսքը կտրուկ կրճատվել է, մի միջավայր, երբ ՌԴ ԱԳՆ մամուլի խոսնակն իրեն թույլ է տալիս Փաշինյանին մեղադրել սուտ լուրեր տարածելու մեջ։ Որքանով ես հասկացա Մարիա Զախարովայի ասածի տողատակերը, ապա եթե կենցաղային հայերենով թարգմանենք, կստացվի՝ «Էս ի՞նչ եք անում, տղերք»»,- ասաց նա։
Հարակից հրապարակումներ`
- Մարիա Զախարովա. ՀՀ վարչապետի մամուլի խոսնակի հայտարարությունն անհանգստություն է առաջացնում. Tert.am
- Գաղտնալսումը մոնտաժված է, կան դրվագներ, որոնք կտրատված ու հանված են. Փաշինյան
- Ադրբեջանը հիմա կստորագրի ցանկացած թուղթ, որտեղ միայն Հայաստանն է՝ առանց Արցախի. քաղաքագետ
- Հրապարակվել է գաղտնալսված խոսակցության երկրորդ մասը
Լրահոս
Տեսանյութեր
Փաշինյանն ընդամենը մի տհաճ խոչընդոտ է հայրենիք ունենալու ճանապարհին. Զոհված զինծառայողի մայր