Ձեր վստահելի աղբյուրը

«Այն ժամանակահատվածը, որ մեր կառավարությունն  ունեցել է սովորելու, հարմարվելու, իրավիճակը ուսումնասիրելու, իներցիոն բյուջեներ հաստատելու համար, արդեն սպառվել է։ Սկսվող տարում անհրաժեշտ է լինելու շատ հետևողական, մանրակրկիտ և ծանր աշխատանք»,- այսօր տեղի ունեցած մամուլի ասուլիսի ժամանակ ասաց Երևանի մամուլի ակումբի նախագահ Բորիս Նավասարդյանը։

«Հուսով եմ, որ կառավարությունն ի վիճակի կլինի այդ առաքելությունն իրականացնել, թեև մենք շատ լավ հասկանում ենք, որ 2018-ը հրաշքների տարի էր, և դժվար թե այդպիսին լինի նաև մյուս տարին։ Հետագա խնդիրները միայն ծանր աշխատանքով է հնարավոր լինելու լուծել։ Հենց հունվար-փետրվար ամիսներից պետք է տեսնենք լուրջ աշխատանք»,- ասաց նա։

Բորիս Նավասարդյանը համոզմունք հայտնեց, որ միջազգային հանրության շրջանում Հայաստանի վարքի բարձրացումը հանգեցնելու է խոշոր կոնտրոնների կողմից մեր երկրին տրամադրվող օգնության ծավալի մեծացմանը։ Նրանցից որոշների միջև կարող է նույնիսկ մրցակցություն նկատվել՝ ով ավելի մեծ չափով օգնի Հայաստանին։

Անդրադառնալով Արցախյան հիմնախնդրի թեմային՝ նա նշեց, որ Արցախի կառավարման համակարգը հարմարեցված էր ՀՀ նախկին իշխանություններին։

«Ռազմական և քաղաքացիական մասով  Արցախի իշխանությունը սերտաճած էր Հայաստանի նախկին իշխանության հետ։ Մի կողմից Հայաստանից պահանջ կա, որ Արցախի ղեկավարության կողմից լինեն փոփոխություններ, մյուս կողմից Արցախը փորձում է պահպանել այսօր եղած համակարգը և չի ուզում ամեն ինչ կտրականապես փոխել։ Կարծում եմ՝ այս իրավիճակը կտևի մինչև 2020 թվականը, այսինքն՝  ԱՀ նախագահ Բակո Սահակյանի նախագահական ժամկետի ավարտը։ Այնպես որ, հեշտ չի լինելու։ Հարմարեցման, փոխադարձ ըմբռնման խնդիրը դեռ շատ ջանքեր է պահանջելու։ Միամտություն կլիներ ակնկալել, որ ամեն ինչ շատ հեշտ է լինելու։  Երկու կողմից էլ պետք է լուրջ աշխատանք տանել»,- ասաց Երևանի մամուլի ակումբի նախագահը։

Հարցին՝ արդյոք  Արցախում տեղի ունեցած փոփոխությունները հետևանք էին ազատամարտիկ Սասուն Միքայելյանի հայտարարությա՞ն, Բորիս  Նավասարդյանը պատասխանեց՝ վերջինիս հայտարարությունն ուղղակի հարմար առիթ էր, պաշտոնանկությունների համար կարող էին այլ առիթներ ևս լինեին։

Անդրադառնալով Ադրբեջանի ԱԳ նախարար Էլմար Մամեդյարովի այն հայտարարությանը, որ իրենք հայ գործընկերոջ հետ միասին կարծես համաձայնության են գալիս, բանախոսը շեշտեց՝ նման կարգի հայտարարություններ շատ ենք լսել։

«Ադրբեջանը պետք է և ագրեսիվ, և հույսեր պարունակող հայտարարություններ անի, բայց մենք հասկանում ենք, որ Արցախյան հարցը կախված չէ նրանից, թե ով է Հայաստանում իշխանության գլխին։ Չեմ կարծում, որ Հայաստանի կողմից կտրուկ փոփոխություններ արժե ակնկալել։ Չեմ սպասում, որ գալիք  տարի լուրջ փոփոխություններ կլինեն»,- ասաց նա։

Լրագրողները հետարքրքվեցին՝ ինչի՞ մասին կարող է խոսել վերջին շրջանում Ադրբեջանի հարաբերական հանգստությունը։ Բորիս Նավասարդյանը նկատեց՝ քանի որ Հայաստանում իրավիճակ է փոխվել, Ադրբեջանն իր հերթին հոգեբանական ճնշում է գործադրում, իբրև թե՝ ընտրեք՝  հետագա բանակցություններն իրականացնել կառուցողական միջավայրում, թե Ադրբեջանի կտրուկ գործողությունների  ֆոնին։

Ինչ վերաբերում է ՀԱՊԿ-ի գլխավոր քարտուղարին, Բորիս Նավասարդյանն ասաց, որ
Հայաստանը դեռ երկար տարիներ մնալու է ՀԱՊԿ անդամ, որովհետև մեզ համար կարևոր են մնում ՌԴ-ի հետ խորը ռազմավարական հարաբերությունները։

«Եթե Ռուսաստանի համար կարևոր է, որ Հայաստանը մնա ՀԱՊԿ-ում, ուրեմն Հայաստանը կմնա ՀԱՊԿ-ում։ Ինչ վերաբերում է գլխավոր քարտուղարին, ակնկալում եմ փոխզիջումային լուծում, համարյա բացառում եմ, որ Հայաստանի ներկայացուցիչը մնա։ Բելառուսը կարողանալու է հասնել նրան, որ այդ պաշտոնում նշանակվի Բելառուսի ներկայացուցիչը։ Բայց Հայաստանը սրա դիմաց ինչ-որ բան է «պոկելու», ձրի չի հանձնելու ՀԱՊԿ գլխավոր քարտուղարի պաշտոնը։ Ինչ վերաբերում է Բելառուսի նախագահին, ապա նա ցույց տվեց, որ սկանդալային գործիչ է, նա ընդամենն իր իմիջի ամրապնդման վրա էր խաղում»,- ամփոփեց բանախոսը։