Վահագն Գրիգորյանը պատգամավորական մանդատից հրաժարվելու դիմում է ներկայացրել. Միրզոյան
«Իմ քայլը» խմբակցության անդամ Վահագն Գրիգորյանն պատգամավորական մանդատից հրաժարվելու դիմում է ներկայացրել։ Այս մասին այսօր ԱԺ նիստի ժամանակ հայտարարեց խորհրդարանի նախագահ Արարատ Միրզոյանը։
Նա հիշեցրեց, որ եթե դիմումի հրապարակումից հետո մեկ շաբաթվա ընթացքում պատգամավորը գրավոր դիմումով հետ է վերցնում հրաժարականի մասին դիմումը, ապա ԱԺ նախագահն այդ մասին հանդես է գալիս հայտարարությամբ, եթե ոչ՝ նրա լիազորությունների դադարեցման մասին կազմվում է արձանագրություն։ Արձանագրության հրապարակման պահից հրաժարականը համարվում է ընդունված։
Արարատ Միրզոյանը հայտարարության կարգով նաև հիշեցրեց, որ 1990 թվականի ճիշտ այս օրերին Բաքվում ընթանում էին հայկական ջարդեր։
«Ես կարծում եմ, որ մենք միակամ ենք դատարպարտելու այս բռնությունները։ Մենք, որպես ժողովուրդ, որն իր պատմության ընթացքում մի քանի անգամ առերեսվել է այսպիսի ողբերգության հետ, չենք կարող հանդուրժել բռնություն որևէ ազգային փոքրամասնության նկատմամբ»,- ասաց ԱԺ նախագահը։