Ձեր վստահելի աղբյուրը

Վարչապետ Նիկոլ Փաշինյանն այսօր ֆեյսբուքյան ուղիղ եթերում հայտարարեց, որ լրատվական դաշտում փորձ է արվում ներկա իշխանությունը հանրապետականացնել։

«Ասել, թե ոչ մի տարբերություն չկա, այս իշխանությունն այնպիսին է, ինչպիսին էր Հանրապետական իշխանությունը։ Եվ սրա համար բերվում են անհերքելի փաստարկներ: Ինչո՞ւ անհերքելի, օրինակ, ասում են, թե հանրապետականները, նախորդ վարչապետը նույնպես երկու ականջ, մի քիթ, մի բերան, երկու աչք, երկու ոտք ու ձեռք ունեին, այս իշխանությունն ու վարչապետն էլ նույնն ունեն, բացարձակ ոչ մի տարբերություն: Այս վարչապետն էլ նույնն ունի։ Սա արվում է ցույց տալու համար, թե Հայաստանում բացարձակ ոչ մի բան չի փոխվել», - ասաց Նիկոլ Փաշինյանը։

Նրա խոսքով՝ այդ քարոզչական  արշավի մեջ առանձնահատուկ տեղ է զբաղեցնում իր ընտանիքի և մերձավոր քաղաքական թիմի դեմ տեղի ունեցող քարոզարշավը: 

«Իմ որդին ծառայում է ՀՀ զինված ուժերում: Այս փաստն առանձնապես ուշադրության կարիք չունի, բայց հիմա նա եկել է արձակուրդ: Եվ հիմա դա առիթ է դարձել հակաքարոզչության, որ ո՞նց, վարչապետի որդին եկել է արձակուրդ: Ոչ մեկին չի հետաքրքրում, որ ՀՀ զինված ուժերի՝ առանց բացառության բոլոր զինվորները 6 ամիս ծառայելուց հետո գալիս են արձակուրդ, բայց, բնականաբար, տասնյակ հազարավոր զինվորների արձակուրդ գալը վերնագրերում չի հայտնվում, վերնագրերում հայտնվում է վարչապետի որդու արձակուրդ գալը: Կամ, իմ ընտանիքի անդամները կարող են մտնել խանութ, առօրյա առևտուր անել՝ 5000- 10000 դրամի, նույնիսկ 50000 դրամի, և դա դառնում է շատ մեծ փիառ իրադարձություն, որ վարչապետի ընտանիքի ճոխ և աննախադեպ առևտուրը, և էսպես շարունակ: Սրա հիմնական իմաստն է՝ ցույց տալ մարդկանց, որ այն ամենը, ինչ տեղի է ունեցել Հայաստանում, անիմաստ է, բան չի փոխվել»,- ասաց վարչապետը:

Նար խոսքով՝ սրա տրամաբանությունը հետևյալն է, որ եթե ոչինչ չի փոխվել, ուրեմն ինչ տարբերություն՝ էս իշխանությունն է, թե նախորդը. «Տեսեք հանրապետականներն էլ էին շոր հագնում, այս իշխանությունն էլ, այն իշխանություններն էլ էին խաշ ուտում, նոր իշխանություններն էլ են նույնը անում կամ այսօրվա վարչապետն էլ է մեքենայով ման գալիս, նույնիսկ զրահապատ: Ասում են, պատկերացնո՞ւմ եք ուղղաթիռով տեղ է գնում, բա խայտառակություն չի, էշով, ձիով, սայլով պետք է գնա, որ հասկանանք երկրում բան է փոխվել:  Սա հուսահատության քարոզչություն է, որ բան չի փոխվի, յոլա գնացեք, եղունգ ունեք՝ գլուխ քորեք, արտագաղթեք և էսպես շարունակ»:

Նիկոլ Փաշինյանը նշեց, որ կառավարությունը Հայաստանի ժողովրդին չի թալանում և սա այն փոփոխությունն է, որի մասին հասարակությունը երազել է երկար տարիներ. «Իշխանությունը ձևավորել է ժողովրդի կողմից: Իշխանությունը չի փորձելու ժողովրդի ձեռքից վերցնել իշխանությունը ձևավորելու հնարավորությունը: Եղունգներով իշխանությունը չենք պահելու: Եթե ժողովրդին պետք լինի, ապա մենք կլինենք այս կարգավիճակում, եթե ոչ, ապա չենք լինի: Ինձ համար անընդունելի կլինի այն վիճակը, եթե պարզվի, որ իմ վարչապետ լինելն ավելի շատ հարկավոր է ինձ, քան Հայաստանի քաղաքացիներին: Որ պահին այդպես լինի, ուրեմն ես անելիք չունեմ այս կարգավիճակում»:

Նա նաև անդրադաձավ տնտեսության մեջ խոստացված թռիչքային փոփոխությանը։ Ըստ նրա՝ դա տեղի կունենա այն ժամանակ, երբ արձանագրեն տեղի ունեցած փոփոխությունների առանցքային կարևորությունը և անշրջելիությունը, և տնտեսության մեջ կիրառեն նույն բանաձևը, որ բանաձևը կիրառել ենք քաղաքական փոփոխությունների ընթացքում. «Հետագա կյանքի փոփոխությունը նույնպես պետք է տեղի ունենա բոլոր քաղաքացիների մասնակցությամբ: Այդ փոփոխությունը աշխատանքով պետք է տեղի ունենա, և կառավարության խնդիրն է խրախուսել աշխատանքը։ Չի կարող լինել այնպիսի ռեժիմ, երբ որևէ մեկը, տանը բազմոցին պառկած, սպասում է, թե երբ է կառավարությունը փոխելու իր կյանքը։ Այդ մարդու կյանքը չի փոխվելու երբևէ և ընդհանրապես»:

Մանրամասները՝ տեսանյութում: