Ձեր վստահելի աղբյուրը

ԱԺ Եվրոպական ինտեգրման հարցերի մշտական հանձնաժողովի նախագահի թեկնածուի հարցի քննարկման ժամանակ ԼՀԿ խմբակցության պատգամավոր Տարոն Սիմոնյանը թեկնածու առաջադրված Արման Եղոյանին հարցրեց, թե ինչպես է վերաբերում ԵՄ իրավական ակտերի մոտարկմանը ՀՀ օրենսդրությանը, երբ ՀՀ-ն ԵԱՏՄ անդամ է:

«Դուք եվրոպագիտություն եք ուսումնասիրել և գիտեք, որ ԵՄ իրավունքը բովանդակում է 90 տոկոս տնտեսական իրավունք իր չորս հիմական իրավունքով` անձանց տեղաշարժ, կապիտալի տեղաշարժ և այլն: Եթե մենք ԵՄ տնտեսական իրավունքի մոտարկում պետք է իրականացնենք, այն պարագայում, երբ ԵԱՏՄ տնտեսական միության անդամ ենք, արդյոք դուք այստեղ իրականությունից կտրված խնդիր չե՞ք դնի ձեր առջև, կամ հանձնաժողովը կկարողանա այդ մոտարկումը ճիշտ իրականացնել, եթե առաջնային խնդիրը ԵԱՏՄ մոտարկումն է, քան ԵՄ»,- ասաց նա:

Արման Եղոյանի խոսքով՝ նախատեսված չորս ազատություններն առաջին հերթին վերաբերում են ԵՄ ներքին շուկային, որոնք ԵՄ ներսում մարդկանց ծառայությունների, աշխատուժի ազատ տեղաշարժման համար է, իսկ ԵՄ-ից դուրս երրորդ կողմերի հետ ԵՄ-ն կնքում է առանձին համաձայնագրեր, ինչպիսին ունի ՀՀ-ի հետ կնքված:

«Կախված, թե որ երկրի հետ է կնքվում համաձայնագիրը, արդեն դրանով էլ գծվում են այն սահմանները, կախված նաև տվյալ երրորդ երկրի ներպետական և առկա այլ միջազգային պայմանագրերի հետ, թե ինչքանով դրանք կարող են համատեղելի լինել տվյալ պետության արդեն իսկ կնքած այլ միջազգային պայմանագրերի հետ։ Համոզված չեմ, որ 90 տոկոսը տնտեսությանն է վերաբերում, բայց մեծ մասը, այո, տնտեսությանն է վերաբերում: Եթե մենք ԵԱՏՄ անդամ ենք, բնականաբար գործող օրենսդրությունում այն նորմերը, որոնք հակասության մեջ կմտնեն արդեն իսկ ՀՀ կողմից կնքված այլ միջազգային տնտեսական պայմանագրերի հետ, բնականաբար, դրանք չեն կարող մոտարկվել, եթե իհարկե այլ միջազգային պայմանագրերով այլ բաներ չդիտարկվի, կամ այլ պայմանագրերի ժամկետը չավարտվի: Այստեղ քաղաքական նաև որոշելու հարց է, եթե չկան արդեն իսկ կնքված և այս ԱԺ-ում վավերացրած պայմանագրերի հետ հակասություններ: Հակասող այլ պայմանագրեր տեխնիկապես հնարավոր չեն»,-ասաց նա:

Արման Բաբաջանյանն էլ հիշեցրեց, որ Արարատ Միրզոյանը նախօրեին հայտարարել էր, որ իրատեսական չէ ակնկալել, որ ՀՀ-ԵՄ համաձայնագիրը կվավերացվի ընթացիկ տարում և հետաքրքրվեց. «Ինչու՞ իրատեսական չէ օրնիբուն աշխատել և հասնել վավերացմանը, ինչո՞վ ենք կաշկանդված։

Եղոյանը պատասխանեց. «Այ սփյուռքի աջակցությունը կարելի է օգատգործել հենց այստեղ։ Բայց ինչ վերաբերում է տեմպին, ես չգիտեմ մնացած 19 երկրները և ԵՄ-ն երբ կվավերացնեն այդ համաձայնագիրը։ Այս աշխարահում դա ոչ ոք չգիտի, քանի որ դա կապված է  տվյալ երկրներում տիրող ներքաղաքական իրավճակներից, արտաքին աշխարհի հետ հարաբերություններից»։

ԼՀԿ խմբակցության պատգամավոր Անի Սամսոնյանն իր հերթին նշեց, որ նախկին գումարման խորհրդարաններում եվրաինտեգրման հանձնաժողովների ՕԳԳ-ն շատ ցածր է եղել։
«Ինձ մոտ տպավորություն է եղել, որ այդ հանձնաժողովը ստեղծվել է եվրոպացի մեր գործընկերներին ցույց տալու մեր անլուջ վերաբերմունքը եվրաինտեգրացիային։ Ես ուրախ եմ, որ հայտ եք ներկայացնում լինել այս հանձնաժողովի նախագահը և համակարգել այս հանձնաժողովի աշխատանքները, բայց միաժամանակ ուզում եմ լսել աշխատանքային պլանի մասին, թե ինչից եք մեկնարկելու Ձեր աշխատանքը»,- ասաց նա։

Անի Սամսոնյանը նաև հարց ուղղեց՝ ՀՀ-ԵՄ համաձայնագրի ո՞ր մասով են կատարվել հստակ քայլեր՝ նույն այդ համաձայնագրի կիրարկման համար։

Արման Եղոյանը հիշեցրեց, որ 2018 թվականի հունիսի 1-ից համաձայնագրի մոտ 80 տոկոսն ուժի մեջ է մտել։

«Մնացած 20 տոկոսի՝ ուժի մեջ մտնելու համար պետք է սպասել համաձայնագրի վավերացմանը»,- ասաց նա։

Անի Սամսոնյանը նաև հարց ուղղեց, թե ինչու մինչ օրս չի հրապարակվել համաձայնագրի իրականացման ճանապարհային քարտեզը։ Նա խնդրեց, որ ճանապարհային քարտեզն անպայմանորեն հրապարակվի։

Եղոյանը նշեց, որ վերջնական շտկումներ արվելուց հետո այն կհրապարակվի, գաղտնի չի պահվի։