Ձեր վստահելի աղբյուրը

«Վերահսկողությունն այսուհետ ԱԺ-ի կարևորագույն գործառույթներից մեկն է լինելու։ Արդյունավետ և որակյալ վերահսկողության շնորհիվ է, որ կարողանալու ենք հակակշռել որպես իշխանության մի թև՝ գործադիր թևին»,- այսօր խորհրդարանում ասաց ԱԺ ֆինանսավարկային  և բյուջետային հարցերի մշտական հանձնաժողովի նախագահի թեկնածու Մանե Թանդիլյանը։

«Խորհրդարանի վստահությունը ստանալու պարագայում ես պատրաստվում եմ մեր հանձնաժողովը դարձնել այն բացառիկ վերահսկողական մարմինը, որն Ազգային ժողովին հնարավորություն է տալու լիարժեքորեն կատարել իր գործառույթը։ Այս հանձնաժողովի միջոցով մենք պետք է վերահսկենք օրենքների կիրառումը։ Այս հանձնաժողովի տիրույթում է գտնվում նաև բյուջետային գործընթացի վերահսկողությունը։ Մենք այլևս պետք է ստուգենք հանրային ֆինանսների ծախսման արդյունավետությունը։

Շատ եմ կարևորում հաշվեքննիչ պալատի դերը և դրա եզրակացությունների քննարկումը հանձնաժողովում։ Ինձ համար շատ կարևոր է հաշվեքննիչ պալատի անկախությունը։ Հանձնաժողովի աշխատանքները շատ մեծ են նաև Կենտրոնական բանկի վերահսկողության և համագործակցության մասով»,- ներկայացրեց Մանե Թանդիլյանը։

ԱԺ պատգամավորը շեշտեց՝ չի լինելու մի հարց, որը կարժանանա հանրային ուշադրության, և իրենց հանձնաժողովն այդ հարցի առնչությամբ լսումներ չի կազմակերպի։ Նա նաև նշեց, որ հանձնաժողովի համագործակցությունը շատ սերտ է լինելու անկախ կառույցների հետ։

«Մենք պետք է կարողանանք շահագրգիռ մարմինների հետ քննարկումներ կազմակերպել՝ ընդունելի և որակյալ որոշումներ ընդունելու համար։ Ուզում եմ շնորհակալություն հայտնել նախորդ գումարման այն պատգամավորներին, որոնք այս հանձնաժողովում սրտացավ և ջանասեր աշխատանք են տարել, դա տևել է տարիներ և տվել է արդյունք, որովհետև հենց ծրագրային բյուջետավորումն է  մեր ֆինանսների կառավարումը դարձնելու արդյունավետ»,- ասաց Մանե Թանդիլյանը։

«Իմ քայլը» խմբակցության պատգամավոր Արմեն Փամբուխչյանը Թանդիլյանին խնդրեց նշել այն երեք ոլորտները, որտեղ բյուջեն պետք է շռայլ գտնվի, խնայողություններ չլինեն։

«Ընդհանրապես ինձ համար ծախսումը ներդրում է մեծ հաշվով։ Կան ոլորտներ, որտեղ այն վերակերպվում է կապիտալ ծախսերի։ Օրինակ կրթության, ՏՏ ոլորտները։ Գիտեք, որ բյուջեն ունի սահմանափակումներ ծախսային հոդվածների ու կապիտալ ներդրումերի, շատ կուզենամ, որ մենք ենթակառուցվածքների վրա ավելի շատ ուշադրություն դարձնենք, ծախսումներն ուղղենք այդտեղ, որպեսզի կարողանանք տնտեսական զարգացման երկարաժամկետ հնարավորություն ապահովվենք»,- պատասխանեց Թանդիլյանը։

«Բարգավաճ Հայաստան» կուսակցության պատգամավոր Սերգեյ Բարգրատյանը Թանդիլյանից հետաքրքրվեց, թե հարկեր/ՀՆԱ հարաբերության ո՞ր ինտերվալն է համարում լավագույնը։ Թանդիլյանի խոսքով՝ այդ հարաբերությունն այսօր բավարար մակարդակի վրա չէ. «Լավագույն պատկերը մենք այս պահին չունենք։ Պետք է կարողանանք քննարկման արդյունքում դրան լուծում տալ»։

«Իմ քայլը» դաշինքի պատգամավոր Ծովինար Վարդանյանն էլ հետաքրքրվեց գյուղատնտեսական ապահովագրությունից։

Ի պատասխան թեկնածուն նշեց, որ ապահովագրական ընկերությունների ավելացումը և մրցակցային դաշտ ստեղծելը պետք է նպաստի տարբեր ապահովագրական գործառույթների իրականացման, այդ թվում նաև գյուղատնտեսական. «Այդ առումով մենք կունենանք նաև գյուղատնտեսական վարկերի տոկոսների նվազեցում, եթե ունենանք ապահովագրական ընկերություններ, որոնց գործունեությունը հնարավորություն կտա նաև այստեղ շահեկան դուրս գալ»։

ԱԺ «Իմ քայլը» խմբակցության պատգամավոր Վահե Հովհաննիսյանն էլ Մանե Թանդիլյանից հետաքրքրվեց վարկերի բարձր տոկոսների և որոշ նախկին պաշտոնյաների կողմից վարկային պարտավորությունների ոչ պատշաճ կատարման մասին։

«Այդ տոկոսը մնացել է հասարակ քաղաքացիների վրա։ Ուզում եմ իմանալ Ձեր տեսակետը՝ հնարավո՞ր է, որ բարձրաստիճան պաշտոնյաների հայտարարագրերի հետ հրապարակվեն նաև նրանց վարկային պատմությունները, որպեսզի քաղաքացիները տեսնեն, թե ինչպես են նրանք կատարում իրենց վարկային պարտավորությունները»,-հարց ուղղեց նա։

Մանե Թանդիլյանը նշեց, որ չվճարված հարկային պարտավորությունը նույնպես ռիսկային այն բաղադրիչն է, որն ազդում է տոկոսադրույքի և նրա գոյացման վրա՝ դարձնելով այն ավելի բարձր. «Այո, ես գտնում եմ, որ հայտարարագրումների մեջ անհրաժեշտ է տեսնել ոչ միայն վարկային պատմությունը, այլև վճարման ենթակա գումարը, իմանալու, թե որքանով է այն համահունչ նրանց ստացած եկամուտներին։ Այո, հայտարարագրումն անհրաժեշտ է, որպեսզի կարողանանք վերահսկել պաշտոնյաների վարքագիծը»։

ԱԺ պատգամավոր Համազասպ Դանիելյանը ևս հարց ուղղեց Մանե Թանդիլյանին, թե քանի խորհրդարանական վերահսկողական գործիքներ ունի նրա կողմից ղեկավարվելիք հանձնաժողովը ոստիկանության, ԱԺ-ի և ՊԵԿ-ի նկատմամբ։

«Մենք գտնում ենք, որ որևէ օղակ չպետք  է դուրս մնա ԱԺ վերահսկողությունից։ Այն լծակը, որ ունի խորհրդարանը կառավարության նկատմամբ, պետք է ունենա բոլոր տեսակի գերատեսչությունների կոմիտեների և առընթեր մարմինների նկատմամբ։ Կառավարության անդամը պարտավորություն ունի գալու, նստելու ԱԺ դահլիճում և հարցերի պատասխանելու»,- ասաց նա։

«Իմ քայլը» դաշինքից պատգամավոր Հայկ Գևորգյանը հետաքրքրվեց՝ ընդդիմության համար ո՞րն է ավելի ազդեցիկ պաշտոն՝ ԱԺ փոխնախագահի, որին Թանդիլյանն ավելի վաղ հավակնում էր, թե ԱԺ ֆինանսավարկային  և բյուջետային հարցերի մշտական հանձնաժողովի նախագահի թեկնածուի։

«Իրականում ազդեցությունները հավասար են, բայց տարբեր, մեկը քաղաքական է, մյուսը՝ մասնագիտական։ Անկախ նրանից՝ որ պաշտոնում կլինեմ, այդ պաշտոնի գործառույթները լավագույնս իրացնելու եմ»,- պատասխանեց Թանդիլյանը։

Մեկ այլ պատգամավոր՝ Հերիքնազ Տիգրանյանն անդրադարձավ հանրային ֆինանսների արդյունավետ կառավարմանը՝ նշելով, որ անհրաժեշտություն կա բարձրացնելու այն։

«Պետական բյուջեից կատարվել են աննպատակ ծախսեր, սակայն իրավական  հետևանքներ չեն եղել»,-ասաց պատգամավորը։

Հանձնաժողովի նախագահի թեկնածուն ի պատասխան նկատեց, որ հանրայնացումն ու հրապարակային աշխատանքը միայն բարելավելու են նշված ոլորտը։