Ձեր վստահելի աղբյուրը

Երևանի քաղաքային նախկին իշխանության և նոր իշխանության կողմից հանրային տրանսպորտի ոլորտում առաջարկվող փոփոխությունները տարբեր են։ Լրագրողների հետ զրույցում ասաց Երևանի քաղաքապետարանի տրանսպորտի վարչության պետ Հենրիկ Նավասարդյանը։

«Նույն փոփոխությունները չեն եղել։  2012-13 թվականներին երթուղային ցանց է մշակվել,  որի շնորհիվ  ստացել ենք 249 ավտոբուս Չինաստանից, 170 ավտոբուս ներկրվել է մասնավոր կազմակերպությունների կողմից։ Այդ ընթացքում 30 միկրոավտոբուսային երթուղի է փակվել, կամ փոխարինվել են ավտոբուսայինով։ Այսինքն առաջին փուլում մենք արդեն որոշակի աշխատանքներ կատարել էինք»,- նշեց նա։

Հ. Նավասարդյանի խոսքով, 2013 թվականից հետո, քանի որ նոր երթուղային ցանցի  մշակման խնդիր առաջացավ, որպեսզի այդ ընթացքում մրցույթներ չկատարվեին և  այդ ցանցի ներդրումը  ևս մի քանի տարով չհետաձգվեր, որոշակի ընդմիջում էր տրվել։

«Հիմա այն պահն է, երբ որ պետք է վերջնական քննարկման արդյունքներից հետո պարզ լինի  նոր առաջարկվող երթուղային  ցանցի հետագա վիճակը, որից հետո տրանսպորտային ոլորտում այդ փոփոխությունները կկատարվեն,- նշեց քաղքապետարանի պաշտոնյան։

Հարցին, թե ինչո՞ւ նախկին քաղաքապետ Տարոն Մարգարյանին չհաջողվեց լուծել տրանսպորտի խնդիրը, ի՞նչ եք կարծում՝ Հայկ Մարությանի կողմից մատնանշված 2-3 տարում կլուծվի, Հ. Նավասարդյանն ասաց.  «Այն ժամանակ էլ ամբողջությամբ ավարտված չէր քննարկումը։ Շարունավում է այդ քննարկումը, դեռ քննարկման անհրաժեշտություն կա, լրացուցիչ ուսումնասիրության խնդիրներ կան։

Երկու դեպքում էլ քաղաքական կամքի խնդիր կա, որ պետք է անպայման տրանսպորտի հարցը լուծվի։ Այսօր տրանսպորտի հարցը մեր ազգաբնակչության համար թիվ մեկ խնդիրներից մեկն է, յուրաքանչյուր իշխանություն իր առջև  նատակ է դնում այդ հարցի լուծումը»։

Նա նշեց, որ այսօր գծատերեր կան,  հավանաբար կազատվեն նրանցից  երթուղային նոր ցանցի ներդրման ժամանակ։