Ձեր վստահելի աղբյուրը

Ազգային ժողովի «Իմ քայլը» խմբակցության պատգամավոր Վարազդատ Կարապետյանն խորհրդարանում Կառավարության ծրագրի քննարկման ժամանակ ներկայացրեց մի քանի խնդրահարույց կետեր, որոնց մասին բարձրաձայնում են թե ընդդիմադիրները, թե ԶԼՄ-ները:

Ըստ նրա՝ առաջինը վերաբերում է տնտեսական հեղափոխության թեմային. «Մենք պետք է հստակ սահմանենք՝ ինչ է հեղափոխությունը, քանի որ ընկալման տարբերություններ կան: Հնարավոր է՝ տնտեսական հեղափոխությունն ընկալենք որպես մի իրավիճակ, որ ավելի շատ ներդրումներ պետք է արվեն, կամ՝ ՀՆԱ-ն պետք է կրկնապատկվի, արտահանումը կազմի ՀՆԱ-ի 50%-ը և այլն, բայց երբ խոսում ենք հեղափոխությունից, նշանակում է դրա տակ ինչ-որ փիլիսոփայություն, արժեքների համակարգ կա: Առավելապես ինչպես հեղափոխության ժամանակ, մարդն ամենակարևոր արժեքն է  գործընթացի, և այս ամբողջ պրոցեսի հիմանական դերակատարը»,- նշեց պատգամավորը:

Վարազդատ Կարապետյանի խոսքով՝ Հայաստանում բացառիկ հնարավորություն ունենք մարդկային ստեղծարար ուժը դարձնել տնտեսական աճի հիմնական գործոն:

«Այսինքն՝ մենք հստակ հայտարարում ենք, որ Հայաստանում ոչ թե կապիտալն է տնտեսական աճի շարժիչ ուժը, այլ մարդկային ստեղծարար ուժը: Հենց այստեղ է հեղափոխությունը: Եթե մեր գործընկերներն ուզում են մեզ նոր ճանապարհներ ցույց տալ, պետք է ցույց տան, թե ինչպես անել, որ մարդիկ ավելի շատ ստեղծագործեն մեր երկրում, ավելի լավ աշխատեն, ավելի լավ զգան իրենց այդ աշխատանքի մեջ, սիրեն այդ աշխատանքը, մենք էլ մերը վերջիվերջո: Մեր դահլիճում տխուր է օրն անցնում, ժպիտ չկա մեր դահլիճում: Դա նշանակում է, որ մենք էլ մեր աշխատանքից հաճույք չենք ստանում, և դա շատ վատ է»,- նշեց Վարազդատ Կարապետյանը:

Այս խոսքերն առաջացրեց դահլիճում նստած պատգամավորների և վարչապետի ծիծաղը:

Պատգամավորը շարունակեց. «Մենք պետք է մեր աշխատանքից սկսենք հաճույք ստանալ, իհարկե, այստեղ լուսամուտներ չկան, ամեն ինչ արված է, որ մենք մեզ վատ զգանք, բայց մենք պետք է կոտրենք այս իրավիճակը: Մենք պետք է ժպտանք, և այն ամենը, ինչ ասում ենք մեր ժողովրդին, պետք է ժպիտով ասենք, քանի որ մեր ժողովրդի համար եզակի հնարավորություն է վերցնել իրավիճակն իր ձեռքը տնտեսության զարգացման և ստեղծարար աշխատանքը դարձնել առանցքային գործոն զարգացման համար»:

Նրա խոսքով՝ քննադատություններ են հնչում, թե Կառավարության ծրագիրը շատ նմանություններ ունի նախորդ կառավարությունների ծրագրերին: «Եթե վերցնենք՝ ինչ անել հարցի տեսնակյունից, հնարավոր է, շատ են նմանությունները: Օրինակ՝ ճանապարհ պետք է սարքել, դա և նախորդ, և այս կառավարության խնդիրներից մեկն է: Բայց հիմնական տարբերությունը հետևյալն է՝ մենք հայտարարում ենք, թե ինչ նպատակով պետք է աշխատենք, այսինքն՝ ում համար է այս ամեն ինչն արվում, և ինչպես անենք: Եվ հայտարարվում է, որ հիմնական նպատակը մարդն է ու մարդու զարգացումը»,- ասաց պատգամավորը:

Անդրադառնալով մեկ այլ քննադատությանը, թե տնտեսական աճի թիրախ է դրված 5 տոկոսը,  Վարազդատ Կարապետյանը նշեց, որ եթե լիներ 9 կամ 15 տոկոս, ի՞նչ կփոխվեր դրանից: Հինգ տոկոսն, ըստ նրա, նվազագույն շեմն է, բայց  ինչպիսին կլինի իրավիճակը, շատ դժվար է կանխատեսել:

Պատգամավորն ասաց, եթե ուզում են երկիրը զարգանա, լավատեսության պաշարը չպետք է թուլանա, այլ պետք է ուժեղանա: Այստեղ, ըստ նրա, բոլորն ունեն իրենց դերը: «Պետք է միշտ սովորել, պետք է միջավայր ստեղծել, որ բոլորս հաճույք ստանանք մեր սովորելուց: Տարբեր գործոններ կան, որ մարդկանց դրդում են ծուլության: Ամենակարևոր գործոնը՝ եթե մարդը չի գտնում իր սրտի թելադրած կրթությունը կամ աշխատանքը, գնում է ծուլության: Այսինքն՝ մենք պետք է այնքան բազմազանություն ապահովենք և մեր կրթական համակարգում, և տնտեսության մեջ, որ մեր երկրի  բոլոր քաղաքացիները իրենց հարմար,  իրենց սրտի թելադրած զբաղմունքն ու կրթությունը կարողանան գտնել»,- ընդգծեց պատգամավորը:

Վարազդատ Կարապատեյանը նշեց նաև, որ հիմա ընդդիմության դերը ճանապարհներ ցույց տալն է, իրենց նշած ճանապարհներին այլ տարբերակներ առաջարկելը