ՔԿ զինվորական քննչական գլխավոր վարչությունում հաշվառված հանցագործությունների քանակը նվազել է
2018թ. ընթացքում ՀՀ ՔԿ զինվորական քննչական գլխավոր վարչության ստորաբաժանումներում հաշվառվել է 1762 հանցագործության դեպք` նախորդ տարվա 1830-ի դիմաց: Վիճակագրական տվյալները վկայում են, որ հանցագործությունների թվաքանակը նվազել է 68-ով կամ 3,7%-ով: Այսօր Քննչական կոմիտեի զինվորական քննչական գլխավոր վարչության կողմից 2018 թվականի ընթացքում կատարված աշխատանքների ամփոփման ժամանակ նշել է ՔԿ նախագահի տեղակալ, զինվորական քննչական գլխավոր վարչության պետ Արտակ Կրկյաշարյանը։
ՔԿ փոխանցմամբ՝ ուսումնասիրությունները ցույց են տվել, որ նվազումը պայմանավորված է հիմնականում սպանության / 13-ով/, սպանության փորձերի /37-ով/, թմրանյութերի ապօրինի շրջանառության /28-ով/, պետի նկատմամբ բռնի գործողություններ կատարելու /42-ով/ և զինծառայողների փոխհարաբերությունների կանոնագրքային կանոնները խախտելու /33-ով/ դեպքերի նվազմամբ:
2018թ. ընթացքում ՀՀ քննչական կոմիտեի զինվորական քննչական գլխավոր վարչության ենթակա ստորաբաժանումների վարույթում քննվել է 4872 քրեական գործ կամ Կոմիտեի քննիչների վարույթում քննված ողջ քրեական գործերի / 25 675-ի/ 18. 9 %-ը:
Արձանագրված դեպքերից չբացահայտված են մնացել ընդամենը 49-ը:
2018 թվականին ՀՀ ՔԿ ԶՔԳՎ ստորաբաժանումներում քննվող քրեական գործերով ձերբակալվել է 39 անձ, որոնցից 32-ը եղել են զինծառայողներ, այդ թվում՝ 14 սպա, 3 ենթասպա, 1 պայմանագրային և 14 պարտադիր ժամկետային զինծառայող:
Զինվորական քննչական գլխավոր վարչության կողմից 2018 թվականին քննվել է կոռուպցիոն հանցագործությունների վերաբերյալ 273 քրեական գործ: Այդ գործերով որպես մեղադրյալ է ներգրավվել 178 անձ: Դատի է տրվել 92 անձ, որոնցից 1-ը գտնվել է կալանքի տակ:
Իրականացված մինչդատական վարույթի ընթացքում պարզվել է, որ ավարտված ավարտված գործերով հանցագործությամբ պետությանը պատճառված գույքային վնասը կազմել է 416.935.665 ՀՀ դրամ, որից վերականգնվել է 415.355.946 ՀՀ դրամը:
Դատարան ուղարկված, վարույթը ոչ արդարացման հիմքով կարճված քրեական գործերով և քրեական գործ հարուցելը մերժված նյութերով պետությանը պատճառված վնասը կազմել է 485.685.000 դրամ, որից 465.892.000 դրամը՝ պաշտոնեական և տնտեսական հանցագործությունների վերաբերյալ գործերով:
Մինչդատական վարույթում ձեռնարկված միջոցառումների շնորհիվ վերականգնվել է 418.889.000 դրամ կամ 89,9 %-ը , բացի այդ, կալանք է դրվել մեղադրյալների՝ 169.000 դրամ արժողությամբ գույքի վրա: Հարկ է նշել, որ ՀԿԳ քննության վարչության վարույթում քննված միայն մեկ քրեական գործով 2017 թվականին հայտնաբերված հանցագործությամբ պետությանը պատճառված շուրջ 398.620.500 դրամ վնասն ամբողջությամբ վերականգնվել է:
Պետք է նշել, որ վարույթում քննված բոլոր քրեական գործերով պետությանը պատճառված գույքային վնասից 2018 թվականին վերականգնվել է 421.643.000 դրամ:
Կրկյաշարյանի խոսքով՝ բավականին նվազել է ՀՀ քրեական օրենսգրքի 327-րդ հոդվածով նախատեսված հանցագործությունների կատարման համար հետախուզվող անձանց թվաքանակը և եթե 2018 թվականի հունվարի 1-ի դրությամբ այն կազմել էր 1170, ապա 2019 թվականի հունվարի 1-ի դրությամբ այն նվազել է մինչև 993:
Մանրամասները՝ Քննչական կոմիտեի պաշտոնական կայքում։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
