Մանսարդները պետք է բոլոր նորմերին համապատասխան լինեն. Մարության
Երևանի ավագանու նիստից հետո քաղաքապետ Հայկ Մարությանը լրագրողների հետ զրույցում անդրադարձավ մամուլի այն հրապարակումներին, որոնց համաձայն իր կինն աշխատում է քաղաքապետարանում, զբաղվում քաղաքացիների ընդունելություններով և մինչև անգամ պատասխանում ամուսնու հեռախոսին։
«Բնականաբար, նման բան չկա։ Բոլոր շահագրգռված անձինք՝ իմ ընկերները, որոնք կարող են օգտակար լինել, գալիս են և օգտակար են լինում»,- ասաց Մարությանը։
Անդրադառնալով Կենտրոնում ավտոկայանատեղիների գնի բարձրացման հարցին, նա ասաց՝ հարցը կարելի է քննարկել միայն տրանսպորտի խնդրի լուծումից հետո. «Մեր երազած Երևանը երբ լինի, երբ նաև լուծված լինի տրանսպորտային համակարգի հարցը, բնականաբար, ընդօրինակելով զարգացած երկրների փորձը՝ մենք կարող ենք կենտրոնը բեռնաթափելու համար նման սահմանափակում ունենալ: Բայց սա կարելի է քննարկել միայն տրանսպորտի համակարգի լուծումից հետո»։
Ինչ վերաբերում է մանսարդների կառուցմանը՝ նա նշեց. «Մենք նախատեսում ենք դրանց կառուցումը, որպեսզի այս խայտաբղետ իրավիճակը չլինի։Սա կլինի շատ գեղեցիկ։ Փարիզի օրինակը հենց այնպես չեմ բերել։ Քաղաքը շատ է գեղեցկանում, լուծում ենք հինգերորդ ճակատի և ֆինանսների հարցը, որ տանիքները վերանորոգելու համար այդքան գումարներ չենք ներդնելու։ Իհարկե, մանսարդները պետք է բոլոր նորմերին համապատասխան լինեն, նաև՝ անվտանգության հարցերով»։