Ագռավները կրկին անկում են
Երևանում ագռավների անկման նոր դեպքեր են գրանցվել։ Քաղաքացիները վերջին օրվա ընթացքում երկու ագռավի մարմին են լուսանկարել մայրաքաղաքի կենտրոնում՝ մեկը Իսահակյան փողոցում, մյուսը՝ Մաշտոցի պողոտայում։
Թռչունների լուսանկարները նրանք հրապարակել են սոցիալական ցանցում։ Թռչնաբան Սիլվա Ադամյանը ֆեյսբուքյան իր էջում նկատել է՝ սա պետք է անհանգստացնի բոլորին։
Սննդամթերքի անվտանգության տեսչական մարմինը քաղաքացիներից թռչունների անկման վերաբերյալ որևէ ահազանգ չի ստացել։ Հասարակայնության հետ կապերի բաժնի ղեկավար Անուշ Հարությունյանը Panorama.am-ի հետ զրույցում ասաց, ագռավների մասին քիչ առաջ տեղեկացել է սոցցանցերի գրառումներից։ Դրանց հեղինակներին կարձագանքի։
«Խնդրում եմ, անկած թռչուններ նկատելու դեպքում զանգահարել Սննդամթերքի անվտանգության տեսչական մարմնի թեժ գծին 010 206040 կամ 012 906090 համարներով և սպասել, մինչև մեր տեսուչը կմոտենա: Կամ էլ զանգահարել ՀԱԲԼԾԿ լաբարատորիա 010 454031 կամ 010 453841 համարներով և թռչունին տանել լաբորատոր հետազոտության»,-ասաց Ա. Հարությունյանը
Նա հիշեցրեց, մի քանի ամիս առաջ անկած թռչունների փորձաքննության արդյունքներով բոլորն անկել էին մեխանիկական պատճառներով։
«Դրանք ենթարկվել են ախտաբանաանատոմիական փորձաքննության (դիահերձում), ինչի արդյունքում ներկայացված բոլոր նմուշներում արձանագրվել են խորը, թափանցող մեխանիկական վնասվածքներ, որոշների մոտ գանգի և պարանոցի ողերի կոտրվածքներ, կտուցից արյունահոսություն: Քանի որ այդ վնասվածքները կարող էին առաջանալ նաև անկումների պատճառով, թռչնագրիպի առկայությունը բացառելու նպատակով՝ կատարվել է նաև թռչնագրիպի նկատմամբ ՊՇՌ մեթոդով հետազոտություն:
Ստացված բացասական արդյունքներով բացառվել է թռչնի գրիպը առկայությունը: Հետազոտական աշխատանքները շարունակվում են:
Հատկապես սոցիալական ցանցերում խտացված խուճապային տրամադրություններն անհիմն են, անհանգստության որևէ առիթ չկա»,-հայտնել էին տեսչական մարմնից։
Հարակից հրապարակումներ`
- Արագիլով այլևս լուր չեք ուղարկի
- ՍԱՊԾ. Վայրի թռչունների անկման պատճառը մեխանիկական վնասվածքներն են
- Բնապահպան. Թռչունների անկումը էկոլոգիական վատ վիճակի ցուցանիշ է
- Ինչո՞ւ են Երևանում թռչուններն անկում