Ձեր վստահելի աղբյուրը

«Մենք այսօր ունենք մոտ 51 հազար ՀԴՄ, որից 13 հազարը հին սերնդի ՀԴՄ-ներ են, բայց այս թվերը օր օրի փոխվում են»,- այս մասին խորհրդարանում լրագրողների հետ զրույցում հայտնեց ՊԵԿ նախագահ Դավիթ Անանյանը:

Լրագրողները ՊԵԿ նախագահից հետաքրքրվեցին, որ վարչապետի աշխատակազմի ղեկավար Էդուարդ Աղաջանյանի ընտանիքի հետ կապված «Զիգզագ» ընկերությունը ևս ՀԴՄ չի տալիս գնորդներին, ինչի համար ՊԵԿ-ի կողմից տուգանվել է։

Սրան ի պատասխան՝ Անանյանն ասաց. «Ես հասկանում եմ ձեր մասնագիտական ձգտումը՝ ամեն ինչի մեջ սենսացիա տեսնել: Չկա նման սենսացիա: «Զիգզագը» ունի օրինապահ հարկ վճարողի վարքագիծ: Տարբեր քննարկումների ժամանակ «Զիգզագի» ներկայացուցիչների հետ անմիջական շփումներում մենք գիտենք, որ նաև «Զիգզագի» ղեկավարությունն իր աշխատկազմին ՀԴՄ-ի տրամադրման պահանջ է ներկայացրել։ ՀԴՄ չտրամադրելու տարբեր պատճառներ կարող են լինել, օրինակ տվյալ պահին տեխնիկական անսարքություն լինի, կապի խափանում լինի։ Եթե տեսուչը հսկիչ գնում է կատարում և ՀԴՄ կտրոն չեն տրամադրում, դա պետք է արձանագրվի: Ուրիշ բան է, որ բողոքարկման հանձնաժողովին կարող են ներկայացվել փաստարկներ, որոնք կարող են հաշվի առնվել ՊԵԿ-ի կողմից»:

Անանյանն ասաց, որ առաջին անգամ ՀԴՄ կտրոն չտրամադրելու դեպքում՝ ոչ թե տուգանվում է, այլ նախազգուշացվում:

Լրագրողների դիտարկմանը, որ փաստորեն «Զիգզագի» դեպքում՝ դա առաջին դեպքը չի եղել, որ բանը հասել է տուգանելուն, նա արձագանքեց. «Երևի»։

Ինչ վերաբերում է հարցին, թե այս պահին  Հայաստանում ստվեր կա, նա պատասխանեց. «Ստվեր կա, այո։ Գնահատականները տարբեր են, եթե Ազգային վիճակագրական կոմիտեի տվյալները նայենք, իրենք դա ստվեր չեն անվանում, այլ չհաշվառվող տնտեսություն: Ըստ վիճակագրական կոմիտեի տվյալների, այն 25 տոկոսից նվազել հասել է 22 տոկոսի։ Այս պահին մենք  ոլորտային հարկունակ ստվերի գնահատման տեղեկատվական համակարգերն ենք ներդնում: Դեռ ձեռքի տակ չունենք այդ համակարգը: Կան առանձին գնահատականներ, որոնք չեմ հնչեցնի: Հիմա այդ գործիքի ստեղծման վրա ենք աշխատում»։

Նրա խոսքով՝  կան գործունեության ոլորտներ, որոնք ուզում են ստվերից դուրս գալ, բայց օրենսդրությունն այնպիսին է, որ ստվերից դուրս գալու պարագայում կարող են ունենալ ոլորտի համար հարկման այնպիսի բեռ, որը, իրենց գնահատմամբ, կլինի իրենց շահութաբերության հաշվին:

«Միկրոմակարդակում ստվերից դուրս գալը տվյալ ընկերության շահութաբերության հաշվին պետք է լինի: Բայց դա իրական շահութաբերություն չէ, այլ պետության հաշվին ձեռք բերված շահութաբերություն է»,- ասաց ՊԵԿ նախագահը։

Անդրադառնալով գործարար, նախկին պատգամավոր Սամվել Ալեքսանյանին պատկանող բիզնեսներին, Անանյանն ասաց, որ հանրագումարային առումով էականորեն ավելի շատ հարկ են վճարել 2018-ին, քան նախորդ տարիներին:

«Ինքը նաև ավելի թափանցիկ գործելու նկատառումներից ելնելով, նաև ոլորտային քննարկումների ժամանակ իրենց բիզնեսը սեգմենտավորել է, այսինքն, եթե մեկ տնտեսվարող սուբյեկտով տարբեր գործունեության ոլորտներում իրականացնում են գործունեությունը, հիմա բիզնեսը տարանջատում են  ըստ ոլորտների, ինչի արդյունքում ավելի թափացիկ են գործում և ավելի շատ հարկ են վճարում»,- հավելեց նա։