«Արդարադատության վերաբերյալ հարցման» ծրագրի շրջանակում Հայաստանում հարցումը կանցկացվի սեպտեմբերին
Արևելյան գործընկերության երկրներում արդարադատության արդյունավետությունը բարելավելու, դատական իշխանության համակարգում սոցիոլոգիական հարցումներ իրականացնելու և նմանաբնույթ մի շարք հարցադրումների քննարկման նպատակով Համաշխարհային բանկի պատվիրակությունն այսօր հանդիպել է Բարձրագույն դատական խորհրդի ներկայացուցիչների հետ: Այս մասին հայտնում են Բարձրագույն դատական խորհրդի մամուլի և հասարակայնության հետ կապերի ծառայությունից:
Հանդիպմանը մասնակցում էին Բարձրագույն դատական խորհրդի նախագահի պաշտոնակատար Գևորգ Դանիելյանը, Համաշխարհային բանկի արդարադատության բարեփոխումների բաժնի մասնագետ Եվա Միլիսը, արդարադատության բարեփոխումների փորձագետ Մարիա Մատիչը։
Գևորգ Դանիելյանը, ողջունելով հյուրերին, շնորհակալություն է հայտնել Բարձրագույն դատական խորհրդի հանդեպ դրսևորած գործնական փոխհարաբերության համար, ապա ընդգծել, որ «Արդարադատության վերաբերյալ հարցման» ծրագրի շրջանակում իրականացվելիք հարցումներն արժեքավոր են այնքանով, որքանով այսօր երկրում քաղաքական իրողությունների համատեքստում կարևոր է պարզել, թե ինչպիսին է վստահությունը դատական իշխանության նկատմամբ, ինչ եղանակներով է հնարավոր շտկումներ իրականացնել։
Նրա խոսքով՝ դատական իշխանությունն ամենախոցելի ճյուղն է, թեև ներկայումս նկատելի են որոշակի դրական տեղաշարժեր։ Կարևոր գործոն էր հատկապես այն, որ երկրի վարչապետը պաշտոնապես ընդգծել է, որ դատական իշխանության անկախությունն իրենց համար խիստ կարևոր է, միանշանակ ձեռնպահ են մնալու որևէ միջամտությունից և քայլեր են ձեռնարկելու դատավորների անկախության, այդ թվում՝ սոցիալական և նյութական պայմանների երաշխավորման համար։
Համաշխարհային բանկի արդարադատության բարեփոխումների բաժնի մասնագետ Եվա Միլիսը ևս նկատել է, որ հարցումների նպատակն է պարզել դատաիրավական համակարգի արդյունավետությունը, արդարադատության մատչելիությունը և որակը, բարեվարքությունը և մի շարք այլ հարցադրումներ: Համաշխարհային բանկի և ԵՄ-ի կողմից մշակված հարցաշարն այժմ թարգմանության փուլում է, և հաջորդ շաբաթ կմեկնարկի պիլոտային ծրագիրը։ Հետադարձ կապի շնորհիվ էլ ակնկալում են հստակեցնել հարցաշարում առկա հասկացությունների թարգմանության և ճիշտ մեկնաբանման հետ կապված հարցերը, որոնք կքննարկեն մայիսին կայանալիք աշխատաժողովի ժամանակ։ Ներկայացվել է նաև գործառութային վերլուծության ժամանակ կիրառվելիք մեթոդաբանությունը։
Թիրախային խմբում դատավորներն են, դատախազները, դատարանի և դատախազության աշխատակիցները, փաստաբանները, քաղաքացիները և իրավաբանական անձինք (ինչպես նրանք, ովքեր երբևէ առնչություն են ունեցել դատաիրավական համակարգի հետ, այնպես էլ նրանք, որոնք այդպիսի որևէ առնչություն չեն ունեցել): Գևորգ Դանիելյանն առաջարկել է ներառել կարգապահական պատասխանատվության ենթարկված և իրենց դիմումի համաձայն համակարգից դուրս եկած դատավորներին ևս ներառել հիշյալ խմբում։
Եվա Միլսի խոսքով՝ բուն հարցումը կանցկացվի սեպտեմբերին, իսկ նոյեմբերին կներկայացվեն առաջին արդյունքները՝ թվային ցուցանիշների և գրաֆիկաների տեսքով։
Միաժամանակ, Գևորգ Դանիելյանը, ներկայացնելով դատական համակարգում էլեկտրոնային արդարադատության և էլեկտրոնային շրջանառության նոր համակարգի անցման ծրագրային ուղենիշները, առաջարկել է քննարկման առարկա դարձնել նաև այդ հարցադրումներով համագործակցության վեկտորները: Կողմերը պայմանավորվել են այդ առնչությամբ համապատասխան տեղեկատվություն տրամադրել Համաշխարհային բանկին, որտեղ այն սեղմ ժամկետում կդառնա համակողմանի քննարկման նյութ:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը
