Ձեր վստահելի աղբյուրը

Խորհրդարանում կառավարության ծրագրի կատարման ընթացքի և արդյունքների մասին զեկույցի քննարկմանն «Իմ քայլը» խմբակցության պատգամավոր Վարազդատ Կարապետյանը վարչապետ Նիկոլ Փաշինյանից հետաքրքրվեց գյուղատնտեսության ոլորտից։

«Եթե համեմատենք 2019 և 2010 թվականները, մենք ունենք գների աճ՝ հատկապես ռեսուրսների գծով։ Այսինքն թանկացել է պարարտանյութը, դիզվառելիքը, բայց որոշակի արտադրանքների գծով կայուն գներ են, ինչպես օրինակ՝ ցորենի, կաթի, մսի, կարտոֆիլի դեպքում: Դուք, իհարկե, լուծում առաջարկեցիք, որ գյուղացիները միավորումներ ստեղծեն, որ ազդեն գների վրա, երկարաժամկետ առումով դա լուծում պետք է լինի, բայց կարճաժամկետ կտրվածքով տեսնում ենք, որ այս տարի հաստատ չեն միավորվելու և հարյուր հազարավոր տնտեսություններ էլի բողոքելու են այդ ապրանքատեսակների ցածր գներից։ Հիմա կառավարության հաշվետվությունը որ նայում ենք՝ հիմնականում վարկային ծրագրերը վերաբերում են վարկային սուբսիդավորմանը: Այս ոլորտներում, որտեղ 20 տարի մի իրավիճակ է, որ ոչինչ չի փոխվում, նոր գումար տալը չի փոխելու, նման է, որ շարժիչ կա, որը չի աշխատում, բայց անընդհատ յուղ ենք լցնում, որ աշխատի: Հիմա լուծումներից մեկը սուբիսդավորումն է, մի ծրագիր կա բյուջեով հողօգտագործողների 60 հազար դրամ տալու մասին, արդյոք սուբսիդավորման այդ ծրագիրը 2019թ-ին կլինի՞ և արդյոք պետք չէ՞ անցնել գների սուբսիդավորման»,- հարցրեց նա:

Փաշինյանն արձագանքեց՝ խնդիրն այն չէ, որ փող ունենք, թե չունենք, ուզում ենք տալ, թե ոչ, այլ պետք է հասկանալ, թե փողի ծախսման համար ինչ ենք ստանալու: 

«Գաղափարն արդյունավետությունն է, ոչ թե շարունակ փող տալը։ Այդ կերպ չենք նկատում, որ այդ քաղաքականությունն էֆեկտ չի տալիս, որովհետև 5 տարի տվել ենք ու չի լուծվել խնդիրը ու նորից է գումար ուզում: Հիմա փողը պետք է դնենք մարդու ենթակառուցվածքի, գիտելքի ծախսման համար։ Թե հինգ տարի առաջ, որ այդպես անեին, հիմա արդեն արդյունք կլիներ, մինչդեռ ասում են, թե այս տարի չենք հասցնելու, եկեք այս տարի էլ չսկսենք։ Մեր մեսիջները պետք է հստակ լինեն։ Մեր տրամաբանությունն այն է, որ զարգացման վրա ծախսենք, ոչ թե առօրյա խնդրի համար փող ծախսենք, երբ գիտենք, որ ծախսեցինք, վաղը առավոտ 8-ից նույն խնդիրը լինելու է»,- պատասխանեց Փաշինյանը:
«Լուսավոր Հայաստան» խմբակցության պատգամավոր Գևորգ Գորգիսյանլ էլ հետաքրքրվեց, թե հայրենիքը լքած քանի ՀՀ քաղաքացի է վերադարձել:

«Ձեր ներկայացված ծրագրում որպես ներգաղթ ներկայացված է 15 313 քաղաքացի, բայց գիտենք որ 2018թ-ին ներգաղթ են ունեցել օտարազգի քաղաքացիներ՝ Հնդկաստանից, Պակիստանից: Ունե՞նք տվյալներ, թե հայրենիքը լքած քաղաքացինե՞րն են վերադարձել, որովհետև նույն պակիստանցիների 30 000 թիվ է շրջանառվում»,- նշեց պատգամավորը։

Վարչապետն ասաց, որ նման թիվը վերցրել են պաշտոնական վիճակագրությունից՝ ժամանումների. «Նախնական վերլուծությամբ նրանց 90 տոկոսը ՀՀ քաղաքացիներ են կամ ազգությամբ հայեր: Վստահ չեմ, որ Պակիստանից այստեղ եկող քաղաքացիներ ունենք, Հնդկաստանից է և դա նրանից է, որ մենք Հնդկաստանի հետ վիզային ռեժիմի դյուրացում ենք արել, նաև Ֆիլիպինների հետ, որը զբոսաշրջության համար էր, բայց լինում է նաև, որ աշխատանք փնտրող մարդիկ են գալիս»։