Հայաստանում կկառուցվի կամ կվերակառուցվի 230 «խելացի» անասնաշենք
Կառավարությունն այսօրվա նիստում հաստատել է փոքր և միջին «Խելացի» անասնաշենքերի կառուցման կամ վերակառուցման և դրանց տեխնոլոգիական ապահովման պետական աջակցության ծրագիրը։
Ծրագրի շրջանակում նախատեսվում է կառուցել կամ վերակառուցել 230 անասնաշենք, որի համար կներդրվի 3,2 մլրդ դրամ: Փոխհատուցման չափը կկազմի շուրջ 13.8 մլն դրամ, ծրագրի տևողությունը՝ 2019-2021թթ։
Ծրագրի հիմնական նպատակն է փոքր և միջին «Խելացի» անասնաշենքերի կառուցման կամ վերակառուցման և դրանց տեխնոլոգիական ապահովման պետական աջակցութան միջոցով բարելավել կենդանիների պահվածքի պայմանները` արդյունքում բարձրացնելով կենդանիների մթերատվության ցուցանիշները։
Ծրագրով նախատեսվում է անասնաշենքերի կառուցման համար ծախսերի փոխհատուցում.
-Տնտեսվարողներին՝ 50%-ի չափով
- Զինվորական ծառայության պարտականությունների կատարման ժամանակ մարտական հերթապահության կամ գործողությունների իրականացման արդյունքում հաշմանդամություն ունեցող քաղաքացիներին՝ շուրջ 70%-ի չափով
-Սոցիալական աջակցություն ստացող սահմանամերձ բնակավայրերում գործունեության իրականացնող տնտեսավարողների համար` շուրջ 70%-ի չափով։
Նախագծի հիմնավորման համաձայն՝ որոշման ընդունման անհրաժեշտությունը պայմանավորված է անասնաբուծության, մասնավորապես տավարաբուծության ճյուղի ռազմավարական նշանակությամբ և զարգացմամբ: Դեռևս մեծ քանակությամբ չոր կաթ և կաթնամթերք է ներմուծվում հանրապետություն, ուստի տավարաբուծական արտադրանքի ինքնաբավության մակարդակի բարձրացման նպատակով անհրաժեշտ է հանրապետությունում վարվող ագրարային քաղաքականությունում ձևավորել նոր մոտեցումներ: Հանրապետությունում տնտեսությունների մեծամասնությունը վարում է ավանդական անասնապահություն, մինչդեռ ժամանակակից տնտեսավարման ձևերի և տեխնոլոգիաների կիրառումը կարող է հանդիսանալ տնտեսական որոշիչ լծակ: Այսպիսով, կարգավորման նպատակն է` փոքր և միջին «Խելացի» անասնաշենքերի կառուցման կամ վերակառուցման և դրանց տեխնոլոգիական ապահովման պետական աջակցության միջոցով բարելավել կենդանիների պահվածքի պայմանները` արդյունքում բարձրացնելով կենդանիների մթերատվության ցուցանիշները։
Ծրագրի իրականացումից ակնկալվում են հետևյալ արդյունքները.
-կզարգանան հանրապետությունում փոքր և միջին տավարաբուծական տնտեսությունները՝ կկառուցվի կամ կվերակառուցվի շուրջ 230 անասնաշենք,
-կներդրվեն տավարաբուծության վարման արդիական տեխնոլոգիաներ,
-կենդանիների պահվածքի համար կստեղծվեն բարենպաստ պայմաններ,
-կբարձրանա մեկ գլուխ կովի հաշվով կաթնատվության մակարդակը՝ մինչև 3500-4000 կգ,
-կավելանա անասնագլխաքանակը,
-կիջեցվի կաթի ինքնարժեքը, կավելանան արտադրության ծավալները,
-կբարելավվեն կաթի որակական հատկանիշները,
-կավելանան տնտեսավարողների եկամուտները, կբարձրանա մրցունակության մակարդակը,
-կբարձրանան տնտեսավարողների մասնագիտական կարողությունները,
-ծրագրի իրականացման արդյունքում ստեղծված տնտեսությունները կարող են օրինակ ծառայել ֆերմերների լայն շերտերի համար տավարաբուծության արդի մոտեցումներին ծանոթանալու առումով, ինչպես նաև ուսումնական բազա՝ ուսանողների համար։
Նշվեց նաև, որ ծրագրի շրջանակում Հայաստանի ազգային ագրարային համալսարանը կկազմակերպի դասընթացներ:
Վարչապետ Նիկոլ Փաշինյանն էլ հորդորեց գյուղատնտեսությամբ զբաղվող քաղաքացիներին դասընթացների պահանջը չթերագնահատել. «Դա շատ կարևոր է, ի վերջո, մեր ռազմավարական ուղղություններից մեկն իմացությունների, գիտելիքների շարունակական զարգացումն է»:
Գործադիրի ղեկավարը նշեց, որ Հայաստանի ազգային ագրարային համալսարանի այս փորձը պետք է կիրառել նաև մյուս համալսարանների հետ տարվող աշխատանքներում. «Մենք պետք է անընդհատ հզորացնենք մեր փորձագիտական ներուժը, որովհետև դա մեր պետական կառավարման համակարգում այսօր, ցավոք, քիչ ուշադրության արժանացած օղակներից մեկն է»:
Վարչապետը շահագրգիռ գերատեսչությունների ղեկավարներին հանձնարարեց ապահովել դասընթացների պատշաճ մակարդակը, որպեսզի դրանք ձևական բնույթ չկրեն:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ