Եզդի երեխաների կրթության իրավունքը Հայաստանում խախտվում է. Զեմֆիրա Քալաշյան
Հայաստանում եզդի երեխաների կրթության իրավունքը խախտվում է: Այս մասին այսօր Ազգային ժողովում «Մարդու իրավունքների ազգային օրակարգ. ՄԱԿ-ի համընդհանուր պարբերական դիտարկում» թեմայով քննարկման ժամանակ հայտարարեց «Սինջար» եզդիների ազգային միավորում ՀԿ անդամ Զեմֆիրա Քալաշյանը:
Նրա խոսքով՝ ՀՀ քաղաքացի համարվող բոլոր ազգային փոքրամասնությունները Հայաստանում իրավունքի խախտման հետ կապված լուրջ խնդիրներ չունեն, բայց եզդիական համայնքն ունի որոշակի խնդիրներ՝ կապված կրթության հետ:
Զեմֆիրա Քալաշյանը նշեց, որ եզդի երեխաները շարունակում են դուրս մնալ կրթությունից, եզդի աղջիկներից ու տղաներից շատերը չեն ավարտում դպրոցը:
Երեխայի կրթությունից դուրս մնալու պատճառները տարբեր են, բայց հիմնականը, ըստ նրա, ազգային ավանդույթներն են:
«Աղջիկներին ամուսնացնելու նպատակով դպրոցից հանում են: Իհարկե լինում են դեպքեր, երբ ասում են՝ աղջիկները ամուսնության նպատակով են դպրոցից դուրս գալիս, բայց դա ոչ բոլոր դեպքերում է ճիշտ: Այսինքն՝ ամուսնության հետ կապ չունի երեխայի դպրոցից դուրս մնալը»,- ասաց Զեմֆիրա Քալաշյանը:
Նա նաև նշեց, որ եզդի երեխաները տարրական դասարաններում հայերեն լեզվի հետ կապված խնդիրներ են ունենում, չեն կարողանում գրական հայերենով հաղորդակցվել, արդյունքում, երեխաները չեն կարողանում յուրացնել ուսումնական թեման:
Կրթությունից դուրս մնալու պատճառներից է նաև այն, որ եզդիական 10-ից ավելի համայնքներում գործում են միայն հիմնական դպրոցներ, և շատ հաճախ տրանսպորտի պատճառով, ինչպես նաև սոցիալական խնդիրներից ելնելով՝ երեխաները հնարավորություն չեն ունենում ուսումը շարունակել այլ համայնքներում:
«Դա բերում է նրան, որ մեր համայնքից բարձագույն ուսումնական հաստատություններ ընդունվողները քիչ են»,- ասաց Զեմֆիրա Քալաշյանը:
Նա նաև անդրադարձավ եզդիերենի դասավանդմանը՝ նշելով, որ դպրոցներում դասավանդող ուսուցիչները հիմնականում եզդիերեն լեզվի ուսուցչի մասնագիտացում չեն ստացել:
«Դասավանդող ուսուցիչների մեծ մասը շատ հեռու են ուսուցիչ լինելուց, բացի այն, որ երեխաների մեջ սպանում են ուսուցչի նկատմամբ դրական վերաբերմունքը, լեզուն սովորելու ցանկությունն ու ազգայինի նկատմամբ սերը, դասերը նորմալ չեն վարում»,- ընդգծեց նա՝ հավելելով, որ եզդիերեն դասավանդող ուսուցիչների աշխատավարձը շատ ցածր է, ուստի երիտասարդները ցանկություն չունեն աշխատել դպրոցներում:
Սակայն կրթական համակարգում խնդիրներն այսքանով չեն ավարտում: Զեմֆիրա Քալաշյանը ուշադրություն հրավիրեց հանրակրթական դպրոցներում «Հայ եկեղեցու պատմություն» առարկայի դասավանդմանը։ «Մտահոգությունն այն է, որ այդ առարկայի դասավանդումից առաջ երեխաներն աղոթում են, կան դպրոցներ, որ երեխաներին տանում են եկեղեցի՝ եկեղեցական որևէ արարողությանը մասնակցելու համար,և դրանց մասնակից են դառնում նաև եզդի երեխաները, ինչը ճիշտ չէ: Սակայն երեխաները, նրանց ծնողները չեն բողոքում: Խոր հարգանք տարածելով Հայ Առաքելական եկեղեցու հանդեպ, ուզում եմ խնդրել, որ դա չկատարվի իմ համայնքի ազգային ինքնությունը կորցնելու հաշվին»,- եզրափակելով խոսքն՝ ասաց Զեմֆիրա Քալաշյանը:
Հարակից հրապարակումներ`
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ