Ձեր վստահելի աղբյուրը

Ռուսական պետական  հեռուստաընկերությունները հայտարարում են, որ ՀՀ երկորրդ նախագահ Ռոբերտ Քոչարյանը քաղաքական հետապնդման է ենթարկվում։ Լրագրողները վարչապետ Նիկոլ Փաշինյանին խնդրեցին մեկնաբանել սա՝ հաշվի առնելով նրա կողմից արված այն հայտարարությունները, որ ռուս գործընկերների հետ հարաբերությունները նորմալ են։

«Կարծում եմ՝ հարաբերությունների նորմալ լինելը հենց դա էլ նշանակում է, որ հարաբերությունները նորմալ են, իսկ հեռուստաընկերությունները մեղադրում են ինչ-որ բանի մեջ»,-ասաց Փաշինյանը։

Նա հայտարարեց՝ Հայաստանում ինչպես հայաստանյան լրատվամիջոցներն են ազատ, այնպես էլ ռուսաստանյան։

«Չնայած հիմա կարծիքներ կան, որ պետք չի, օտարերկրյա լրատվամիջոցները Հայաստանի Հանրապետությունում լինեն նույնքան ազատ, ինչքան հայաստանյան լրատվամիջոցները։ Կարծում եմ, որ յուրաքանչյուր հեռուստաընկերություն, պետություն , հեռարձակող պետք է շատ հստակ գիտակցի, որ եթե մենք մի երկրի տարածքում հեռարձակվում ենք, որոշակի կոռեկության սահմաններ է ենթադրում, որը պետք է պահպանվի։ Հակառակ դեպքում մենք սխալ դաշտ կընկնենք»,-նշեց վարչապետը։

Փաշինյանի խոսքով, հնարավոր է ռուսական հեռուստաընկերություններն այդ խնդիրը հաշվի առնեն և համապատասխան հետևություններ անեն։

«Բայց էլի եմ ասում, ոչ մեկ կարծիք հայտնելու ազատությունը չի սահմանափակում։ Հայաստանում էլ կան այդպիսի տեսակետներ։ Երբ գործը դատական փուլ մտնի, հանրությունն ու միջազգային հանրությունը հնարավորություն կունենա տեսնելու։ Ես էս գործի մասին չէի ասում, այլ ընդհանուր այլ երկրների տարածքում լրատվական քաղաքականության»,-նկատեց նա։

Հարցին, թե նման մեկնաբանություններով Ռուսաստանը փորձում է իր աջակցությունը ցուցաբերել Ռոբերտ Քոչարյանին, Փաշինյանն ասաց, ենթադրություններ չի անի, խորհուրդ տվեց դիմել Ռուսաստանին։