Ձեր վստահելի աղբյուրը

«Պետք է արձանագրեմ, որ մեր գործընկերը՝ Հայկ Գևորգյանն, առանվազն ազնիվ չի եղել փաստերի տրամադրման առումով՝ մասնավորապես ԱԺ ամբիոնից հայտարարելով, որ մասնավորեցումն արժեցել է 200 հազար դոլար»,- ԱԺ ճեպազրույցների ժամանակ հայտարարեց ԲՀԿ խմբակցության պատգամավոր Իվետա Տոնոյանն՝ անդրադառնալով «Արարատցեմենտի» շուրջ եղած  քննարկումներին։

Իվետա Տոնոյանն ասաց, որ պայմանգիրը ձեռքի տակ է, երկրորդ կետում նշված է 200 հազար դոլարի մասին, իսկ 3-րդ կետում նշված է մի քանի մլն դոլար պարտքեր մարելու մասին։

«Ընդհանուր առամամբ էլ 10 մլն դոլարից էլ ավելի գումար է արժեցել մասնավորեցման  ամբողջ գործընթացը՝ հաշվի առնելով պարտքերի մարումն ու մնացյալ ծախսերը, էլ չենք անդրադառնում հետագայում արդեն 6.2 մլրդ դրամ ներդրումային ծրագրերին»,- ասաց Տոնոյանը:

ԲՀԿ-ական պատգամավորը նկատեց, «Իմ քայլը» խմբակցության պատգամավոր Հայկ Գևորգյանը լինելով լրագրող, շատ լավ է հասկանում, թե  մասնակի տվյալներ տրամադրելով, ինչպես կարելի է լրատվական դաշտը մանիպուլյացիայի ենթարկել։

ԲՀԿ-ական պատգամավոր Միքայել Մելքումյանն էլ հայտարարեց, որ ցեմենտի գործարանի գնման մրցույթում հաղթած շվեյցարական ընկերությանն էլ որևէ մեկը չի արգելել, այլ ինքն է հաշվարկներ արել ու ինքնուրույն որոշում կայացրել հրաժարվել։

«Իմ քայլը» խմբակցությունից լրագրողների հետ հանդիպման էին եկել տնտեսական հարցերում մասնագիտացված պատգամավորները՝ Բաբկեն Թունյանն ու Հայկ Գևորգյանը։

«Եթե տնտեսվարողը ցանկանում է կառավարությունից ստանալ պրեֆերենցիաներ, ապա պետք է պատրաստ լինի իր ամբողջ գործունեությունը դարձնի թափանցիկ, որպեսզի կառավարությունը հասկանա, թե ինչի հետ գործ ունի։ Հիմա մենք նրանց առաջարկում ենք իրենց մոտ անցկացնել անկախ աուդիտ՝ տեխնիկական, ֆինանսական, որպեսզի հասկանանք, թե ինչքան պետք է լինի տուրքը, որ գործարաններն աշխատեն նորմալ շահույթաբերությամբ, նրանք պատասխանում են անձնական վիրավորանքներով։ Դա արդեն իսկ կասկածելի է»,-ասաց Հայկ Գևորգյանը։

Նա նկատեց, եթե գործարանում թաքցնելու բան չունեն, ապա պետք է թողնեն անկախ ու բոլորի կողմից վստահելի աուդիտորը իրականացնի ուսումնասիրություն՝ հասկանալու, թե  ինչ է այնտեղ կատարվել վերջին 17 տարվա ընթացքում։

Բաբկեն Թունյանն էլ հորդորեց բոլոր ընկերություններին բաց լինել ինֆորմացիոն առումով, ասաց, «Արարատցեմենտ»-ի տնօրեն Սեդրակ Առուստամյանն էլ փաստաթղթերի տրամադրման վերաբերյալ իր համաձայնությունն է հայտնել։