Ձեր վստահելի աղբյուրը

ՀՀ վերաքննիչ քրեական դատարանը մերժել է «Սպայկա» ընկերության տնօրեն Դավիթ Ղազարյանի նկատմամբ կալանքը որպես խափանման միջոց վերացնելու և նրան գրավի դիմաց ազատ արձակելու վերաբերյալ պաշտպանական կողմի միջնորդությունները: Լրագրողներին ասաց Դ.Ղազարյանի փաստաբանական թիմի անդամ Արսեն Սարդարյանը։

«Մեր բողոքը մերժվեց, չնայած մենք չէինք սպասում նման որոշում: Հնարավոր է, որ մեր վստահորդի հետ քննարկելուց հետո մոտ օրերս ասուլիս հրավիրենք ու մանրակրկիտ խոսենք այս գործի մասին: Այս որոշումը գնահատում ենք որպես գործարարից գումար կորզելու մեխանիզմ»,- ասաց նա:

Ա. Սարդարյանը նշեց, որ պաշտպանական կողմն ասում է՝ կա հաշվարկված ենթադրյալ չվճարված հարկ, այդ հաշվարկն իրականացվել է վարույթն իրականացնող մարմնի կողմից կազմված տեղեկանքի հիման վրա, այս գործընթացին իրենց թիմը մասնակից չի եղել։

«Մեր աուդիտոր հաշվապահները չեն ընդգրկվել այդ գործընթացում, որպեսզի հասկանանք՝ իրականում  պետությանը պատճառված  վնաս առկա է, թե ոչ, եթե առկա է՝ որքան է կազմում»,- ասաց փաստաբանը։

Նա նշեց, որ պաշտպանական կողմի պահանջը՝ փորձաքննությանը ներկա լինել, որ իրենց ֆինանսիստ մասնագետների դիրքորոշումը ապահովվի, ներկայացվում է որպես քննությանը խոչընդոտելու ռիսկ։

Ա. Սարդարյանը նշեց, որ որևէ տվյալ, որ Դ. Ղազարյանը երբևէ քննությանը խոչընդոտել է, չի ներկայացվում և վարույթ իրականացնող մարմինն ու դատախազը ընդունում են այդ փաստը, միայն վերացական դատողություն է իրականացվում, որ ընկերության ղկավարը հեղինակավոր անձ է, նրա հեղինակությունը կարող է ազդել քննության վրա։

Պաշտպանի խոսքով, դատական քննության ընթացքում ներկայացրել են, որ ոչ միայն կալանքի հիմքներն են բացակայում, այլ նաև Դ. Ղազարյանին կալանքի տակ պահելը լուրջ տնտեսական ճգնաժամ կարող է առաջացնել. «Քանի որ հանդիսանում է  «Սպայկա» ընկերության միակ հիմնադիրը, գործընկերները ճանաչում են նրան, նրա հետ են աշխատում, նրա կալանավորումը կարող է ծանր հետևանքներ առաջացնել, բիզնեսը չկարողանա շարունակել իր գործունեությունը։

«Թողեք այդ մարդը բիզնեսով զբաղվի, իրավաբանները, ֆինանսիստները ներգրավեն այդ գործընացին, բոլորով  միասին հաշվարկեն։ Պարոն Ղազարյանն ասում է, որ եթե մասնագետներն, ում ես վստահում եմ, ներգրավվեն գործընթացին, ասեն՝ այստեղ այսքան հարկ է, ես, ըստ ընկերության կարողությունների, կասեմ, թե որ ժամանակահատվածում կարող եմ մարել այդ գումարը»,- ասաց Դ.Ղազարյանի փաստաբանական թիմի անդամ Արսեն Սարդարյանը։ 

Հիշեցնենք, որ Դ.Ղազարյանին ՊԵԿ քննչական վարչության վարույթում քննվող քրեական գործով մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասով՝ ավելի քան 7 մլրդ դրամի հարկային պարտավորություն չկատարելու համար։ Դ.Ղազարյանը հայտարարել է, որ չի ընդունում առաջադրված մեղադրանքը՝ նշելով, որ ՊԵԿ-ը ուռճացված թվեր է հրապարակել և վերջինիս գործողությունները գնահատել որպես հետապնդում։
Ապրիլի 8-ին Երևան քաղաքի ընդհանուր իրավասության դատարանը բավարարել էր ՊԵԿ քննչական վարչության քննիչի միջնորդությունը և «Սպայկա» ընկերության տնօրեն Դավիթ Ղազարյանի նկատմամբ երկամսյա կալանքի որոշում կայացրել։