Արզումանյան 4/1 հասցեի խաղահրապարակում շինարարական աշխատանքները կասեցվել են
Panorama.am-ի խմբագրությունն ահազանգ էր ստացել Երևան քաղաքի Աջափնյակ վարչական շրջանի Արզումանյան 4 և Հալաբյան 13 շենքերի բնակիչներից, ըստ որի Արզումանյան 4/1 հասցեում՝ երեխաների համար նախատեսված խաղահրապարակում ընթանում են շինարարական աշխատանքներ։ Քաղաքացիները դեմ են խաղահրապարակը շինություն դարձնելուն։
Նրանք օրեր առաջ նամակով դիմել էին վարչապետ Նիկոլ Փաշինյանին, նամակի պատճենն ուղարկել էին ՀՀ նախագահին, քաղաքապետին, ԱԺ «Իմ քայլը» խմբակցությունից ու Աջափնյակ վարչական շրջանի ղեկավարին։ Բնակիչները պահանջում են, որ այդ տարածքում լինի կանաչ գոտի, դեմ են ցանկացած կառույցի, պնդում են, շինության դեպքում կունենան խնդիրների կապված արևի լույսի, էլեկտրաէներգիայի, ջրամատակարարման և այլնի հետ։
Նրանք իշխանության ներկայացուցիչներից հետաքրքրվել էին՝ ե՞րբ և ո՞ւմ որոշմամբ է հանրային տարածքի նշանակությունը փոխվե՞լ, նոր նշանակությունը համապատասխանո՞ւմ է Երևանի գլխավոր հատակագծին, ի՞նչ հիմքով է տրամադրվել հաղահատկացման որոշումը, ի՞նչ է կառուցվելու այդտեղ, որդյո՞ք հաղահատկացման, շինարարության իրականացման վերաբերյալ եղել է քննարկում հարակից շենքերի բնակիչների մասնակցությամբ։
Panorama.am-ը բնակիչներին մտահոգող հարցերն ուղղեց քաղաքապետարանին։
Մայիսի 15-ին ուղարկված հարցմանն ի պատասխան այսօր քաղաքապետարանից հայտնեցին, որ ՀՀ կառավարության «Ինքնակամ կառույցների օրինականացման և տնօրինման կարգը հաստատելու մասին» 18.05.2006թ. հ.912-Ն որոշման շրջանակներում, կայացվել է Երևանի քաղաքապետի 20.12.2007թ. հ.5739-Ա և 01.12.2008թ. հ.5614-Ա որոշումները, ըստ որոնց Երևան քաղաքի սեփականություն հանդիսացող, ք.Երևան, Արզումանյան փողոց հ.4/5 հասցեում գտնվող հասարակական նշանակության ինքնակամ կառույցը համարվել է Երևան քաղաքի սեփականություն, օրինականացված կառույցը և հողամասը գնման նախապատվության իրավունքով ուղղակի վաճառքի ձևով վաճառվել է կառուցապատող հանդես եկող Վարդան Առաքելյանին: Գույքի նկատմամբ վերջինիս իրավունքները ստացել են պետական գրանցում:
Ինչ վերաբերում է շինարարության իրականացնելու թույլտվությանը, ապա քաղաքապետարանից մանրամասնում են, որ ներկայում իրականացվող շինարարական աշխատանքների համար առկա է գոյություն ունեցող շինության քանդման և հասարակական նշանակության օբյեկտի կառուցման նպատակով Երևանի քաղաքապետարանի կողմից 28.10.2011թ. համաձայնեցված հ.01/18-05/1-Ա-5192-898 աշխատանքային նախագիծը և կառուցապատող Վարդան Առաքելյանին 28.10.2011թ. տրված հ.01/18-Ա-5307-906 շինարարության թույլտվությունը /15.05.2018թ. երկարաձգվել է՝ հ.18-08/1-Ա-3109/:
«Աշխատանքային նախագիծը համաձայնեցվել է հիմք ընդունելով «ԼԱՎՈ» ՍՊ ընկերության կողմից տրված հ.163-10 դրական փորձագիտական եզրակացությունը, որի շրջանակներում փորձաքննություն անցկացնող լիցենզավորված կազմակերպությունը դիտարկել է նախագծի համապատասխանությունը Հայաստանում գործող նորմատիվա-տեխնիկական պայմաններին և երաշխավորել համաձայնեցման»,-ասում են քաղաքապետարանից։
Ինչ վերաբերում է հարցին, թե ինչու հարակից շենքերի բնակիչների մասնակցությամբ քննարկում չի եղել, քաղաքապետարանից հիմնավորում են՝ նման քննարկման վերաբերյալ տրամադրված քաղաքաշինական փաստաթղթերում որևէ տեղեկատվություն առկա չէ։
«Սակայն հարկ ենք համարում նշել, որ նման օբյեկտների կառուցման համար քաղաքաշինական փաստաթղթերի տրամադրման ընթացակարգում իրազեկում չի նախատեսվում»,-ասված է քաղաքապետարանի պատասխանում։
Երևանի քաղաքապետարանից հայտնում են, որ մայիսի 11-ին նշված հասցեում կառուցապատողի կողմից սկսված շինարարական աշխատանքները ժամանակավորապես կասեցվել են՝ հիմք ընդունելով ՀՀ կառավարության 19.03.2015թ. թիվ 596-Ն որոշման Հավելված N 1-ով հաստատված կարգի VI բաժնի 129-րդ կետը՝ շինարարական աշխատանքների սկսման վերաբերյալ ծանուցում Երևանի քաղաքապետարան չներկայացնելու հիմքով:
«Հաշվի առնելով նաև Երևանի քաղաքապետարանի թեժ գծի հեռախոսահամարով ստացված ահազանգերը և հարակից շենքերի բնակիչների դժգոհությունը, վերը նշված քաղաքաշինական փաստաթղթերի օրինաչափության և բարձրացված հարցերի պարզաբանման նպատակով նախապատրաստվում է վարչական վարույթի իրականացում»,-նշում են քաղաքապետարանից։
Բնակիչները գործադիր, օրենսդիր մարմինների անդամներին, քաղաքապետին ուղղված նամակում հույս էին հայտնել, որ 2019-ին խնդիրը վերջնականապես լուծում կստանա։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
