Ձեր վստահելի աղբյուրը

Ազգային ժողովի մշտական հանձնաժողովներում և դրանց համատեղ նիստերում այսօրվանից մեկնարկում են «ՀՀ 2018 թ. պետական բյուջեի կատարման մասին» տարեկան հաշվետվության նախնական քննարկումները:

ՀՀ վարչապետ Նիկոլ Փաշինյանը  նույնպես մասնակցում է հաշվետվության քննարկմանը։ Նա իր խոսքում նշեց, որ իր ղեկավարած կառավարությունը բյուջեի հաշվետվություն ներկայացնում է երկրորդ անգամ, սակայն նախորդ տարվա առանձնահատկությունն այն էր, որ ներկայացվող հաշվետվության հետ գործող կառավարությունը ոչ մի առնչություն չուներ, քանի որ ներկայացվում էր 2017 թ-ի բյուջեն։

«Այսօրվա առանձնահատկությունն էլ այն է, որ մեր կառավարությունն ունի ոչ ամբողջական մասնակցություն, քանի որ մենք կառավարության դերը ստանձնել ենք մայիսին»,-  նշեց վարչապետը։

Նիկոլ Փաշինյանի խոսքով՝ բյուջեի կատարման ցուցանիշներին բազմիցս անդրադառնալու առիթ ունեցել է, ուստի այսօր դրամատիկ նորություններ ասել  չի պատրաստվում, բայց շատ լավ առիթ է ամփոփել այն, ինչի մասին այս ընթացքում ասել են։

Նա նշեց, որ 2018 թվականը քաղաքական առումով աննախադեպ տարի էր, քանի որ տեղի է ունեցել ՀՀ նախագահի մեկ ընտրություն,  ՀՀ վարչապետի  5 ընտրություն, ԱԺ արտահերթ ընտրություններ,  Երևանի քաղաքապետի մեկ արտահերթ ընտրություն և մեծ հաշվով, ըստ վարչապետի, Հայաստանում տեղի է ունեցել թավշյա հեղափոխություն:

«Սա կարևոր է նկարագրելու համար այն ֆոնը, որի պայմաններում տեղի է ունեցել բյուջեի կատարման ընթացքը»,-ընդգծեց նա։

Նիկոլ Փաշինյանը հայտարարեց, որ այդ պայմաններում իր ղեկավարած կառավարությունը, որը ձևավորվել է 2018 թ-ի մայիսին,  կարողացել է լուծել ամենակարևոր խնդիրը՝ պահպանել մակրոտնտեսական կայունությունը. «Երևի թե հնարավոր չէ համաշխարհային պատմության մեջ գտնել շատ դեպքեր, երբ երկրում տեղի են ունենում այսպիսի մասշտաբային փոփոխություններ, որոնք չեն ուղեկցվում տնտեսական ցնցումներով, ֆինանսական համակարգի փլուզումներով»։

Նա նշեց, որ 2018 թվականին արձանագրվել է 5,2 տոկոս տնտեսական աճ, սակայն ընդգծեց, որ 2018 թ-ի բյուջեի նախագծում նախորդ կառավարության և ԱԺ կողմից որպես տնտեսական աճի ցուցանիշ նշվել է 4,5 տոկոս։

«Այսինքն՝ 2018 թվականին այսպիսի գլոբալ քաղաքական վայրիվերումների պայմաններում կառավարությանը հաջողվել է գերակատարել այն պլանը, որը 2018 թվականի բյուջեի հիմքում դրել է նախորդ կառավարությունը՝ ելնելով այլ կանխատեսումներից»,- ասաց Նիկոլ Փաշինյանը՝ հավելելով, որ 2018 թվականի պետական բյուջեն կատարվել է, և դրա արդյունքներով ՀՀ կառավարությունը չունի չկատարված պարտավորություններ:

Վարչապետը միաժամանակ նշեց, որ պետական բյուջեն թերակատարվել է ծախսերի մասով։ Մասնավորապես, ըստ նրա, 2018 թվականի համար պլանավորված ծախսերը ոչ ամբողջությամբ է հնարավոր եղել իրականացնել: Նիկոլ Փաշինյանի խոսքով՝  դա կապ ունի մի քանի խնդիրների, այդ թվում՝ կոռուպցիայի դեմ պայքարի հետ. «Այսօր էլ կան խոշոր վարկային ծրագրերով իրականացվող նախագծեր, որոնց հետ կապված կան հարցեր, հարուցված են քրեական գործեր։ Պետական բյուջեն, այդ թվում՝ վարկային միջոցները պետք է ծախսվի մաքսիմալ արդյունավետ»։

Նա նաև ասաց՝  2018 թվականի փորձը հուշում է, որ մակրոտնտեսական կայունությունը հնարավոր է եղել պահպանել երկու հիմնական պատճառով. «Առաջինը՝ մենք պետք է գոհունակությամբ արձանագրենք, որ ՀՀ-ում կան կայացած ինստիտուտներ, որոնք թավշյա հեղափոխության շրջանում իրենց դերակատարումն ունեցան և ցույց տվեցին, որ անկախ քաղաքական վայրիվերումներից պետական համակարգի բնականոն գործունեությունը կարող են ապահովել։ Երկրորդը՝ ՀՀ-ում տեղի ունեցած հեղափոխության թավշյա բնույթն է, որն այս ընթացքում բազմիցս քննադատվեց և շարունակվում է քննդատվել։ Շատ է խոսվում այն մասին, որ թավիշը շատ է, իհարկե ամեն ինչ կարող էր շատ ավելի կոշտ լինել: Սակայն կառավարությունը չի կարող մտածել միայն մեկ խնդիր լուծելու մասին: Կառավարությունը բազմաթիվ խնդիրներ ունի  լուծելու, և ինչպես նախկինում, ես կառավարության գործունեությունը համեմատում եմ բազմաթև կշեռքի կամ ճոճանակի հետ»: